Ekihande 28 — Oluyi olu sihali mundu wangatoka erikingalo
GSAM 462.1“Nabirihira embere syawe oluyi oluyingwirwe, kandi sihali mundu wangatoka erikingalo; kusangwa uwite amaha make, kandi wabiriteya ekinywa kyage, kandi siwabirigana erina lyage.”1
GSAM 462.2Ebi nibyo binywa ebikabwirwa abo abali omo mibere y'e Filadelefia ey'ekanisa y'Engulu Yowene. Ekanisa eno niyo yakula busana n'erirangirira ngoko eryasa lya Kristo liri hakuhi, kutse abo abahambira okw'eko babya babiriowa oko mwatsi oyo; kusangwa akabuga busana n'ekanisa y'e Saridi (eyabya embere ly'e Filadelefia) ati, “Neryo wibuke ngoko wakokaya n'eriowa, uhambe kw'ekyo, kandi uyisubemo. Neryo wamatasibuka, nasyasa uk'uwe ng'omwibi, kandi siwasyaminya esaha eyo nasyasa uk'uwe.”2
GSAM 462.3Neryo ekanisa y'e Saridi mwaowa enyikirirya y'eryasa ly'Omwami Mukulu erya hakuhi. Abo abahambira okw'eko babya babiriowa mubalolya embere omo kwenene omugulu “ekihirwako ekitara” kyahimbulwa, kandi mubabya ekanisa y'e Filadelefia, eyo abwira ati, “Kusangwa wabiriteya ekinywa ky'erimalayo lyage, n'ingye nasyakuteya oko saha y'erigerageribwa, eyikendisyasa oko kihugo kyosi, erigerageraya abo abakikereko. Lebaya, ngasa luba: uhambe okw'eko uwite, sihabye mundu oyukutwalako embita yawe.”3 Neryo, ni kanisa y'e Filadelefia eno iyo akabwira ati, “Nabirihira embere syawe oluyi oluyingwirwe, kandi sihali mundu wangatoka erikingalo.”
GSAM 462.4Neryo hano hali eribuga ly'amahe ly'Amasako Abuyirire ngoko abo Nyamuhanga akasondola erigenda erihanula ekihugo busana n'eryasa ly'Omwami Mukulu, n'eriyisasa abandu bayitegekere erisakana na Nyamuhanga, bawite olukogo lwa Nyamuhanga olw'engabane omo mubiri wabo. Abandu bangarengaho erikakirya, eriherya emikukyo yabo, erikinga “oluyi lw'eribuga,” nikwa omulenge wa Nyamuhanga akalengera emilenge yosi ati, “Nabirihira embere syawe oluyi oluyingwirwe.”
GSAM 463Erikula ly'omo myaka 74
GSAM 463.1Omo mapapuro walibirire w'ekitabu kino twabirikubungula omo binywa bike emyaka 74, eritsuka 1831 erihika 1905, itwakaminyerera enzuko n'erikula ly'amakwenda w'eryasa lya Kristo, kandi kwilaba obukwenda bwa malaika owakasatu. Twabirikangya ngoko, eritsuka omo butaminyika n'obusama, obukwenda buno bwabirilolya embere n'amaha n'obutoki obukakanyirira mwaka n'omwaka, erihika ibwabana emibiri y'eritula Engulu Yowene eyihotere ekitaka kyosi. Kwenene, sibwabirikula litya busana n'eribya obukwenda obukayitsutsa emitima eyikakwama omubiri; kusangwa omo by'erimbere ebyo bukatula harimo eSabato y'Omwami Mukulu, eyo eriteyayo likaleta omusalaba mulito, likasonda erigabana n'emibiri y'erigulirana n'ekihugo oko kiro ky'eyenga ekirengire ebindi ebiro eribya n'emibiri mingi y'ekihugo. Kandi sibwabirilolya embere busana n'eribulako eriganirya; kusangwa bwabirisanganalo eritsuka okw'itsuka, n'eriganirya erikakalire kwilaba erilwire ehandi, haguma