Caandaano 28 — Mulyango Uunyina Muntu Uukonzya Kujala
GSAM 462.1“Ndabikka mulyango uujulidwe kunembo lyako, alimwi kunyina muntu uukonzya kuujala; nkaambo uli aamanguzu masyoonto, wabamba ijwi lyangu, alimwi tewakakaka zina lyangu.”1
GSAM 462.2Ngawo mabala aambidwe kuli aabo bali muciimo ca Filadelufiya ca cikombelo ca makani mabotu. Cikombelo eeci ncico cakakula kwiinda mukukambauka kuti kuboola kwa Kristo kuli afwaafwi, naa aabo bakajatisya eezyo nzibakamvwa kujatikizya makani aaya; nkaambo waamba kujatikizya cikombelo ca Saadisi (eeco cakatanguna Filadelufiya cakutobelana) kuti, “Aboobo uyeeye mbowakatambula ambowakamvwa, ujatisye, alimwi weempwe. Aboobo kuti utalindi, ndiyooza kulinduwe mbuli mubbi, alimwi tokooziba ciindi ncendiyooza kulinduwe.”2
GSAM 462.3Aboobo cikombelo ca Saadisi cakalimvwa njiisyo ya kuboola kwa Mwami afwaafwi. Aabo bakajatisya nzibakamvwa bakeendelela mumasimpe ciindi “cibikkilo ca lampu” nocakagwisigwa, alimwi bakaba cikombelo ca Filadelufiya, eeco ncaakaambila kuti, “Nkaambo wabamba ijwi lyangu lya kuumya moyo, andime ndiyookubamba kuciindi ca kusunkwa, eeco ciyooza anyika yoonse kusunka aabo bakkala anyika. Bona, ndilaboola cakufwambaana: jatisya ncojisi, kuti kunyina muntu uutola ngowani yako ya bwami.”3 Aboobo ncikombelo eeci ca Filadelufiya ncaambila kuti, “Ndabikka mulyango uujulidwe kunembo lyako, alimwi kunyina muntu uukonzya kuujala.”
GSAM 462.4Aboobo eeci ncizuminizyo ciyumu ca Magwalo Aasalala cakuti aabo, mukusololelwa kwa Leza, batumwa kucenjezya nyika kujatikizya kuboola kwa Mwami, akulomba bantu kuti balibambile kuswaangana a Leza, balijisi luzyalo lwa Leza lwaalubazu mukubeleka kwabo. Bantu balakonzya kusola kubacinga, kunyonganya milimo yabo, akujala “mulyango wa kwaamba,” pele ijwi lya Leza lilamvwika atala lyaongo lyoonse kuti, “Ndabikka mulyango uujulidwe kunembo lyako.”
GSAM 463Kweendelela kwa Minyaka Iili 74
GSAM 463.1Mumapeeji a bbuku eeli aatangunide twaamba cabufwaafwi kujatikizya minyaka iili 74, kuzwa mu 1831 kusikila mu 1905, katutobela kutalika akukula kwa milumbe ya kuboola kwa Jesu, ikapati Mulumbe wa Mungelo Watatu. Twatondezya mbuli Mulumbe ooyu, kuzwa mukutazibikwa abucete, mbowaendelela amanguzu aakufwambaana akuyungizika mwaka amwaka, kusikila ulijisi milimo ya kutumwa iizyungulukide nyika. Masimpe, taakakula boobu akaambo kakuti Mulumbe ngukondelezya myoyo yanyama; nkaambo kunembo lyawo kujisi Nsabata ya Mwami, eeyo kubamba kwayo kuleta cisinkano cilemu, kakuyandika kuleka makwebo abanyika abuzuba bwa mvwiki bantu nobabelekesya kapati milimo yaanyika. Alimwi taakakula akaambo kakutaba akukazyigwa; nkaambo wakaswaangana akukazyigwa kuzwa kumatalikilo, alimwi nkukazyigwa kuyumu kapati