Pene 19 — “Na to ratou Ua e Kite ei Kotou ia Ratou”
GSAM 299.1“Kua oronga aia i tetai pae ei aposetolo; e tetai pae ei peroveta; e tetai pae ei apii evangelia; e tetai pae ei tiaki e ei orometua; kia akariroia te aronga tapu ei aronga tika rava, no te angaanga tavini, e no te akatupu i te kopapa o te Mesia; e kia tae tatou ravarai ki te akarongo okotai, e te kite i te Tamaiti a te Atua, ei tangata tika rava, kia tae ki te aite i te maata o te ki rava o te Mesia.”1
GSAM 299.2I te tukuanga te Akaora i te au oronga a tona Vaerua ki roto i te ekalesia, kia rave i te angaanga a te Atu, “mei tana i inangaro,” e tae ua atu ki te ra tika rava, kare aia i akaruke i tona iti tangata kia kimi ua i to ratou uaorai manako, e no te rangi ainei tetai akaarianga, e no te au vaerua kino ainei. Kua oronga mai ra aia i te au ture kia kite tatou e no te Atua ainei taua vaerua ra, e kare ainei. I teia au ra openga katoa, i te mea e ka riringi mai te Atu i tona Vaerua ki runga i te tangata katoatoa, e ka tuatua peroveta te au tamariki tamaroa e te au tamariki tamaine, mei tei tuatuaia mai e te peroveta ra ko Ioela,2 Te tuatua maira a Paulo e auraka te tangata e akavaavaa i te au tuatua peroveta, kia “tamata ra i te au mea katoa,” e kia “mou piri i tei meitaki.”3
GSAM 299.3Akapeea e rauka ai i te tamata i taua au akaarianga ra, mari ra kia akaaite i te reira ki te au ture a te Tuatua Tapu no te kite i te angaanga a te Vaerua o te Atua? Kare te au mea katoa e kore e rauka i te manako kotingaia o te tangata i te marama, e no te Atua ïa; no te mea te akakite maira te Bibilia e i te au ra openga ka rave a Satani i te au semeio kia pikikaa i to te ao, e kia akaputuputu ia ratou ki te tamaki i taua ra maata o te Atua Mana Katoatoa ra.4 No reira, na te akaaiteanga meitaki i te akaarianga ki te au ture a te Bibilia e kite ei i tetai oronga vaerua mou. E anoanoia kia matakite i teia, mei te matakite o te au tangata o te ao i te kimi i te moni pikikaa.
GSAM 300Te Kiteanga i te Moni Pikikaa
GSAM 300.1I roto i te Karere no te Moni Pepa o Detroit o Aperira, 1863, kua oronga mai a Mita Preston i te au ture e rima no te kite i te moni pikikaa. Kua akakite aia e ko te tangata e akara matatio i te moni pepa tataki tai e tae mai ki tona rima, kia tau ki taua au ture ra, kare aia e anoano kia mataku i te pikikaaia.
GSAM 300.2Kare atu e ravenga papu atu no te tamata i tetai oronga o te peroveta, mari ra kia akaaite i te reira ki te akatakaanga o taua au oronga i akaariia i te tuatau o te Tuatua Tapu, e kia tamata i te reira ki te au ture i orongaia ki roto. Na te Tuatua Tapu e akapapa meitaki ia tatou no te au angaanga meitaki katoa (2 Timoteo 3:16, 17), e te oronga maira i te akakiteanga tika o te au akaarianga o te oronga o te peroveta, e te ravenga e kite ei i te angaanga mou a te Vaerua o te Atua, kia taka ke i te au angaanga a Satani e tana au oronga pikikaa.
GSAM 300AU TURE NO TE KITE I TE AU ORONGA MOU
GSAM 300.3Kua oronga mai te Atu i roto i tana tuatua i te au ture taka ke, e itu me kore e maata atu, e rauka ai i te akataka i te au akaarianga mou a te Vaerua o te Atua mei te angaanga a Satani.