n'emitiko-tiko eyikalwa oko bandu abatayihire uku Nyamuhanga, ababya bahika omo milondo omugulu mulebe. Busana n'emibere eyaleta esyondeka-teka n'erirengaho ly'esyonzigu sy'ehandi, twanganabuga omo binywa bya Daudi, omwimbi w'esyonyimbo, tuti, “Eritendibya Omwami Mukulu yo wabya oko lubaju lwetu, lino Isiraeli anabuge ati: eritendibya Omwami Mukulu yo wabya oko lubaju lwetu, omugulu abandu bayimukira itwe, nga batumira itukinaho, omugulu ekiniga kyabo kyatwakirako; nga amagetsi mwaterengera, n'olusi mwatulabako; nga amagetsi w'ekyipipa mwatulabako. Asikibawe Omwami Mukulu, oyutatuhire omo meno wabo ng'ebya kulya. Engebe yetu yabirisabuka ng'akanyunyi omo mutego w'abateyi b'ehinyunyi; omutego wabirivunika, n'itwe twabirisabuka. Obuwatikya bwetu buli omo lina ly'Omwami Mukulu, oyuhangika ekyanya n'ekitaka.”4
GSAM 464Obuwatikya omo Mwami Mukulu
GSAM 464.1Omwami Mukulu akabuga ati abirihira embere sy'abandu buwe “oluyi oluyingwirwe, kandi sihali mundu wangatoka erikingalo.” Neryo sikyo ky'eriluguha, ngoko obukwenda bwabirilolya embere obutasiba. Ni bukwenda bwa Nyamuhanga oko bandu, kandi butolere eribererera. Omo Eribisulirwa 7:2 omubiri w'eritegeka abandu batoke erimana omugulu ekiro kinene ky'ekiniga kya Nyamuhanga kikendisyasa, akakanganibwa na malaika “oyukalinya eritsuka eburasu bwa lyuba,” kutse, ngoko abandi bakahindula bati, “ng'erilubuka ly'eryuba.” Mulebaye erikya ly'obutuku: erimbere emisase y'ekyakakala ikabanika eburasu bwa lyuba; ikayibunga omo kyakakala ekikalengera eriminyika erihika eryuba lyosi erilangirwa ndeke. Omugulu “Omwami w'Obutuku” akalinya erihika hagati k'ekyanya, ekyakakala kiwe, n'obukangira, n'obutoki bikakanyirira eribya binene.
GSAM 464.2Kwenene litya nikwo obukwenda bwa malaika owakasatu bwabirikula eritsuka 1848, omugulu okwene kosi okuli omubo kwahirwa ndeke, kandi eritsuka aho twabirikangya erikula eryaminyika, eritalisiba, kandi ery'eriluguha. Situngatoka erisobanura kino oko yindi nzumwe eritali ngoko Omwami Mukulu anemuberererya ekinywa kiwe oko bandu, omo mugulu ono omulamo wuwe wasyasa hakuhi, abo “abakateya eSabato butsira eriyitsandya,”5 kandi abakalusya ekisando kyabo oko rikola ebyo bayitsutsire oko kiro kibuyirire kya Nyamuhanga, litya, omw'“Erikirirya lya Yesu,” ngoko obukwenda bwa malaika owakasatu bw'Eribisulirwa 14 bukabuga, bakateya “Ebihano bya Nyamuhanga” byosi. Busana n'abo Omwami Mukulu mwabuga omo muminyereri Isaya ati, “Neryo ekyakakala kyawe kisyatwana ng'engyakya-ngyakya, n'erilamibwa lyawe lisyasa luba: n'obutunganene bwawe [‘Omwami Mukulu, obutunganene bwetu.’ Yeremia 23:6] bwasyagenda embere syawe; n'olukengerwa lw'Omwami Mukulu lwasyakuteya enyuma.”6 Ituwite esyondagane ng'esi, twangalindiririki ekitali eribererera ly'omubiri? “Nyamuhanga amabya oko lubaju lwetu, nindi wangatulwako?”
GSAM 464Bano bangatoka bati eribererera?