kuzwa aanze, akuyungizya kumapenzi aaletwa abantu batalyaabide kuli Leza aabo bakaba mukati kesu kwaciindi cisyoonto. Kujatikizya ciimo cakaletwa amano amilimo ya basinkondoma bakunze, tulakonzya kwaamba kabotu mumabala a Davida, mulembi wa ntembauzyo, kuti, “Kuti Mwami taakali kulubazu lwesu, lino Israyeli aambe kuti: kuti Mwami taakali kulubazu lwesu, ciindi bantu nobakatunyampukila, balakali kutumina katuponide, ciindi bukali bwabo nobwakatupikila; eelyo maanzi alakasika atala lyesu, mulonga ulakali kwiinda atala lya buumi bwesu; eelyo maanzi aafungumuka alakasika atala lya buumi bwesu. Aatembaulwe Mwami, uutakatupeya kuba cilyo ca meno aabo. Buumi bwesu bwafutuka mbuli kayuni kuzwa muciiyo ca basyiiyi ba tuyuni: ciiyo catyoka, alimwi twafutuka. Lugwasyo lwesu luli muzina lya Mwami, ooyo wakalenga julu anyika.”4
GSAM 464Lugwasyo Muli Mwami
GSAM 464.1Mwami waamba kuti wabikka kunembo lya bantu bakwe “mulyango uujulidwe, alimwi kunyina muntu uukonzya kuujala.” Aboobo tacigambyi kuti Mulumbe waendelela cakutazungazunga. NguMulumbe wa Leza kubantu, alimwi weelede kuzunda. Muli Ciyubunuzyo 7:2 mulimo wa kubambila bantu kuti bakaiminine ciindi buzuba bupati bwa bukali bwa Leza nobuyooza utondezyegwa amungelo “uukkwela kuzwa kujwe,” naa, mbuli bamwi mbobasandulula, “mbuli kutuluka kwa zuba.” Bona kuca kwa buzuba—citaanguna ncakuti mumuni ulabonya kujwe; eelyo uyayungizika akumweka kwiingi kusikila zuba lyoonse lilabonya kabotu. “Mwami wa Buzuba” naakkwela kusikila atala kapati, mumuni, kupya, amanguzu aakwe zilayungizika kumweka.
GSAM 464.2Masimpe, mbubwenya oobu mbowaendelela Mulumbe wa Mungelo Watatu kuzwa mu 1848, ciindi masimpe aabumba Mulumbe naakasololekwa cakusalala, alimwi kuzwa ciindi eeco twatondezya kukula kumweka akutazungazunga, ikugambya kapati. Tatukonzyi kusandulula eeci munzila iimbi kunze lyakuti Mwami ulazuzikizya ijwi lyakwe kuli aabo, muciindi eeci lufutuko lwakwe noluli afwaafwi, “babamba Nsabata kuti bataiisofwayi,”5 alimwi bakkasya maulu aabo kutacita nzibayanda beene abuzuba bwa Leza busalala, aboobo kwiinda “mu Lusyomo lwa Jesu,” mbuli mbokwaambidwe mu Mulumbe wa Mungelo Watatu wa Ciyubunuzyo 14, kababamba “Milawo ya Leza” yoonse. Kujatikizya aabo Mwami wakaamba kwiinda mumusyinsyimi Isaya kuti, “Eelyo mumuni wako uyoomweka mbuli kuca kwa buzuba, alimwi buumi bwako bubotu buyooboola cakufwambaana; alimwi bululami bwako [“Mwami bululami bwesu.” Jeremiya 23:6] buyookutanguna; alimwi bulemu bwa Mwami buyookubamba kunuma kwako.”6 Atulijisi zisinizyo zili boobu, ino tulakonzya kulindila cimbi kunze lyakuti mulimo uyoozunda? “Kuti Leza uli kulubazu lwesu, nguni uukonzya kutukazya?”
GSAM 464Ino Aaba Balakonzya Buti Kweendelela?