GSAM 300Ture Mua—Te Apiianga Takatake
GSAM 300.4I te tuatuaanga te peroveta ra ko Isaia i te au mea e tupu i te au ra openga, kua karanga aia e: “E ruru i te akakiteanga, e akairo i te ture i rotopu i taku au pipi. E ka tiaki au i te Atu, tei uuna i tona mata i te ngutuare o Iakoba, e ka akara au kiaia.... E kia karanga mai ratou kia kotou e, E kimi ki te aronga e vaerua ta ratou, e te aronga purepure e tangi rikiriki e e ngunguru ra; kare ainei te iti tangata e kimi ki to ratou Atua? E kimi ainei ki tei mate no te aronga ora? Ki te ture e te akakiteanga; me kare ratou e tuatua kia tau ki teia tuatua, no te mea ïa kare e marama i roto ia ratou.”5
GSAM 301.1I roto i teia Tuatua Tapu, te akaariuia ra te manako ki tetai iti tangata e angaanga ra i te akaoki i te akairo ki te ture a te Atua—e iti tangata e tiaki ra i te Atu, e e rave ra i tana angaanga. Te akara ra ratou kiaia; koia oki, te tiaki ra ratou i tona taeanga mai—e i taua tuatau katoa, te pati ra te au vaerua e karanga ra e e vaerua ratou no tei mate, kia kimi te tangata kia ratou. Te akarongo ra tetai pae ki ta ratou kapiki, e te kimi ra ki tei mate kia rauka te kite; te pati maira ra te Atu i tona iti tangata kia kimi kiaia. Ko te aiteanga ïa, me kimi ratou kiaia, ka oronga mai aia i te apiianga takatake kia ratou. Kare ratou e anoano kia kimi ki tei mate, kare oki e rauka i tei mate i te oronga atu i tetai kite kia ratou; no te mea “kare oki o ratou tuanga akaou e tuatau ua atu i te au mea katoa e raveia nei i raro ake i te ra;” e “kare tei mate e kite i tetai mea.”6
GSAM 301.2I roto i te tuatua tapu i runga ake nei, kua orongaia mai tetai ture e tamataia ai te au karere katoa,—“me kare ratou e tuatua kia tau ki teia tuatua, no te mea ïa kare e marama i roto ia ratou.” Ka tuatua te au karere katoa no ko mai i te Atu kia tau ki tana tuatua e tana ture.
GSAM 301.3I te taangaanga i teia ture ki te au tataanga a Mrs. White, ka karanga au e i roto i te au mataiti e rima ngauru ma rua i topa ake nei kua tatau matatio au i tana au akakiteanga ako, e kua akaaite au i te reira ki te ture a te Atua e te akakiteanga a te Bibilia, e kua kite au i te rotai meitaki tikai i rotopu i taua nga mea e rua ra. Kare tana au apiianga i tae mai ei oronga mai i tetai akaarianga ou ei mono i te Tuatua Tapu, ei akaari mai ra kia tatou e kiea e akapeea te tangata i teia tuatau e rauka ai i te arataki ke ia, kia akaruke i te tuatua. Te ngai o te au akakiteanga ako a Mrs. White, e marama meitaki ïa i tana uaorai i tata no te reira:—
GSAM 301.4“E rava te tuatua a te Atua no te akamarama i te manako i tapoki maataia e te poiri, e ka rauka i te aronga e inangaro ra kia marama i te reira, i te marama. Noatu ra teia, te kitea ra tetai pae e karanga ra e te apii ra ratou i te tuatua a te Atua, e ora ra ratou ma te patoi tika i tana au apiianga tei taka meitaki. E no reira, kia kore e rauka i te au tane e te au vaine tetai ravenga no te akatika ia ratou uaorai, te oronga maira te Atua i te au akakiteanga ako taka meitaki e te tika, ei akaoki ia ratou ki te tuatua ta ratou i kopae i te akarongo.
GSAM 302.1“E maata te au tumu apii i roto i te tuatua a te Atua no te akatupu i te au peu tika o te oraanga, e kua orongaia te au akakiteanga ako, no te katoatoa e no te tangata tataki tai, ei akaariu takatake i to ratou manako ki taua au tumu apii ra.... Kare kotou i matau ki te Tuatua Tapu. Naringa kotou i apii i te tuatua a te Atua, ma te inangaro kia tae ki te turanga ta te Bibilia e umuumu ra, e kia riro ei Kerititiano tika rava, kare kotou e anoano i te au akakiteanga ako....