GSAM 464.3Twamaleba emibere eyabyaho omo 1846, omugulu Omulisya Joseph Bates atsuka erisaka ekitabu kiwe ky'erimbere, eky'erimbere ekyahulukibwa oko mwatsi w'eSabato n'Abalindiriri b'eryasa lya Kristo abakateya ekiro ky'akalinda, inyawite esyosente 12½ nyisa ng'ebindu byosi ebyo abya awite omo kihugo, kandi inyalagirwa erikolesyasyo abere atahwere ekiro kiwe ky'erimbere ky'erisaka; kandi twamasyaleba Omulisya James White inyakahilukya akapapuro kiwe k'erimbere, Okwenene okw'Omugulu Ono, n'esyofranka esyo atunga omo rikata ebyasi omo ririma, kandi inyakatuma akapapuro ako busa oko bosi abendisyakasoma, n'eribuga busana nakwo ng'obukwenda obwangahikire oko mbibi sy'ekitaka,—twamaleba enzuko esi nditi, omundu angabulyaya omo binywa by'abandu b'omo biro bya Amosi ati, “Yakobo asyayimukibwa nindi? Kusangwa ni muke.”7 Twamalengania ebyo n'emibere y'omo 1905, omugulu erihulukya okwene kw'obukwenda likakolawa omo nyumba 20 sy'erihulukya ebitabu, esiri omo bindi-bindi bihanze by'ekihugo, kandi esikahika ngendo nyingi oko mbibi sy'obutoki bwazo erisondayo erihindira eby'erisoma ebyo bandu bakasonda, twanganabuga kwenene tuti, Lebaya, “oluyi oluyingwirwe” olwo erihika lino sihali mundu oyubirikingalo.
GSAM 465.1Busana n'abo ab'omu biro by'erimbere abalengekania bati omubiri siyendisyabererera, twanganabuga omo binywa ebyo omuminyereri Zakaria akolesaya erihana abo abasonda erikakirya omubiri wa Nyamuhanga omo risubakira Yerusalema, tuti, “Nindi oyubirinyira ekiro ky'ebindu bike?”8 Busana n'ebindu ebyalangirwa ng'ebitwa by'ebikalakalire omo nzira yabo, Omwami Mukulu mwabuga omo muminyereri ati,—
GSAM 465Ekitwa kikahinduka eribanda
GSAM 465.2“Uwe ekitwa kinene, ndi uwe? Embere sya Zerubabeli wasyahinduka eribanda; kandi asyatsomolayo eribuye ly'erihindira, inyanemulengera ati, Olukogo, olukogo lube okulyo.”9 Litya nikwo kyabiribya omo mubiri w'obukwenda bwa malaika owakasatu, kandi litya nikwo kikendisyabya erihika “eribuye ly'erihindira” eriletwa, kutse, omo bindi binywa, erihika omubiri erihwa.
GSAM 465.3Mulebaye abo bake b'omo 1846, ababya abaga b'ebindu, abaga omo myatsi yosi eritari erikirirya omwa Nyamuhanga n'obukumbi bw'okwenene, kandi mulangire ngoko omubiri wabo wabirikula. Mulengekanie ebikolwa ebyo tuwite lino, ebitabu byosi ebyabiritegekibwa, n'erihindulwa omo mibuge eyigabene y'ekihugo, n'erihilukibwa, n'amagana w'abagulya b'ebitabu abakahikya ebitabu bino omo nyumba sy'abandu, ebihembo byabyo ibihikire $400,000 obuli mwaka. Omuyisa wa Nyamuhanga amawagenda embere n'erikala oko mubiri, twanganalindirire eribererera. Ituwite ebikolwa bino n'abo abakakola abakanemuyongera erikanyirira omukera n'omukera, kandi ituwegemere omwa Kristo, situtolere erilindiririki ekindi eritali ekyo Solomoni ayimba busana n'ekanisa ya Nyamuhanga, omugulu yahuluka omo mibere yayo y'omu kisaka, “iyegemere oko kuboko kw'Omwanzibwa wayo,” omugulu akayikangania iyilebire embere, ati, “mbuya ng'omugenda, iyikakangania ndeke ng'eryuba, kandi iyikatiyakatiya ng'erihye eriwite ebendera.”10
GSAM 466Eriwatikibwa n'Oluhabwa lw'eriminyerera
GSAM 466.1Sitwabirilangira nyisa ngoko obuteya bw'Omwami Mukulu bwabirikingula enzira y'erilandaganya okwenene, n'omuyisa wuwe ow'engabane wabirigenda n'erirengaho ly'erikwama esyonzira sy'obuteya buwe, nikwa kandi omo nzuko n'erikula ly'obukwenda bwa malaika owakasatu abirikania n'abandu buwe omo luhabwa lw'eriminyerera. Kino sikyabiribya ribisulirwa rihya-rihya ery'eritwala ekibanza ky'eBiblia, kandi sikyabiribya omo nzira y'eritsandya enyikirirya y'Amasako, nikwa erikangya ahali omo mugulu ono akabi k'erilwa oko butambalambala bw'Engulu Yowene ya Kristo, aho abandu bali omo kabi k'erikwama omutse w'omugulu, ibayitsutsire n'emibere y'okwangana ng'abaramya Nyamuhanga butsira obutoki.
