Obugerya bw'ekitabu ekyahulukibawa omo 1992
GSAM -[Ekinywa ky'omulunguli w'ekitabu ky'oko CD-ROM: Kusangwa ekitabu ekyahulukibawa omo 1992 kyabya kinemwo ebisakango bya Loughborough ebyatasangawa byahulukibawa embere (ng'Ekihande A ky'eryongerako), twalangira ng'oku kikatolere erihiramo emyatsi eyi ey'enyuma eyikakanganaya enzuko yabyo, haguma n'omugambo w'ebyalaba n'ebyalangirwa ebyihambire kubyo.]
GSAM 5Emyatsi mike y'engebe yiwe
GSAM 5.1John Norton Loughborough alangira n'amaiso wuwe eritsukibwa ly'ekanisa y'Abalindiriri b'eryasa lya Kristo abakateya ekiro ky'akalinda. Emyatsi mike y'engebe yiwe n'omubiri wuwe w'eritulira abandu ekinywa kya Nyamuhanga, omu binywa byiwe yene (ebyalusibawa omu Kihande A ky'eryongerako), yikendisyakangania enzuko y'ekitabu kiwe kino ekyasubahulukibawa.
GSAM 5.2Nabutirwa e Victor, omu kitwa kya Ontario, N.Y., oko biro 26 by'omukera w'erimbere omo 1832. Omuyi ono ow'abandu 200 kutse abakalabaho wabya awatembekibweko n'abandu abanenene abalimi, abalabisibwe oko maili manene. Wabya oko nzira y'ekera ey'ebinyabugali ebyatwala amabarua erilwa e Albany erihika e Buffalo. Omu muyi oyo namagenda oko bwiyisya bw'ekiro ky'erimbere ky'eyenga n'omw'iramya ly'abandu abosi, erihika omu mugulu w'erimera ly'ebiti omo 1848, omugulu omuyi wa Rochester, N.Y., wabere ekibanza kyage ky'erikoleramo. Tata na sogokulu babya abalisya b'ekanisa y'Abametodisti omu kyalya kyabo, nikwa babya ibakakola omubiri w'eriyilamya....
GSAM 5.3... Omu yenga y'erigunzerera y'omukera w'erikumi n'ibiri omo 1843, nahulika engendo y'erimbere engangirirya eyihambire okw'asa lya Kristo. Mugala wetu James Barry niyo watula engangirirya eyo, oko mutwe oyu: “Endambi y'eritswera liwe yabirihika.” Obutoki bunene bwa Nyamuhanga mubwaleta okwenene okwo akarangirira omu mitima yetu. Kyabya ng'oko twimanire embere sy'ekitumbi ky'eritswera kya Nyamuhanga. Omw'ihulikirira erihanwa ly'omulisya eryakwamako, nene haguma n'abandi banenene twafinyana erigenda embere batoke eritusabira. Neryo aho niho natsuka erisaba n'erisonda Nyamuhanga....
GSAM 5.4Omu mugulu w'embeho omo 1852, embere sy'eritsuka erirangirira Obukwenda bwa malaika owakasatu, nabya nginemukebereza nti ngatulire abandu Obukwenda kutse ngakole omubiri w'ebyala erilamya nene n'omukali wage. Oko Sabato nguma, omu muhindano wetu e Rochester, Mwali wetu White mwahabwa Enzoli, neryo mwatulibwa Obwimiri obukanyibwira ndeke buti sitekisyayowa erisweka, nikwa ngende ndangirire Obukwenda, n'Omwami akendisyanjigulira enzira ey'eribana eby'erindamya....
GSAM 6.1Nabere nabiringira ndeke omu mubiri, omu biro ebyo by'erimbere, muhabya ekindu ekyo, oku ndambi eyo, kyabya kisamire kw'ine. Kyabya kino: omu buli muhindano munene omu bihugo eby'embaganane ogo Mugala wetu na Mwali wetu White babya ibakagendako, mubanyibirikira erigenda haguma nabo. Namayibulya nti: “Busanaki sibalisaba abalisya aba, nikwa bakanyisaba nene buli mugulu?”
GSAM 6.2N'eryongerako, busanaki nabya halya erilangira enzuko y'obuhone obuli buguma, omugulu obuhone obusatu bwabya erilwa omo 1853 erihika omo 1865, n'omugulu batsuka esyongulu sy'omu mapapula sy'embaganane sisatu, buli nguma busana n'obuli buhone? Kandi busanaki nabya halya erilangira Mwali wetu White omu Enzoli y'omundu oyubukire engendo esikalabire 40, erilangira abanganga ibakamukebera, n'erihulika amabuga wuwe w'ebyo byabya bikendisyabyaho—ebindu ebyalangirwa ng'ebitangatoka oko babya ibakahulikirira obuminyereri obwo, nikwa ebyabererera ndeke ng'oku byakanibawa? Ngabuga n'omutima mutunganene nti emigulu eyi siyabya ya nene eriyiheka, nikwa yabya kindu ekisamire kw'ine. Namayibulya nti: “Busanaki ebyosi bino biri bitya?”