GSAM 302.2“Te inangaro ra te Atu kia akamatakite ia kotou, kia akaapa, kia ako, na roto i te au akakiteanga ako i orongaia mai, e kia tuku ki roto i to kotou manako te puapinga o te tuatua mou o tana tuatua. Kare te au akakiteanga ako i tataia ei oronga mai i te marama ou, ei akamau papu ra ki roto i te ngakau i te au tuatua mou na te Vaerua o te Atua i akaari takere mai.... Kare e tuatua mou ke e apaiia mai, kua akamama ra te Atua, na roto i te au akakiteanga ako, i te au tuatua mou maata i oronga takereia mai, e i tana uaorai ravenga i iki kua tuku aia i te reira ki mua i te iti tangata, kia akaara e kia akamau i te reira ki roto i to ratou manako, kia kore e rauka i tetai tangata tetai ravenga no te akatika iaia uaorai....
GSAM 302.3“Kare te au akakiteanga ako ei akaiti i te tuatua a te Atua, ei akateitei ra i te reira, e ei akaariu i te au manako ki reira, kia akakeuia te katoatoa e te manea e te mama o te tuatua mou.... Naringa te iti tangata e karanga nei e ko ratou te apinga akaperepere takatake a te Atua, i akarongo ki tana au umuumuanga i akatakaia i roto i tana tuatua, kare e au akakiteanga ako takatake e orongaia mai kia akaara ia ratou ki ta ratou angaanga, e kia akamou ki roto i to ratou manako i to ratou tu ara, e to ratou kino maata e matakuia i te kopaeanga i te akarongo ki te tuatua a te Atua.”7
GSAM 302Ture Rua—Te Au Peroveta Mou
GSAM 302.4Kua kite takere tatou e ka tuatua te au peroveta mou katoa kia tau ki te ture a te Atua e te akakiteanga o tana tuatua. Te oronga maira te aposetolo ra ko Ioane i tetai ture ke no te akataka i te apiianga a te au peroveta mou. Te karanga ra aia e: “E aku au akaperepere, auraka e akarongo ki te au vaerua katoa, e tamata ra i te au vaerua, e no te Atua ainei ratou; no te mea e maata te au peroveta pikikaa kua aere atu ki roto i te ao. Na teia e kite ei kotou i te Vaerua o te Atua: te au vaerua katoa e akakite ra e kua tae mai a Iesu Mesia i roto i te kopapa, no te Atua ïa; e te au vaerua katoa kare e akakite e kua tae mai a Iesu Mesia i roto i te kopapa, kare ïa no te Atua. E ko te vaerua teia o te patoi i te Mesia, ta kotou i akarongo e ka tae mai; e tei roto takere aia i te ao i teianei.”8
GSAM 303.1E akara matatio i te tuatua tapu i runga ake nei. Kare te reira e karanga ana e ko tei akakite e “i tae mai ana” a Iesu Mesia “i roto i te kopapa,” mari ra e “kua tae mai aia i roto i te kopapa”; koia oki, e te tae maira aia na roto i tona Vaerua, e te noo ra i roto ia tatou, no to tatou akarongo. Ko teia tikai te tumu o te tuatua mou o te evangelia, “te Mesia i roto ia kotou, te manakonakoanga no te kakā.”9
GSAM 303.2Te tumu apii no te oraanga e kitea i roto i te au tataanga katoa a Mrs. White, ko te anoano kia noo te Mesia i roto ia tatou ei Akaora, me ka tupu tatou ki mua i te mataara ki te rangi. Te apii maira tana au tataanga e ka anoano tatou i te Mesia i te akamataanga, i te openga, e i te au tuatau katoa. Ei akaraanga no teia, e akara tatou ki tana puka, Te Au Takainga ki te Mesia. E maata atu i te anere tausani o taua puka ra i te reo Papaa kua okoia, e e au tausani katoa i roto i te au reo ke e tai ngauru ma varu e neneiia nei te reira. Kua tatau tetai orometua o te Akonoanga Peretipiteriana i taua puka ra, e kua pati aia kia maata atu i te toru anere no te au mema o tona ekalesia e tona au taeake, e kua karanga aia e, “Na tetai tangata tei matau meitaki i te Atu ra ia Iesu Mesia i tata i teia puka.”