GSAM 464.3Katubona ciimo ca mu 1846, ciindi Baalu Joseph Bates nobakatalika kulemba bbuku eelyo lyakutaanguna, lyakutaanguna ncobeni kulembwa a BaAdventist ba Nsabata ya Musanu Abili kujatikizya Nsabata, kabajisi masenti aali 12½ mbubonya mbuli mali oonse ngobakajisi munyika, alimwi kabayandikana kuabelesya buzuba bwabo bwakutaanguna bwa kulemba kabutanamanina; akubona alimwi Baalu James White kabasintaula kapepa kabo kakutaanguna, Masimpe Aali Kuno, amali ngobakajana kwiinda mukutema bwizu mumunda wa bwizu bwa kuyumya, kabatumizya kapepa eeko cakutalipilwa kuli boonse ibakali kuyanda kubala, kabakaamba kuti nguMulumbe wakali kuyoosika kumamanino aanyika,—katubona matalikilo aaya masyoonto, muntu ulakonzya kubuzya mumabala a bantu ba mumazuba aa Amosi kuti, “Jakobo uyoobuka kwiinda muli nguni? Nkaambo uli musyoonto.”7 Katuswaanganya eeco aciimo ca mu 1905, ciindi kubambulula masimpe aa Mulumbe nokucitwa mu Mang'anda aa Kulemba aali makumi obilo, aali mumabazu aanyika aandeene, kanji kabelekesya amanguzu aayo oonse kuti akonzye kupa bantu mabbuku ngobayanda kubala, tulakonzya kwaamba ncobeni kuti, Amubone, “mulyango uujulidwe” uutanjalilwa amuntu kusikila lino.
GSAM 465.1Kujatikizya aabo baaciindi bakali kuyeeya kuti mulimo tawukweendelela, tulakonzya kwaamba mumabala ngamusyinsyimi Zekariya ngaakabelesya kukalipila aabo bakayeeya kukasya mulimo wa Leza mukuyakulula Jerusalemu kuti, “Nguni wakanyoosya buzuba bwa zintu zisyoonto?”8 Kujatikizya zintu zyakali kulibonya mbuli malundu aa mapenzi munzila yabo, Mwami wakaamba kwiinda mumusyinsyimi kuti,—
GSAM 465Lundu Lyacitwa Kuba Lubanda
GSAM 465.2“Nduwe ani, nduwe lundu lupati? Kunembo lya Zerubabele uyooba lubanda; alimwi uyoogwisya ibbwe lyakujulu kabakuwa, kabaamba kuti, Luzyalo, luzyalo alube kulindilyo.”9 Mbubwenya oobu mbocakaba mumulimo wa Mulumbe wa Mungelo Watatu, alimwi mbociyooba kusikila “ibbwe lyakujulu” lyaletwa, naa, mumabala aambi, kusikila mulimo wamanizigwa.
GSAM 465.3Amubone bantu basyoonto ba mu 1846, bacete mumali, bacete munzila zyoonse kunze lya lusyomo muli Leza abuvubi bwa masimpe, alimwi mubone mbowakula mulimo wabo. Amuyeeye zibelesyo zijisi lino, mabbuku oonse aabambidwe, aasandulwidwe, akusintaulwa mundimi zyaanyika zisiyene-siyene, alimwi bamyaanda ba Bavangeli ba Mabbuku kabaatola mabbuku aaya mumizi ya bantu, aali amutengo wa $400,000 mwaka amwaka. Kuti cilongezyo ca Leza cazumanana kuba amulimo, tulakonzya kulindila kuzunda. Atulijisi zibelesyo a milimo eeyi iiyungizigwa mwezi amwezi, atusyoma muli Kristo, tatweelede kulindila cimbi kunze lyaceeco Solomoni ncaakaimba kujatikizya cikombelo ca Leza nocakazwa muciimo caco camunkanda, “kaciyegeme kubboko lya Muyandwa waco,” ciindi naacitondezya kacibona aanze, “cili cibotu mbuli mwezi, cituuba mbuli zuba, alimwi ciyoosya mbuli nkamu yabasikalumamba iijisi mbendela.”10
GSAM 466Kugwasyigwa a Cipego ca Busyinsyimi
GSAM 466.1Tatwabona buyo kuti kusololela kwa Mwami kwajula nzila ya kusanzya masimpe, alimwi kuti cilongezyo cakwe cimweka caba akusola kutobela nzila zya kusololela kwakwe, pele mukutalika akukula kwa Mulumbe wa Mungelo Watatu waamba abantu bakwe kwiinda mu Cipego ca Busyinsyimi. Eeci tacili ciyubunuzyo cipya citola busena bwa Bbaibbele, alimwi tacili munzila iinyonganya njiisyo zya Magwalo, pele ncakutondezya ooko, muciindi eeci, nkokuli ntenda ya kuleka buubauba bwa makani mabotu aa Kristo, ooko bantu nkobajisi ntenda ya kuzwaisigwa abucito bwa ciindi eeci, kabakkutila kulibonya buyo mbuli bantu balemeka Leza pele kabatajisi manguzu aako.