GSAM 466.2Twamaleba omwatsi ono oko kisyoke11 ky'abaminyereri b'ekera, ekyo Omwami Mukulu abirituha ng'enguma y'oko mirondo eyikakolesibwa erigerageraya eriyikangania eryo, tukasanga esyonzumwe nguma esikaleka eriyikangania eryo eritunganana lino ng'omugulu oyo; ni butoki, omo buli mugulu, bw'erihimbulwa oko mulondo w'okwenene n'esyonyikirirya n'emikolere ey'engabane eyiri n'amaha omo mugulu oyo. Omukwenda Paulo, omugulu akabuga busana n'eriyikangania ly'ebihabwa ebyo Omwami Mukulu ahira omo kanisa, akabuga ati biri “busana n'erihindira ababuyirire, busana n'omubiri w'erihererya, busana n'eryubaka omubiri wa Kristo; erihika itwe bosi erihika omo buguma bw'erikirirya n'eriminya Mugala wa Nyamuhanga, eribya mundu oyuhindire, erihika oko kigereranyo ky'obunene bw'erisula lya Kristo; itusyasuba abana, abakatsukatsukibwa eno n'eno, n'eritwalibwa n'obuli mwitsi w'enyikirirya, omo bulyalya bw'abandu, n'amenge w'erihima, awo bakayitegeka eriteba; nikwa itukabuga okwenene omo lwanzo, tukule omuwe omo myatsi yosi, iye yo mutwe, Kristo: erilwa omuwe omubiri wosi, oyuhambanibwe ndeke n'eribohwa haguma n'ebyo obuli luhambano lukaha, ngoko obuli kihande kikakola omw'ekigereranyo kyakyo, akakula inyakayiyubaka omo lwanzo.”12
GSAM 467.1Amaganirya agali oko riyikangania ly'oluhabwa lw'eriminyerera omo mugulu ono wangabugibirwe n'amaha gumerera omo biro by'ekera; ko n'eribuga tuti, tuwite Amasako, neryo situli n'obweta bw'ebihabwa ng'ebyo. Nikwa Amasako wene ago akatubwira ati Kristo abirihira ebihabwa bino omo kanisa bikole omubiri wabyo erihika “ekihindire [emibere eyihindire] eriyasa,” kandi ekanisa itolere “eritendisyasigala enyuma omo kihabwa kyosi-kyosi, iyilindirire eryasa ly'Omwami wetu Yesu Kristo.”13
GSAM 467Tuwite bweta bwaki bw'abaminyereri?
GSAM 467.2Abandu b'ekera bangalengekanirye bati bawite ebihano bya Nyamuhanga eby'emikolere, ngoko byasakawa n'ekyala kiwe iye wene oko bipande by'amabuye; bati bawite emigambo, n'esyombanza, n'esyongangirirya ebyo Musa abwirwa erilwa omo munwa wa Nyamuhanga, kandi ebyasakawa ndeke; neryo hakisyondawaki? Nikwa, nomo babya bawite okwene kwosi oko kuwene, Nyamuhanga mwayitsutsa eribabwira “omo migulu mingi n'omo misindo mingi omo baminyereri buwe babuyirire.”
