Adventist Pioneer
Library
aplib.orgLibrary
Table of Contents
01 / 31
01 / 31

Obugerya

John Norton Loughborough

GSAM 3.1Ebitabu binene eby'omugaso byamabiribya omu byala by'abandu; nikwa ekikaleka ngongerako ekindi ni kino: omu syopapula sino ngakakania emyatsi minene eyihambire oku Balindiriri b'eryasa lya Kristo, kwilaba oku Balindiriri b'eryasa lya Kristo abakateya ekiro ky'akalinda, eyitasangawa iyabirihirwa embere sy'abandu omu nzira eyi. N'eryongerako, abanenene abangira omu mubiri ono omu birimo eby'enyuma, abatetsilangira ebyo bikakanibawa hano, babirisaba kutsibu bati abo abatsuka omubiri embere babatondogolere ebyabya n'ebyo balabamo. Nalangira Omukukyo w'eryasa lya Kristo omo 1843 n'omo 1844; kandi erilwa oko biro 2 by'omukera w'erimbere omo 1849 nabirirangirira engangirirya eyi, erimbere ng'Omulindiriri w'eryasa lya Kristo, n'erilwa omo 1852 ng'Omulindiriri w'eryasa lya Kristo oyukateya ekiro ky'akalinda. Busana n'ekyo ngakayowa obutseme eribuga “ebyo nabirilangira n'erihulika.”

GSAM 3.2Nabirisaka omugambo oyuhambire oko Mukukyo w'eryasa lya Kristo, owalandagana omo buli ihanga ery'omu kihugo eryabya iryabirirengayo omu bwenge, erilwa omo 1831 erihika omo 1844.

GSAM 3.3Erilwa omo 1845 habiribyaho ebindi bitunga by'Abalindiriri b'eryasa lya Kristo ebyabirirangirira, kandi ebikinarangirira, biti eryasa lya Kristo liri hakuhi. Sinabya n'ekilubiririwa ky'eritondogola ebitunga ebyo byosi; nikwa nabya n'eky'erikania ndeke oko nzuko n'erikula ly'Abalindiriri b'eryasa lya Kristo abakateya ekiro ky'akalinda. Ngakakangania kwilaba esyonzira esyo Nyamuhanga akolesya omw'iteya liwe erikulyamwo, erilwa omu buteke n'omu nzuko nyike, abandu abo, n'omu bwanabya ibabya ng'abandu 100,000 basa, abandi oku bakahakanabo babugaho bati: “Omw'ilangira akagala n'omuhati ebyo bakakolesaya omu mubiri, omundu angakania ati bali 2,000,000.”

GSAM 3.4N'abo abasi emyatsi mike y'omugambo w'Abalindiriri b'eryasa lya Kristo abakateya ekiro ky'akalinda basi bati erilwa omo 1845 Omugole E. G. White abiribya n'omwanya munene omu mukukyo ono, ng'omukaniriri kandi ng'omusaki. Basi kandi bati omu mubiri wuwe mubiribyamo emikolere ey'engabane, kutse esyongabane. Nabiribana olukengerwa lw'eribya halya n'erilangira emikolere y'ongabane eyi ng'engendo 50. Omu syopapula sino nabirikangania obuminyereri ng'obwa 26 obwatulibawa ndeke n'Omugole White, obwabiribererera kwenene kwilaba.

GSAM 4.1Eryongerako oku byo nene nalangira, nabirihiramo obwimiri bw'abandi abalangira ebyo n'amaiso wabo, obuhambire oku byo balabamo. Emyatsi ng'eyi yitolere eribya n'obunene oko musomi ow'omutima mutunganene kwilaba ebinywa ebikatulibwa bute-butyo n'abo abatesibya halya omu migulu ng'eyo.

GSAM 4.2Ngaha omubiri ono oko basomi, n'amaha ng'omo muyisa wa Nyamuhanga erisoma esyopapula sino likatoka erikulya omubiri wa Kristo omu mitima minene. Ngayiketeraya kandi nti abosi, omugulu bakasoma, bakendisyibuka ebinywa bya Paulo oko Banya Tesalonike biti: “Mukeberaye ebindu byosi; mukwate ndeke ekibuya.”

GSAM -J. N. Loughborough. Mountain View, California, ebiro 1 by'omukera watano, 1905.

Note

Back