GSAM 466.2Katusandulula makani aaya kwiinda mucikozyanyo11 ca basyinsyimi bakala, eeco Mwami ncaakatupa kuba omwe wa milawo ya kweezya kulibonya kwa mipego iili boobu, tujana twaambo tuli ooto tupandulula ciiyo mipego eeyi nciyandikana lino mbuli muciindi eeco; nkokuti, muciindi cimwi acimwi kuli ntenda ya kuzwaisigwa munzila ya masimpe anjiisyo a zicito zya ciindi eeco iizyenezyene. Mwaapostolo Paulo, naakaamba kujatikizya kulibonya kwa mipego eeyo Mwami njaakabikka mucikombelo, waamba kuti njakuti “ibambisye basalala, icite mulimo wa bukambausi, iyake mubili wa Kristo; kusikila toonse tukakamantane mulusyomo amukuzyiba Mwana wa Leza, akuba muntu uumaninide kukula, kusika kucipimyo ca kukula kwakuzula kwa Kristo; kuti kuzwa lino tutacabi bana, ibasunkunyigwa kuno akuno, akutolwa aamuuwo uuli woonse wa njiisyo, mukucenjela kwabantu, amumano aakubbeja, aabo mbobajisi kubambila kusyengezya; pele katwaamba masimpe muluyando, tukule muli nguwe muzintu zyoonse, nguwe Mutwe, Kristo: kuzwa kulinguwe mubili woonse, uuswaanganizyidwe kabotu akujatankanya kwiinda kuli ceeco cipanzi cimwi acimwi ncicipa, mbuli mulimo uubeleka mumanguzu kweelana acipimyo ca cipanzi cimwi acimwi, ulakula akuliyaka wini muluyando.”12
GSAM 467.1Kukazya kulipo lino kujatikizya kulibonya kwa Cipego ca Busyinsyimi kulakali kukonzya kwaambwa amanguzu aayo munsiku zyakaindi; nkokuti, tujisi Magwalo, aboobo tatuyandiki mipego iili boobu. Pele, ngawo Magwalo aaya aatwambila kuti Kristo wakabikka mipego eeyi mucikombelo kuti icite mulimo wayo kusikila “ceeco cimaninide [ciimo cimaninide] caboola,” alimwi kuti cikombelo ceelede kuti “citaceyelelwi acipego naaciba comwe, kaculindila kuboola kwa Mwami wesu Jesu Kristo.”13
GSAM 467Ino Tubayandilanzi Basyinsyimi?
GSAM 467.2Bantu bakaindi balakali kuyeeya kuti balijisi mulawo wa Leza ujatikizya buntu uulembedwe amunwe wakwe mwini atubwe tutebelene; kuti balijisi milawo, mpingu, anjiisyo eeyo yakaambwa kuli Musa kuzwa kumulomo wa Leza, alimwi yakalembwa cakubikkila maano; ino ncinzi cimbi cakali kuyandika? Pele, nokuba kabajisi masimpe aaya oonse mabotu kapati, Leza wakayanda kwaamba kulimbabo “muciindi cisiyene-siyene amunzila zisiyene-siyene kwiinda mubasyinsyimi bakwe basalala.”