GSAM 467.3Tukasanga ngoko obwimiri obwahebawa n'abaminyereri bingi, nga Isaya, Yeremia, Ezekieli, Danieli, Hosea, n'abandi, omo myatsi yosi bwakangiriraya omusingi munene muguma ow'eripondera Nyamuhanga; nikwa obuli muminyereri abya awite amahana w'engabane oko bandu b'omugulu wuwe, busana n'omutse wabo w'erihimbulwa oko misingi mibuyirire y'obutunganene n'emihingo eyibya iyiri n'amaha omo mugulu oyo obuminyereri bwahebawamo.
GSAM 468Obweta bw'ebihabwa
GSAM 468.1Nomo omundu angabuga ati situwite nyisa esyongangirirya siwene sy'Amasako w'Endagane ya Kera, nikwa n'ebinywa by'Omulamya wetu iye wene, n'eby'abakwenda, neryo tuwite bweta bwaki bw'ekindi kyakakala? Omwatsi akasigala ati abakwenda abo babuyirire bamania ebiro by'aha nyuma, omugulu “emigulu y'akabi ikendisyasa,” kandi omugulu abandu bakendisyabya “bawite emibere y'okwangana ng'abaramya Nyamuhanga, nikwa bakagana obutoki bwako,” kandi bakatubwira bati, “abandi bakendisyalwa omw'ikirirya, ibakahulikira emirimu eyikatebaya n'esyonyikirirya sy'esyodaimoni.”
GSAM 468.2Twamaleba ebyosi ebi, abandu abo Paulo akabugako omo risakira Abatesalonika, abatakendisyabya omo mwirimya, neryo ekiro kya Kristo sikyangabagutya ng'omwibi, nikwa abakendisyabya bana b'ekyakakala, bakahanawa “erigerageraya ebyosi” ebiri omo “buminyereri,” n'“erihambira oko kindu ekibuya.”14 Kino nikyo kibugireko eribabwira ati abandu abakendisyabya bakalindirire eryasa ly'Omwami Yesu Kristo, kandi abasyasangwa oko muhindo ibamabiritegekera ekiro ekyo, bakendisyabana omo kati-kati kabo eriyikangania ly'oluhabwa lw'eriminyerera erya “libuya,” ery'okwenene.
GSAM 468Ebiminyikalo by'enduli
GSAM 468.3Tuli omo mugulu ebiminyikalo bikanyire oko buli lubaju ngoko ekiro ky'Omwami Mukulu kiri hakuhi. Tuli omo mugulu wene omo bandu batolere eriyasa abakendisyateya ebihano byosi, kandi abakendisyabya “bawite obwimiri bwa Yesu”15—“Ekirimu ky'eriminyerera.”16 Tukasangaki? Ngoko omo myaka 60 eyabirilaba abandu ng'abo babiriyasa, ibaleta obukwenda gumerera obwo, kandi omo kati-kati kabo oluhabwa lw'eriminyerera lwabiriyikangania. Twamagerageraya oluhabwa ngoko lukayikangania omo Mugole E. G. White n'emirondo y'eBiblia, twabirilangira ngoko lukabererera omo myatsi yosi. Eritsuka okw'itsuka erihika oko muhindo, omo bisakango byosi by'Omugole White, sihatabirisangwa mulongo na muguma owakahayo akanya n'akake k'erikola ebibi, kutse owakaligira n'akake erirengana n'ekinywa kya Nyamuhanga. Ebisakango bino sibitabiriyihira hetingye ly'eBiblia, nikwa bikahanira obutasiba eriyiga ekinywa kya Nyamuhanga ndeke kutsibu, ibikakikangania ng'ekigereranyo kinene ekyo esyombanza syetu sikendisyakubungulwako omo ritswera ly'aha nyuma. Omo bisakango biwe Kristo akasumbibwa embere syetu ng'ekisyoke kiguma nyisa ekyo tutolere erikwama. Akatulibwa ndeke kutsibu ng'erisika lyetu liguma ly'erikinda hano, ekibiso kyetu kiguma erilwa oko kiniga ekikayasa, erina liguma n'enzira nguma omo yoyo tungalamibawa.