GSAM 303Ture Toru—Te Au Peroveta Pikikaa
GSAM 303.3Te oronga maira a Ioane i tetai ture no te kite i te au peroveta pikikaa: “No te ao ratou; no reira ratou e tuatua ai i ta te ao, e te akarongo maira te ao kia ratou.”10 Ka akamerengo te apiianga a te au peroveta pikikaa i te ngakau o te kopapa, kare e akateitei i te mataara o te kopae i toou uaorai anoano e te amo i te satauro. Ka apii te au peroveta pikikaa i “te au mea rekareka,” kare e akateitei i “Tei Tapu o Iseraela.”11 Ko te tangata e tatau i tetai au kapi ua o te au tataanga a Mrs. White, ka kite aia e te arataki ra te reira ki te kopae i toou uaorai anoano e te amo i te satauro, e kare e akamerengo i te ngakau o te ao e to te kopapa.
GSAM 304Ture A—Te Mamae e te Akakoromaki
GSAM 304.1I te kimi maata atu anga i teia tumu tuatua, ka rave tatou, ei ture a, i te au tuatua a te aposetolo ra ko Iakobo: “E aku au taeake, e rave i te au peroveta tei tuatua i te ingoa o te Atu, ei akaraanga no te mamae i te au ati, e no te akakoromaki.”12 Me tatau tatou i te au mea tei tupu ki taua au peroveta taito ra, ka kite tatou e tetai o to ratou au timataanga maata rava, ko te kiteanga ia Iseraela i te kopae, me kore i te patoi, i te au akakiteanga ako taka meitaki i orongaia kia ratou. E apii poto ua i taua au tuatau ra, ka kite vave tatou i te tu o te au peroveta mou e te au peroveta pikikaa. “Te na ko maira te Atu o te au nuku, Auraka e akarongo ki te au tuatua a te au peroveta e tuatua peroveta ra kia kotou; te akariro ra ratou ia kotou ei aronga puapinga kore; te tuatua ra ratou i tetai kiteanga na te peroveta no roto i to ratou uaorai ngakau, kare no roto i te vaa o te Atu.”13
GSAM 304.2Kare tetai mea i roto i te au tataanga a Mrs. White e akariro i te tangata tatau ei tangata puapinga kore; mei ta tetai ra i akakite, “Kua rauka iaku te meitaki maata i te pae vaerua, e au taime kare e rauka i te tatau, no roto mai i te au akakiteanga ako. Kare tikai au e tatau i te reira ma te kore e kite e te akoia ra au no toku iti i te akarongo ki te Atua, toku iti i te akamori, e toku iti i te maroiroi no te akaora i te au tangata.” No reira, e taka ke tikai te tupuanga o te au akakiteanga ako a Mrs. White mei te apiianga a te au peroveta pikikaa, mei ta Ieremia i akataka.
GSAM 304.3Te akakite katoa maira te peroveta kia tatou e akapeea te au peroveta pikikaa i te apii: “Te karanga ua ra ratou ki te aronga e akavaavaa maira iaku e, Kua karanga te Atu e, Ka rauka ia kotou te au; e te karanga ra ratou ki te au tangata katoa e aere ra i te manako o to ratou uaorai ngakau e, Kare e kino e tae mai ki runga ia kotou.”14
GSAM 304.4No te tu o te apiianga a Mrs. White i roto i tana au akakiteanga ako, ka taiku au i teia au tuatua a tetai tangata tatau matatio:
GSAM 304.4“Kua tatau au i tana au akakiteanga ako katoatoa mei te akamataanga e tae ua atu ki te openga, e maata te reira kua tatau putuputu au, e kare rava au i kite i tetai rerenga tuatua viivii i roto i te reira katoatoa, me kore i tetai mea kare i mā tikai e kare i tau ki te tu Kerititiano; kare tetai mea e arataki i te tangata kia akaruke i te Bibilia me kore i te Mesia. I reira ra kua kite au i te au patianga maroiroi rava kia akarongo ki te Atua, kia aroa ia Iesu, kia irinaki ki te Tuatua Tapu, e kia kimi putuputu i roto i te reira. Na te Vaerua o te Atua anake e rauka ai te akakeu i taua pirianga vaitata ki te Atua, taua akamorianga maroiroi, e taua au patianga pakari kia ora i te oraanga tapu.”