GSAM 467.3Tujana kuti Bukamboni bwakaambwa abasyinsyimi basiyene-siyene, mbuli Isaya, Jeremiya, Ezekieli, Daniele, Hoseya, abambi, boonse bakali kuyiisya njiisyo mpati iili ooyo kujatikizya kumvwida Leza; pele musyinsyimi omwe aumwi wakalijisi kukalipila kwakwe kwalo kubantu ba muciindi cakwe, akaambo kakuti bakali kukonzya kuzwaisigwa kumilawo misalala iili kabotu kwiinda muzilengwa zyakali zyenezyene muciindi busyinsyimi nobwakapegwa.
GSAM 468Kuyandika kwa Mipego
GSAM 468.1Nokuba kulakonzya kwaambwa kuti tujisi njiisyo mbotu kapati ya Magwalo aa Cizuminano Cakaindi, alimwi, akuyungizya kuliyo, mabala aa Mufutuli wesu mwini, aa baapostolo, ino tulayandilanzi mumuni uumbi? Masimpe aasyala aakuti ngabo baapostolo aaba basalala bakatondezya mazuba aakumamanino, eelyo “nociyooza ziindi ziyumu,” alimwi bantu nobali “kulibonya mbuli bantu balemeka Leza, pele kabakaka manguzu aako,” akuyungizya kutwambila kuti “bamwi bayoosiyasiya lusyomo, kabaswiilila myuuya iisyengezya anjiisyo zya madimona.”
GSAM 468.2Akaambo ka zyoonse eezi, bantu aabo Paulo mbaamba naalembela Batesalonika, aabo batajisi kuba mumudima, kuti buzuba bwa Kristo bubajane mbuli mubbi, pele ibayooba bana ba mumuni, balasungwa kuti “beezye zintu zyoonse” kujatikizya “busyinsyimi,” alimwi kuti “bajatisye ceeco cibotu.”14 Eeci cili mbuli kubaambila kuti bantu aabo bali kulindila kuboola kwa Mwami Jesu Kristo, alimwi kumamanino ibayoojanika balibambide buzuba oobo, bayooba akulibonya “kubotu,” kwamasimpe kwa Cipego ca Busyinsyimi mukati kabo.
GSAM 468Zitondezyo zya Mamanino
GSAM 468.3Tuli muciindi eeco zitondezyo nzyazyula kumbali zyoonse kuti buzuba bwa Mwami buli afwaafwi. Tuli muciindi ncobeni bantu nobakeelede kubuka ibabamba milawo yoonse, alimwi ibali “akuba a Bukamboni bwa Jesu”15—“Muuya wa Busyinsyimi.”16 Ino tujane nzi? Kuti muminyaka iili makumi aali cisambomwe yainda bantu bali boobu babuka, kabajisi Mulumbe uuli boobu ncobeni, alimwi Cipego ca Busyinsyimi calibonya mukati kabo. Katweezya Cipego mbocilibonya kwiinda muli Mrs. E. G. White amilawo ya Bbaibbele, twabona kuti cilazunda kweenzyegwa muzintu zyoonse. Kuzwa kumatalikilo kusikila kumamanino, mumagwalo oonse aa Mrs. White, takujanika naakaba mulaini omwe uuzumizya cibi nokuba cisyoonto, naa uuzumizya kuleka ijwi lya Leza nokuba munzila nsyoonto kapati. Magwalo aaya taakwe nokakalibikka atala lya Bbaibbele, pele azumanana kusunga bantu kuti balangisisye ijwi lya Leza cakubikkila maano kapati, kabalitondezya mbuli mulawo mupati uuyoozyanwa milandu yesu mulubeta lwakumamanino. Mumagwalo aakwe Kristo ulinyampwilidwe kunembo lyesu mbuli cikozyanyo cilikke ncotweelede kutobela. Munzila imweka kapati utubikidwe kunembo mbuli syeembelo lyesu lyalo lya kuzunda kuno, buliyo bwesu bwalo kubukali buza, zina lyalo anzila njotukonzya kufutukilwa.