GSAM 469Obwimiri bwage bwene
GSAM 469.1Busana n'Omugole White n'emibere y'omubiri wuwe, ebikakwamako bihahebwa, ebyasakawa omo 1877 n'omundu oyubya amuminyire kandi oyubya abiriyiga omubiri wuwe omo myaka mingi; kandi enyuma w'erigerageraya ly'emyaka nga 53, emyaka y'erimuleba ndeke, ngikirirya butsira eriyaliganirya obuli mwatsi owabugiwamo:—
GSAM 469.2“Busana n'emibere y'obukristo ya Mwali wetu White, ngasonda eribuga nti, ngalengekania nyasi ekindu oko mwatsi oyo. Nabirimuminya omo myaka 18,—eyilabire oluhande lw'emyaka yosi y'enzuko y'abandu betu. Nabiribya omo kihanda kyabo ngendo nyingi, omugulu mulebe engendo yosi iyiri esyoyenga. Babiribya omo nyumba yetu n'omo kihanda kyetu ngendo nyingi. Nabirigenda nabo hakuhi obuli handu; nabiribya nabo omo bisamire n'embere sy'abandu, omo mihindano n'ahali hihindano, kandi nabiribana akanya k'engabane eriminya ekindu busana n'engebe, n'emibere, n'ekirimu kya Mugala wetu na Mwali wetu White. Ng'omulisya, nabiritekwa erikola n'abandu b'emisindo yosi, n'emibere yosi, erihika ngalengekania nti, ngatoka eriminya ekindu oko ngoko omundu ali, kwilaba enyuma w'emyaka y'erimuminya hakuhi.
GSAM 470.1“Nyasi Mwali wetu White ng'omukali oyutayisumba, oyuwite esisoni, oyuwite omutima muwene n'obukengwa. Emibere eno yiwe si ya kwambala nyisa n'eriyiganira, nikwa ikahuluka ndeke kandi obulolobere erilwa omo buhangiranwa buwe. Siali mundu oyukayitsutsa iye wene, oyukayirora ng'oyutunganene kwilaba abandi, kutse oyukayisumba, ngoko abakiriraya omo bupumi bakabya endambi yosi. Ngendo nyingi nabirisakanasakana n'abandu ab'eryikirirya ly'obupumi, kandi endambi yosi nabirisanga iboswire mw'eriyitsumba, n'ekyipipa, ibayitegekire eriha obulengekania bwabo, ibakayitsumba oko bubuyirire bwabo, n'ebindi; nikwa nabirisanga endambi yosi ngoko Mwali wetu White ali omo mibere eyikalwa n'ebyosi ebyo.
GSAM 470Omwira w'abaga
GSAM 470.2“Obuli mundu, nomo abya omwaga kwilaba abosi kandi oyuwikehire kutsibu, angagenda ukuye obuwiranda erisonda amahana n'eriterengana-mutima, butsira eriponwa. Akateya endambi yosi abo abawite obweta, abatali n'ekindu, n'abanabire, akahabo ebibasondire n'eribabugirako.
GSAM 470.3“Sinitabiriminyana n'omundu oyuwite endambi yosi erisaga Nyamuhanga embere siwe nga iye. Sihali ekindu ekikatsukibwa butsira erisaba Nyamuhanga n'omuhwa. Akayiga ekinywa kya Nyamuhanga ndeke kandi obutasiba. Nabiriowa Mwali wetu White inyakabuga ngendo magana, nabirisoma obwimiri buwe bwosi eritsuka embere erihika enyuma, obunyingi ngendo nyingi, kandi sinitabiritoka erisangamo ekinywa na kiguma ky'emibere mibi, kutse ekindu ekitali kiyirire ndeke n'obukristo; sihali ekindu ekikahimbula abandu erilwa oko Biblia n'oko Kristo; nikwa mubo ngasangamo eriyisasa ly'omuhwa munene eripondera Nyamuhanga, eriyanza Yesu, erikirirya Amasako, n'erikubungulago endambi yosi. Nabiritunga omuyisa munene omo kirimu erilwa omo bwimiri, ngendo sitangatoka eriganza. Kwenene, sinitabirisomabo butsira eriyowa obuhane busana n'eribula erikirirya ly'omo Nyamuhanga, n'eribula eriyihayo, n'eribula omuhwa w'erilamya esyongebe. Ngamabya n'obutoki bw'eritswera, kutse eriminya emyatsi y'ekirimu, ngabuga nti obwimiri buli bw'ekirimu kiguma kandi bw'omulondo muguma ng'Amasako.