GSAM 305.1Te tata maira tetai tangata tei akara matatio i tana au akakiteanga ako mei te akamataanga e:
GSAM 305.1“No te tuatua taka e te pikikaa kore, ma te kore e mataku e te kore e akaperepere i tetai tangata ki mua i tetai, te inangaro nei au kia akakite e kare teia au mea i ngere. Naringa na te au manako akama e te kino e akaaere i teia angaanga, ka ki te ngai o te au akakiteanga ako e kimi oonu ra i te ngakau e te au akoanga tika, i te au tuatua akareka ua. Te tuatua taka meitaki, te ako tika no te au tarevake, te au tuatua aroa e te akamaroiroi no te au tangata mataku e kite ra i to ratou anoano i te Akaora, e no te aronga tarevake e kimi ra ma te akaaka kia akaruke i to ratou au tarevake,—ko teia te au mea maata i roto i tana angaanga. Ko te akakiteanga ako a Mrs. White, i te akaapaanga i te au tarevake o te au tangata e manganui tana i kite i roto i te kiteanga na te peroveta, kua orongaia ma te tiratiratu maata, e kua tupu te meitaki maata rava no te reira.”15
GSAM 305Ture Rima—Ka Tupu te Au Tuatua Peroveta Mou
GSAM 305.2E tuatua ta Mose no te au peroveta mou e te au peroveta pikikaa, tei roto i te pene tai ngauru ma varu o Deuteronomi. Te karanga ra aia e: “Akapeea tatou e kite ei i te tuatua kare te Atu i tuatua mai? Me tuatua tetai peroveta i te ingoa o te Atu, e kare taua mea ra e tupu, e kare e tae mai, ko te tuatua ïa kare te Atu i tuatua mai, na te peroveta ra i tuatua ma te akateitei iaia uaorai; auraka koe e mataku iaia.”16
GSAM 305.3Te kitea katoa ra taua mea ra i roto i teia au tuatua tapu: “Koai tei tuatua, e kua tupu, me kare te Atu i akaue mai?”17 No te peroveta ra ko Samuela kua tuatuaia e, “Te au mea katoa tana e tuatua ra, ka tupu tika ïa.”18 “Kia tupu te tuatua a te peroveta ra, ei reira e kitea ai taua peroveta ra e na te Atu tikai aia i tono mai.”19
GSAM 306.1I teianei kua maata atu i te rima ngauru ma toru mataiti mei te kite muaanga te tangata tata i a Mrs. E. G. White i roto i te kiteanga na te peroveta. I taua au mataiti ra kua oronga mai aia i te au tuatua peroveta e manganui no te au mea ka tupu. E tumu tuatua tetai o taua au perovetaanga ra no te au mea kua tupu takere, e te tupu nei tetai pae, e tei mua ua atu rai tetai pae. No te au tuatua tei tau ki te au mea i topa e te au mea o teianei, kare au i kite i tetai mea kare i tupu. Kua taiku takereia tetai o tana au perovetaanga. Ka akaariia mai tetai atu i roto i te au pene e aru maira, ia tatou e akakite ua atu i to tatou tua.
GSAM 306Ture Ono—Kare te Au Semeio ei Akairo no te Peroveta Mou
GSAM 306.2Kua akapapu mai te au tangata tata no te apii akonoanga e manganui, e kua akakiteia i roto i te au akamaramaanga o te Tuatua Tapu, e ko te akairo o tetai peroveta mou ko te raveanga i te au semeio. Kare rai tatou i kite i tetai ture akapera i roto i te Tuatua Tapu.