GSAM 469Bukamboni bwa Muntu Uubazi
GSAM 469.1Kujatikizya Mrs. White ambuli mulimo wabo mbubede, aatobela ngaaya, aakalembwa mu 1877 amuntu wakali kubazi, iwakalangisisya mulimo wabo kwaminyaka minji; alimwi kwiinda kwakweenzyegwa kwaminyaka iisika ku 53, minyaka ya kulangisisya cakubikkila maano, ndilazuminana cakumaninina amuzeezo uuli woonse waambidwe mumo:—
GSAM 469.2“Kujatikizya buntu bwa Bunakristo bwa Mukaintu White, ndilalomba kwaamba kuti ndiyeeya kuti ndilizi cimwi kujatikizya makani aaya. Ndamuzi kwaminyaka iili kkumi alusanu aatatu,—kwiinda citikaati ca lyashi lya bantu besu. Ndakali mumukwasyi wabo kanji-kanji, zimwi ziindi masondo aamwi akumaninina. Babo bakali mung'anda yesu amumukwasyi wesu kanji. Ndeenda ambabo afwaafwi mumasena oonse; ndakali ambabo katuli toike akati ka bantu banji, mumubungano akunze lya mubungano, alimwi ndalijisi ciindi cibotu kapati ca kuzyiba cimwi kujatikizya buumi, buntu, amuuya wa Mukwesu a Mukaintu White. Mbuli mukambausi, ndayandikana kubeleka abantu bamitundu yoonse, abuntu bwamitundu yoonse, kusikila ndiyeeya kuti ndilakonzya kusala cimwi kujatikizya muntu mbwabede, ikapati kwiinda minyaka ya kuzyibana kapati.
GSAM 470.1“Ndilizi Mukaintu White kuti mukaintu uulicesya, uutalilumbi, uujisi moyo mubotu, alimwi uulemekeka. Buntu oobu bwabo tabuli bwakulibonya buyo naa bwakusumpulwa buyo, pele bulazwa cakusalala acakuuya kubuntu bwabo bwakuzwa mukuzyalwa. Tabalilyumyi, tabaliboni kuba balulami, alimwi tabaliboni kuba bapati mbuli bantu ibazwide bukombi butajisi maano mbobacita lyoonse. Ndakaswaangana kanji abantu bali boobo, alimwi ndabajana lyoonse kabazwide kulilumba, kabazwide kulitukumuna, kabafwambaanina kwaamba mizeezo yabo, kabalumba busalali bwabo, azimbi zili boobo, pele lyoonse ndabajana Mukaintu White kabatalibede boobo.
GSAM 470Mulongwe wa Bacete
GSAM 470.2“Muntu uuli woonse, nokuba mucete kapati alimwi uutalilemeki, ulakonzya kuya kulimbabo cakutasinikizigwa kukalomba lulayo akuumyigwa moyo kakunyina kukakkwa. Lyoonse balalanganya aabo bayandikana lugwasyo, aabo batajisi cintu, alimwi aabo bapenga, kababapa nzibayandika akubaambilila.
GSAM 470.3“Nsinazyibana amuntu uumbi uujisi kuyoowa Leza kunembo lyakwe lyoonse mbuli nguwe. Kunyina cintu citandikwa kakunyina kupaila Leza canguzu. Ulangisisya ijwi lya Leza cakubikkila maano alimwi lyoonse. Ndamvwa Mukaintu White kabaamba zyaanda zyaziindi, ndabala Bukamboni bwabo boonse kuzwa kumatalikilo kusikila kumamanino, bupondo bwabwo ziindi zinji, alimwi nsikonzyi kujana naakaba kaambo komwe ka bubi, naa cintu citalisalali alimwi citali ca Bunakristo ncobeni; kunyina cigwisya bantu ku Bbaibbele akuli Kristo; pele ooko ndijana kulomba canguzu kapati kuti bantu bamvwide Leza, bayande Jesu, basyome Magwalo, alimwi baalangisisye lyoonse. Ndajana lugwasyo lupati lwakumuuya, ziindi zitabaliki, kuzwa mu Bukamboni. Masimpe, nsinabubala kakunyina kulimvwa ndakalipilwa akaambo kakuti ndiceya lusyomo muli Leza, ndiceya kulyaaba, alimwi ndiceya kusolekesya mukufutula bantu. Kuti ndijisi kukonzya kusala, naa kumvwisisisya kwakumuuya, ndaamba kuti Bukamboni buli aamuuya umwi anjiisyo iili ooyo iili mu Magwalo.