GSAM 470.4“Omo myaka 30 [lino twanganabuga emyaka 60] obwimiri buno bwabirikiriribawa n'erisomwa omo bandu betu. Bwabirikolako bahi? Bwabirihimbulabo erilwa oko bihano bya Nyamuhanga? Bwabiriletaho erileka erikirirya ly'omo Kristo? Bwabiriletaho erisula eBiblia? Bwabiriletaho eribya bandu batsandire, ab'emibere mibi? Nyasi ngoko emibere yabo yangalenganibawa ndeke n'ey'ekindi kihanda kyosi ky'abakristo.
GSAM 471.1“Ekindu kiguma nabiriminyerera ni kino: abo abakaganiraya kutsibu esyonzoli sya Mwali wetu White bakikirirya bati ni mukristo. Ngoko bangatoka erikirirya kino, singasi. Bakasonda erisondolya omwatsi oyo omo ribuga bati abiritebawa. Sibangatoka erikangya ekitingu na kiguma omo ngebe yiwe yosi, kutse ekinywa ky'emibere mibi omo bisakango biwe byosi. Batolere erikirirya bati ebinyingi omo bisakango biwe biri biwene kutsibu, kandi bati obuli mundu oywangayikalire ngoko ebinywa biwe byosi bikabuga angabya mukristo muwene, oyuwite erisika ly'eryasa e lubula. Kino ni ky'eriluguha kutsibu, amabya ekigaso kya Satani, kutse amabya akabwirwa na Satani, kutse ebisakango biwe ibibya by'emibere mibi kutse bya mitekenye y'obulengekania buwe bwene.”
GSAM 471Abalua ehandi bakimirira ebisakango
GSAM 471.2Omugulu esyonyamakuru syetu esiri mw'ebisakango by'Omugole White sikatumwa, sikasondibwa n'abandu abawikehire kutsibu, abakatinya Nyamuhanga kandi abakayihayo. Omugulu bakabuga busana n'ebyo basoma, bakabuga bati, “Tukayitsutsa kwilaba oko bisakango by'Omugole White. Bikakolesibwa ndeke omo ngebe, byoswire esyongangirirya esyakaleta omundu hakuhi n'Omwami Mukulu, n'erimukolya inyalengera eriyikehya, erisaga Nyamuhanga, n'eriyihayo. Ebisakango bino biri kutsibu omo mulondo w'Amasako, erihika, omugulu tukasoma, tukalengekania tuti Omugole White atolere eribya inyabwirwa na Nyamuhanga erisaka ngoko akasaka.” Obu nibwo bwimiri omo makumi mingi w'emyatsi y'abo abakaniakania n'abakoli betu b'eritula Engulu Yowene omo mabarua, kandi abo batali basi na hake bati ebirengekanio by'Omugole White bikakokibawa omo nzoli mbuyirire.