GSAM 306.3Me ko te raveanga i te au semeio te akapapuanga o tetai peroveta mou, ka karangaia ïa te “peroveta pikikaa” i taikuia i roto i te Apokalupo 19:20 e e peroveta mou aia; no te mea te tuatuaia ra e, “Kua opuia te manu, e te peroveta pikikaa katoa tei rave i te au semeio ki mua iaia, e kua pikikaa aia i te reira i te aronga tei ariki i te akairo o te manu.” Te tuatua akaouia ra taua mana ra i roto i te Apokalupo 13:14, e te pikikaa ra aia i “te aronga e noo ra i te enua na roto i taua au semeio ra i rauka iaia i te rave ki mua i te aroaro o te manu.” Me taangaanga tatou i teia ture mei te reira, ka tae tatou ki te manako e e peroveta mou katoa a Satani. Te kapikiia ra tetai au vaerua ka rave i tetai angaanga takatake i te ono o te au mate openga e itu ra e, “te au vaerua o te au temoni, e rave ra i te au semeio, e aere atu ra ki te au ariki o te enua e o te ao katoa, kia akaputuputu ia ratou ki te tamaki i taua ra maata o te Atua Mana Katoatoa ra.”20
GSAM 306.4Me ka kitea te akapapuanga o tetai peroveta mou i roto i te au semeio tana e rave i te tuatau kare aia i roto i te kiteanga na te peroveta, e iti ua te au peroveta o te Bibilia ka tau ki taua timataanga ra, me ka akava tikai tatou kia tau ki tei tataia no ta ratou au angaanga. E tika e kua tataia e na tetai o te au peroveta i rave i te au semeio, mei ia Elia, Elisa, e Paulo. Koai ra tei kite i tetai akakiteanga i roto i te Bibilia no te au semeio a Isaia, Ieremia, Daniela, Hosea, Ioela, Amosa, e tetai atu? E au peroveta mou ra ratou na te Atu, e te akaariia ra to ratou tu e te au ture ta te Atu i oronga mai ei tamata i tetai peroveta mou.
GSAM 307.1Me tatau tatou i te akakiteanga a te Tuatua Tapu no Ioane Bapetizo, ka kite meitaki tatou e kare te raveanga i te au semeio ei timataanga no tetai peroveta mou. E peroveta aia, mei tei akaariia i te tuatua peroveta a tona metua tane ra ko Zekaria, i te akakiteanga aia i te kiteanga na te peroveta ta te Atua i oronga mai kiaia no te tamaiti ka anau mai nana: “E ko koe, e te tamaiti, ka karangaia koe e e peroveta na Tei Teitei Rava; no te mea ka aere koe na mua i te aroaro o te Atu kia akateateamamao i tona au mataara.”21 Na to tatou Akaora uaorai i akatika e ko Ioane taua peroveta ra ka akateateamamao i te mataara na mua iaia; no te mea kua karanga aia no Ioane e: “Eaa ra ta kotou i aere atu kia kite? E peroveta ainei? Ae, te karanga atu nei au kia kotou, e maata atu aia i te peroveta. Koia teia tei tataia e, I na, te tono nei au i taku karere na mua i toou aroaro, e nana e akateateamamao i toou mataara na mua ia koe. Te karanga atu nei oki au kia kotou, I rotopu i te aronga i anauia e te vaine, kare e peroveta e maata atu ia Ioane Bapetizo?”22
GSAM 307.2Teia ïa te tuatua taka meitaki a te Akaora e e peroveta a Ioane. E taangaanga tatou i te timataanga o te rave semeio, e e akara i te ka tupu. I roto i te Evangelia i tataia e Ioane, te tangata apii evangelia, teia te au tuatua: “E manganui tei aere atu kiaia [te Mesia] e kua karanga e, Kare a Ioane i rave i tetai semeio; te au mea katoa ra ta Ioane i tuatua no teia tangata, e tuatua mou ïa.”23 Ko teia tuatua anake e rava no te akaapa roa i te manako e ko te akairo o tetai peroveta mou ko te raveanga i te au semeio.