GSAM 470.4“Kwaminyaka iili makumi otatwe [lino tulakonzya kwaamba kuti minyaka iili makumi aali cisambomwe] Bukamboni oobu bwasyomwa akubalwa mukati ka bantu besu. Ino bwabacita buti? Sena bwabagwisya kumulawo wa Leza? Sena bwabacitisa kuleka lusyomo muli Kristo? Sena bwabacitisa kutaya Bbaibbele? Sena bwabacitisa kuba bantu babi, batajisi buntu bubotu? Ndilizi kuti balakonzya kweezanisigwa kabotu acikombelo ca Bunakristo cimbi cili coonse.
GSAM 471.1“Cintu comwe ncondabona ncakuti aabo bakazya canguzu kapati Mibono ya Musyinsyimi ya Mukaintu White balazumina kuti bali Munakristo. Mbuli mbobakonzya kuzumina eeci tandizi pe. Balasola kucibikka kabotu kwiinda mukwaamba kuti balisyeengezyedwe. Tabakonzyi kutondezya naakaba kabala komwe mubuumi bwabo boonse, naa kaambo ka bubi mumagwalo aabo oonse. Beelede kuzumina kuti bupondo bwamagwalo aabo buli bubotu kapati, alimwi kuti uuli woonse uunga waponena zyoonse nzibaamba uunga waba Munakristo mubotu, uusyoma kuti uyoonjila kujulu. Eeci cilagambya kapati, kuti naa bali cibelesyo ca Dyabbulosi, cakupepegwa a Saatani, naa kuti magwalo aabo aajisi bubi naa ngamizeezo yabeene iiteendeleli.”
GSAM 471Batazibani Abalo Balapa Bukamboni Kujatikizya Magwalo
GSAM 471.2Mapepa esu aabambululwa ciindi aciindi aajisi magwalo aa Mrs. White naatumizigwa, alayandwa aabo balicesya kapati, bayoowa Leza, alimwi balyaabide. Kabaamba kujatikizya nzibabala, baamba kuti, “Tulayandisya ikapati magwalo aa Mrs. White. Alatondezya nzila yakucita, alimwi aazwide njiisyo iikonzya kutola muntu afwaafwi a Mwami, akumucitisa kulicesya, kuyoowa Leza, akulyaaba kwiingi. Magwalo aaya alikozyenie kapati anjiisyo ya Magwalo Aasalala cakuti notubala kuyeeyeka kuti Mrs. White beelede kuba bapepegwa kulemba mbuli mbobalemba.” Mbobo Bukamboni bwa bantu banji ibalembelana ababelesi besu batumwa, aabo batanaamvwa naakaba kuti mizeezo ya Mrs. White itambulwa mu Mubono wa Musyinsyimi uusalala.
