Qallta Aru
GSAM 3.1Jaqinakan amparapanxa walja aski pankanakaw utjxi, ukat mayampi mä pankar yapxatañajataki pampachasiñajax akawa: aka laphi taypinakanxa Adventistanakata, juk'ampisa Paqallqu uru Adventistanakata walja yänakwa qhanañcht'ta, uka yänakax janipuniw nayrax akham uñacht'ayatakänti jaqinakaruxa. Ukat sipansa, qhipa maranakan aka irnaqäwir mantapki uka waljanixa, uka aytat yänak jan uñjapkän ukaxa, aka luratanakata ukat sarnaqäwinakata nayra irnaqirinakat mä sarnaqäwi ch'amampi mayipxitu. 1843 ukat 1844 maranakan jutäw sarnaqäwimp uñt'atäkasina, ukat 1849 marana, enero phaxsit payïr urutpach, aka yatichäwi yatiyasina, nayraqat mä Adventista ukham, ukat 1852 maratsti mä Paqallqu uru Adventista ukhamarjama, nayatakix mä kusisiñawa “kunatix uñjta ukat ist'ta uk arsuña”.
GSAM 3.2Adventista sarnaqäwita mä qhanañchäwi uñacht'ayawaytwa, ukax 1831 marat 1844 marakamax akapachan taqi yatiqata markanakaru ch'iqintäna.
GSAM 3.31845 maratpachax yaqha Adventista tamanakaw utjawayi, jupanakasti Criston jak'a jutawipat yatiyapxatayna, ukat jichhakamax yatiyasipkakiwa. Taqi uka tamanakar qatxatañat sipansa, nayan amtawaxa, juk'a jayampi, Paqallqu uru Adventistanakan qalltawipa ukhamaraki jilxatawipa qhanañchañawa, juk'ampisa uka irnaqäwinakar amuyt'ayasa, kawkirinakati Diosan apnaqäwipan, pisiñat ukhamaraki jisk'a qalltawinakat, mä markar jilxattayañataki yanapt'awayapki, khitinakati, niya patak waranqakïpkchisa, yaqhipa uñisirinakapax akham sapxiwa, “Jupanakan ch'amampi munasiñampi irnaqatap uñjasaxa, jaqix amuyaspawa pä millón jaqinakäpkaspa.”
GSAM 3.4Paqallqu uru Adventistanakan nayra sarnaqäwipat juk'ak yatipki ukanakasa yatipxiwa, 1845 maratpachax Mama E. G. White jupax aka sarnaqäwirux wali uñt'atjamaw arxatirïnxa, arst'irjama ukhamarak qillqirjama. Jupanakax ukhamarak yatipxiwa, jupan irnaqäwipamp chikax mayja lurañanaka, jan ukax churanakaw utjawayi. Nayan saminchäwijaw phisqa tunka kuti jak'an uñjañax ukhamarak aka churan irnaqäwip uñjasiñax. Aka qillqatanakanxa, Mama White-an niya pä tunk suxtani jutïrit qhana yatiyäwinakapa uñacht'ayawaytwa, ukasti wali chiqapar phuqhasitayna.
GSAM 4.1Nayan uñjatanakajat sipansa, yaqha uñjirinakan arunakapwa uñacht'ayawayta, jupanakan uñjatanakapat arsuñapataki. Ukham chiqanakaxa, chiqap liyirintakixa, juk'ampi ch'amanïñapawa, janipuni ukham pachanakan utjirinakan jan amuyt'ata arunakapata sipansa.
GSAM 4.2Aka irnaqäwix liyirinakar katuyt'ta, Diosan bendicionapampix aka qillqatanak liyt'añax walja chuymanakan Criston thakhip jach'anchayañapatakiw suyä, ukat taqinin liyt'kasax Tesalonicenses markaru Pablox arst'käna uka arunakap amtañap suyt'ä: “Taqi kun yant'apxam; kunatix askïki ukx katxarupxam.”
GSAM -J. N. Loughborough.
GSAM -Mountain View, California, Mayo phaxsit 1 uru, 1905 mara.