GSAM 471Enzuko y'eriganirya
GSAM 471.3Tuwite embere syetu ekyaleta oluhabwa luno omo mitima, ekibulyo kikayimuka kiti, Eriganirya ly'eriyikangania ly'oluhabwa luno lyalwa hahi kandi busana naki? Kandi ekikalwa omo bandu abakaganiraya nikyo kyahi? Eritsuka 1852, omo rilangirira omwatsi ono ndeke, nabirisanga ngoko eriganirya ly'eriyikangania lino lyabiritsuka kwilaba oko bandu abahanibwe busana n'ebibula omo mibere yabo, n'emihingo mibi, kutse enzira mbi mulebe omo ngebe yabo. Abanyingi b'abahanibwe bangabugire bati sibali babi ngoko obwimiri bukabakangya, kandi bangakangirye bati bangahambira oko kwenene nomo bangalwana n'erihana eryo babirihabwa. Omugulu wabirikangya ngoko abanyingi kwilaba omo bano bakagana erikirirya lyabo n'erilwa omo milondo kyosi. Abandi babirilangira erihalya lyabo, n'erihambira oko kwenene kwilaba. Ekibulyo kikayimuka kiti, Abo abakaganiraya oluhabwa luno bamabya bakasondolwa n'Omwami Mukulu, busana naki bangabula engebe y'ekirimu n'erisyabinduka erilwa uku Nyamuhanga? Omulondo w'Omulamya wetu ni kino: omuti atolere eriminyikania oko biguma byago. Akabuga n'amaha kutsibu ati, “omuti mubi syangatoka eriheta ebiguma bibuya.”
GSAM 472Erihera ly'eriganirya
GSAM 472.1Tukayibuka emyatsi eriganirya eryabiritegekibwa lyayimuka erilwa n'obwimiri bw'Omugole White, haguma n'eribuga bati eribererera linene lyangakurire omubiri wabo ahakoyihya obwimiri. Nikwa, sibatabiritoka eriberererya ebyo babya bakasikako. Enyuma w'emyaka y'erilwana, sibatabiriha ekindi kanganisyo ky'erilandaganya okwenene kw'eSabato embere sy'ekihugo erirengire ebyo ab'emibere yabo bakola emyaka 49 yalaba. Omubiri wabo amabya wabya mubiri w'engabane w'Omwami Mukulu, busana naki obukwenda bwabo sibwabiribana eribererera erirengire eri?
GSAM 472Eribererera liri hahi?
GSAM 472.2Oko lundi lubaju, twamaleba obukwenda obukatula Ebihano bya Nyamuhanga n'Erikirirya lya Yesu oko kihugo,—obukwenda obuhambanire n'eriyikangania lino ly'oluhabwa lw'eriminyerera, haguma n'amahana walwo, n'esyongangirirya, n'erihana,—tukalangira ngoko bwabirilolya embere n'erisika kandi obutasiba eritsuka okw'itsuka kwabwo erihika lino. Omw'eriowa amahana w'Omwami Mukulu omo luhabwa luno, n'erilolya embere omo maha w'Omwami Mukulu, obukwenda, ngoko twabirikangya, bwabirihotera ekitaka kyosi, kandi bukanemuhika luba oko “buli kihanda, n'obuli lubuto, n'obuli mubuge, n'obuli bandu.”
GSAM 473.1Busana n'erikula lyabwo omo biro byalaba, twanganabuga tuti, ekinywa kya Nyamuhanga kyabiribererera omw'eribuga liwe ati, “Sihali kilwiso ekyabumbibwa erikulwako ekisyatoka eribererera.” Kwenene, okuboko kwa Nyamuhanga kwabiriyikangania omo ribererera eryabirigenda n'enzuko n'erikula ly'omukukyo ono munene w'eryasa lya Kristo erihika lino, kandi busana n'eby'aha mbere twegemere okw'ibererera ery'obwenene ly'ekinywa kiwe kiti, “Nabirihira embere syawe oluyi oluyingwirwe, kandi sihali mundu wangatoka erikingalo.” Omo risika lino twanganayimbe butsira eritika-tika tuti:—
Notes
- Eribisulirwa 3:8. ↩
- Eribisulirwa 3:3. ↩
- Eribisulirwa 3:10, 11. ↩
- Esyonyimbo 124:1-8. ↩
- Isaya 56:1, 2. ↩
- Isaya 58:8, 13. ↩
- Amosi 7:2. ↩
- Zakaria 4:10. ↩
- Zakaria 4:7. ↩
- Olwimbo lwa Solomoni 6:10. ↩
- Yakobo 5:10. ↩
- Abaefeso 4:12-16. ↩
- 1 Abakorinto 1:6, 7. ↩
- 1 Abatesalonika 5:5, 20, 21. ↩
- Eribisulirwa 12:17. ↩
- Eribisulirwa 19:10. ↩