GSAM 471Kukazyigwa Nkukuzwa
GSAM 471.3Atulibonena mbuli cipego eeci mbocabelekela bantu, mubuzo ulabuka wakuti, Ino nkuli akuti nkaambonzi kukazya kwakabukila kulibonya kwa cipego eeci? Alimwi ncinzi cacitikila aabo bakazya? Ndakalangisisya makani aaya cakubikkila maano kuzwa mu 1852, ndajana kuti bupondo bwa kukazya kulibonya kwa cipego eeci kwazwa kuli aabo bakakalipilwa akaambo ka kuceya mubuntu, zilengwa zibi, naa nzila imwi iitali kabotu mubuumi bwabo. Banji ba bakakalipilwa balakakaka kuti tabali babi mbuli Bukamboni mbobubatondezya, alimwi bakali kuyanda kutondezya kuti balakonzya kujatisya masimpe nokuba batobela nzila iisyene alulayo ndubakapegwa. Kwiinda kwaciindi kwatondezya kuti banji kapati ba bali boobu bakaka lusyomo lwabo akusiya mukwasyi wesu cakumaninina. Bamwi babona kubisya kwabo, alimwi bajatisya masimpe canguzu kwiinda kale. Mubuzo ulabuka wakuti, Kuti aabo bakazya cipego eeci basololelwa a Mwami, ino nzi ncobaluzyila manguzu aakumuuya, akuvwunduka kuzwa kuli Leza? Mulawo wa Mufutuli wesu ngwakuti cisamu ceelede kuzyibikwa amuceelo waco. Waamba canguzu kapati kuti “cisamu cibi tacikonzyi kuzyala muceelo mubotu.”
GSAM 472Kukakilwa kwa Bakazya
GSAM 472.1Tulayeeya ziindi bantu nobakabambika kukazya Bukamboni bwa Mrs. White, kabazumizya kuti milimo yabo iyookweendelela kapati nobayootala kuleka Bukamboni. Pele, bakakilwa cakumaninina kuzuzikizya zisyeembelo zyabo. Kwiinda minyaka ya kulwana, tabatondezya bukamboni bwiingi bwa kusanzya masimpe aa Nsabata kunembo lyaanyika kwiinda bantu bali mbuli mbabo mbobakacita minyaka iili 49 yainda. Kuti mulimo wabo ngomulimo wa Mwami mwini, ino nzi Mulumbe wabo ncoutakakula kwiinda oobo?
GSAM 472Ino Kuzunda Kuli Kuli?
GSAM 472.2Alimwi, notulanga Mulumbe ooyo uukambauka Milawo ya Leza a Lusyomo lwa Jesu kunyika,—Mulumbe uulijisi kulibonya oku kwa Cipego ca Busyinsyimi, amalayo aaco, njiisyo, akukalipila,—tubona kuti waendelela cakusinizya akutazungazunga kuzwa kumatalikilo aawo kusikila lino. Kwiinda mukuswiilila malayo aa Mwami kwiinda mucipego eeco, akweenda kunembo mumanguzu aa Mwami, Mulumbe, mbuli mbotwatondezya, wazyunguluka nyika, alimwi ulafwambaana kusika kuli “cisi coonse, amukowa, alulimi, abantu.”
GSAM 473.1Kujatikizya kweendelela kwawo muciindi cainda tulakonzya kwaamba kuti, ijwi lya Leza lyasinizyigwa muli ceeco ncaakaamba kuti, “Takwe cibelesyo ca nkondo cibambidwe kukulwisya ciyoozunda.” Masimpe, janza lya Leza lyalibonya mukuzunda kwakaba akutalika akukula kwa Kweenda Kupati kwa Kuboola kwa Jesu kusikila lino, alimwi kujatikizya ciindi ciza tusyoma kuzuzikizigwa kusyomeka kwa jwi lyakwe lyakuti, “Ndabikka mulyango uujulidwe kunembo lyako, alimwi kunyina muntu uukonzya kuujala.” Mulusyomo oolu tulakonzya kwiimba cakusinizya koonse kuti:—
Notes
- Ciyubunuzyo 3:8. ↩
- Ciyubunuzyo 3:3. ↩
- Ciyubunuzyo 3:10, 11. ↩
- Intembauzyo 124:1-8. ↩
- Isaya 56:1, 2. ↩
- Isaya 58:8, 13. ↩
- Amosi 7:2. ↩
- Zekariya 4:10. ↩
- Zekariya 4:7. ↩
- Lwiimbo lwa Solomoni 6:10. ↩
- Jakobo 5:10. ↩
- Baefeso 4:12-16. ↩
- 1 Bakorinto 1:6, 7. ↩
- 1 Batesalonika 5:5, 20, 21. ↩
- Ciyubunuzyo 12:17. ↩
- Ciyubunuzyo 19:10. ↩