GSAM 307.3Teia ture i orongaia mai i roto i te Deuteronomi 13:1-3, ta tatou e kapiki nei e ko te ture ono i ta tatou tatauanga i teianei, ei paruru ia tatou kia kore e aru ua i tetai mea umere me kore i tetai semeio, kia akara matatio tatou i mua e te arataki ra ainei te reira kia piri vaitata atu ki te Atu, e kia akaatea ke ainei mei iaia. Te akakite maira teia irava kia taangaanga tatou i te au ture katoa, kia akara tikai e te tau ra ainei te reira ki te Atua e tana ture.
GSAM 308.1Te apii maira teia ture ono e me rave tetai tangata pikikaa i tetai semeio, ka kitea atu, me tamata meitakiia te reira, te akarukeanga i te au tuatua mou tapu o te tuatua a te Atua, e te akaakaanga i te turanga tika kia tau ki tetai ngakau e inangaro ra kia kopae i te mataara o te akaruke i toona uaorai anoano. Te akatika ra te Atu kia tu mai taua tangata pikikaa ra, e ko tana aerenga ei timataanga ïa ki te tamaiti mou a te Atua, e oronga ra i tetai tuatau nona kia kimi matatio i te aerenga e te tumu manako o taua tangata rave semeio ra. Te aronga e mou piri ra ki te tuatua a te Atua, kare e rokoia e te rekareka ki taua tangata rave semeio pikikaa ra, ka pakari ra ratou i roto i te Atua no tei tupu kia ratou.
GSAM 308.2I teia au ra kino, i te maataanga te tangata e karanga ra e e “aronga akaora maki na roto i te akarongo,” e “aronga akaora maki na te Atua,” e “aronga akaora maki o te Apii Kite Kerititiano,” e tetai atu, e meitaki kia taangaanga matatio i te au ture a te Tuatua Tapu. Ka anoanoia te au ture a te Atua e te marama o te Vaerua Tapu kia rauka ia tatou i te kite meitaki i te akakoroanga e te tumu manako o tetai o taua “aronga akaora maki” ra, no te ravenga ngaro o ta ratou angaanga; e tetai pae ra, te kopae pu ua ra ratou i te ture a te Atua e tana tuatua mou no teia tuatau. I tetai au taime kua riri maata taua “aronga akaora maki” pikikaa ra mei te au tangata neneva ra, i te taiku ua ia anga te ture a te Atua. Mei te mea e e karere ta te Atu e akakite ra i tana ture tapu, e papu katoa e kare te akakeuanga a te Vaerua Tapu i roto i te au tangata e akakino ra i tana ture, e e tuaru ra mei to ratou aroaro i te aronga e taiku ua i te reira.
GSAM 308Ture Itu—To Ratou Au Ua
GSAM 308.3“E matakite i te au peroveta pikikaa, e aere mai ra kia kotou ma te kakau mamoe, i roto ra e au luko taeae ratou. Na to ratou ua e kite ei kotou ia ratou. E akaputu ainei te tangata i te vine no runga i te rakau taratara, e te suke no runga i te vao taratara? E pera katoa te au rakau meitaki katoa, e ua mai ratou i te ua meitaki; kareka te rakau kino, e ua mai ïa i te ua kino. Kare te rakau meitaki e rauka i te ua mai i te ua kino, e kare oki te rakau kino e rauka i te ua mai i te ua meitaki. Te au rakau katoa kare e ua mai i te ua meitaki, ka tipuia ki raro e ka titiriia ki roto i te ai. No reira, na to ratou ua e kite ei kotou ia ratou.”24
GSAM 309.1Te akatika maira teia au tuatua a to tatou Akaora e ka vai te oronga o te peroveta i te tuatau o te evangelia. Naringa kare e peroveta mou ka piri ki te angaanga, e no tetai tumu kino te au akaarianga peroveta katoatoa, kare ainei aia e karanga e, “E matakite i te au peroveta”? Kua akakite taka meitaki mai aia i te ravenga e kite ei i nga tu tataki tai, e ko te akapapuanga meitaki rava teia e ka vai te oronga o te peroveta mou i roto i te angaanga a te Akapumaana, te Vaerua Tapu, i te akaarianga i “te au mea ka tupu mai” (Ioane 16:13). Teia ture, ta tatou i kapiki e ko te ture itu i ta tatou tatauanga, kare e tarevake. Kare te Mesia i karanga e penei ka kite kotou ia ratou na to ratou ua, kua karanga papu mai ra aia e, “na to ratou ua e kite ei kotou ia ratou.”
GSAM 309.2Te ui nei tatou, Eaa te ua ka kitea i roto i te angaanga o te au oronga mou a te Vaerua o te Atua? Te kitea ra te pauanga i roto i ta Paulo tuatua no te akakoroanga a te Atu i te tukuanga i te au oronga ki roto i te ekalesia: “No reira aia i karanga ai e, I tona kakeanga ki runga ra, kua arataki aia i te aronga tuikaa ei tuikaa nana, e kua oronga i te au oronga ki te tangata.... E kua oronga aia i tetai pae ei aposetolo; e tetai pae ei peroveta; e tetai pae ei apii evangelia; e tetai pae ei tiaki e ei orometua; kia akariroia te aronga tapu ei aronga tika rava, no te angaanga tavini, e no te akatupu i te kopapa o te Mesia; e kia tae tatou ravarai ki te akarongo okotai [“ki roto i te tu okotai,” i te tapa o te kapi], e te kite i te Tamaiti a te Atua, ei tangata tika rava, kia tae ki te aite i te maata o te ki rava o te Mesia.”25
GSAM 309.3E taangaanga i teia ture ki te oronga o te peroveta tei piri ki te karere a te angera toru mei tona akamataanga, e eaa te ka kitea?—Te kite nei tatou e ko te apiianga putuputu i orongaia mai na roto ia Mrs. White, kua arataki ïa ki te tu okotai e te rotai, e ako ra kia “uriuri kapiti,” e kia “piri kapiti,” kia rotai ki te Mesia, e kia rauka i reira te pirianga mou e te tu okotai ki tetai e tetai.
GSAM 310.1Kua tuatua tetai pae o te aronga patoi i teia angaanga ma te aviri e, “Naringa kare te au kiteanga na te peroveta a Mrs. White i rotopu ia kotou, kua parari to kotou angaanga i te tuatau roa i topa.” Te pauia ra e, “E tika te reira; no te mea na roto i taua ravenga ra kua oronga mai te Atu i te ako, te akamatakiteanga, e te marama, e kua akakoreia te au taumaroanga, e kua tupu te angaanga i te meitaki.” No reira, ta ratou i akakoro ei patoi i taua oronga ra, e akakiteanga tikai ïa e ko tona ua, ko te ua o te oronga o te peroveta mou.
GSAM 310.2E ono ngauru mataiti e maata atu te au akaarianga o te oronga o te peroveta na roto ia Mrs. White i tamataia ai ki teia au ture e itu, e i te au mea tataki tai kua tau te reira ki te au umuumuanga o te tuatua peroveta mou.
Notes
- Ephesia 4:11-13. ↩
- Ioela 2:28, 29. ↩
- 1 Tesalonia 5:20, 21. ↩
- Apokalupo 16:14. ↩
- Isaia 8:16-20. ↩
- Koheleta 9:6, 5. ↩
- Te Au Akakiteanga Ako no te Ekalesia, Puka 5, kapi 663-667. ↩
- 1 Ioane 4:1-3. ↩
- Ephesia 3:17; Kolosa 1:27. ↩
- 1 Ioane 4:5. ↩
- Isaia 30:10, 11. ↩
- Iakobo 5:10. ↩
- Ieremia 23:16. ↩
- Irava 17. ↩
- J. N. Andrews, i roto i te Akaraanga e te Karere o Titema, 1867. ↩
- Deuteronomi 18:21, 22. ↩
- Aue 3:37. ↩
- 1 Samuela 9:6. ↩
- Ieremia 28:9. ↩
- Apokalupo 16:14. ↩
- Luka 1:76. ↩
- Luka 7:26-28. ↩
- Ioane 10:41. ↩
- Mataio 7:15-20. ↩
- Ephesia 4:8-13. ↩