GSAM 6.3... Omo 1890, Omuhindano Mukulu mwanyisaba erikola omubiri omu luhande lw'esyondundu sya Rocky olw'eyo eryuba likalwa. Neryo muhasa Obwimiri obu, obwasakirwa Omulisya O. A. Olsen, n'omutahula wabwo namatumirwa nagwo: “Ngabuga nti Omulisya Loughborough alekwe erikola omubiri owitolere kutsibu erikolwa omu makanisa. Omwami anzire omulenge wuwe erihulikwa ng'owa Yoane, akatondogola ebyo yene alabamo omu nzuko n'erikula ly'Obukwenda bwa malaika owakasatu. Omulisya Loughborough aimane omu mwanya wuwe owatolere, nga Kalebu oyukasa embere n'eriha Obwimiri obusikire embere sy'obutikirirye n'erisweka n'erihakania ati: ‘Tuwite obutoki bunene bw'eryambuka n'eriyitwalira ekihugo kibuya.’ Mutekibohe Omulisya Loughborough omu mbindo hali hosi. Mutemubohe oko muhindano w'amakanisa muguma. Mumuleke agende hano na halya n'ahosi-hosi, akatondogola ebyo alangira, ebyo asi n'ebyo akwata n'ebyala byiwe omu nzuko y'Obukwenda bwa malaika owakasatu.
GSAM 6.4(Langira Ekihande B ky'eryongerako busana n'ebiro bikulu-bikulu by'omu ngebe ya Loughborough.)
GSAM 7Eribirikira ery'engabane ly'erilandagania ekitabu kya Loughborough
GSAM 7.1Oko ndambi ey'eryasa ly'ekyasa kihya, Mugala wetu Loughborough abere abirisaka Enzuko n'erikula ly'Obukwenda bwa malaika owakasatu, ekitabu ekyatsuka embere sy'Omukukyo munene w'eryasa lya Kristo engendo eyakabiri, Ellen White mwasaka ebinywa bino:
GSAM 7.2Ngakayowa kutsibu omu mutima busana n'emibere yetu y'omugulu ono. Tutolere lino erikola omubiri oyo twangatolere erikola kera. Tutolere erikola ng'oku Omwami alagira Musa erikola, omugulu abana ba Israeli, ibabirisoka omu rubala, babya ibabirihira amahema wabo oko mbibi sya Yorodani. Musa mwalagirwa erisubatondogolera abandu ebyosi Omwami abakolera omu ngendo syabo omu rubala. Omugambo w'erisubatondogola eryo akasangwa omu kitabu ky'Eryibuka Ebihano.
GSAM 7.3Omugambo w'ebyo abandu ba Nyamuhanga balabamo omu biro by'erimbere by'omubiri wetu atolere erisubahulukibawa. Abanenene abasa omu kwenene erilwa oku ndambi eyo sibasi enzira eyo Omwami akoleramo. Ebyo William Miller n'abakoli haguma naye balabamo, ebyo Kapiteni Joseph Bates alabamo, n'ebya abandi abatsuka omu Bukwenda bw'eryasa lya Kristo, bitolere erikala ibiri embere sy'abandu betu. Ekitabu ky'Omulisya Loughborough kitolere eritwalwa n'obunene. Abalume betu abasondoli batolere erilangira ekyo kyangakolwa erilandagania ekitabu kino.
GSAM 7.4Tutolere erisonda n'eriminya enzira y'omugaso kwilaba ey'erisubakebera ebyo twalabamo erilwa oko nzuko y'omubiri wetu, omugulu twayitenga oku makanisa, n'erigenda embere kitseka-kitseka omu kyakakala ekyo Nyamuhanga atuha. Oku ndambi eyo twayimanira oko mwatsi ono tuti e Biblia, n'e Biblia yonyine, niyo yangabya musondoli wetu; kandi situtolere erirenga oko mwatsi ono. Twahabwa ebiminyikalo by'eritangania eby'obutoki bwa Nyamuhanga. Ebitikotiko mubyakolwa. Engendo n'engendo, omugulu twaletwa omu bikalakalire, obutoki bwa Nyamuhanga mubwakanganibawa busana netu.—Ebarua 105, 1903 (CWE145) (ebinywa bikasitirwe byabirikakibwa n'omulunguli).
GSAM 7Busanaki erisubahulukya ekitabu kino?
GSAM 7.5Omw'itegererya Obwimiri obwo bwabiritsuka embere, tukanakanaye oko byaleka Mugala wetu Loughborough inyalagirwa erisubatondogola omugambo wetu w'ebyalaba, n'oko byaleka itwayowa ng'oko twabirisondolwa erisubalandagania omugambo wuwe omu bandu.
GSAM 8—Eribirikira ly'eribuka
GSAM 8.1Embere sy'ebindi byosi, erisubakebera ebyalaba likatuha omwanya w'erilandirira okuboko kwa Nyamuhanga omu mubiri, n'erilangira ebiminyikalo by'eriteya liwe ery'olwanzo. Kino kikakulyaya erikirirya, n'eritukangirirya eby'eryiga eby'omu migulu eyalaba, ebibuya n'ebibi. Kikasubakanganaya emisingi y'ekanisa yetu ey'omu Masako, n'eribisula ekirimu ky'eriyihonga ky'abatsuki betu. Kikatusubukirya esyombitsi syetu sy'omu Kirimu. Ng'oku Mugala wetu Loughborough abuga oko lupapula 33: “Kyamabya kyabya kibuya Israeli eribuka ng'oku Omwami asondolabo, sikiri kibuya n'oku yetu? Omusaki w'esyonzimbo, anatsangire kwilaba, akasubabuga ati: ‘Wuhalambe Omwami, yewe mutima wage, kandi iwutebirirwako eby'obuya byiwe byosi.’”
GSAM 8—Omugulu w'engabane omu mugambo w'ebyalaba
GSAM 8.2Ebirimo eby'eritsuka ly'omubiri w'Abalindiriri b'eryasa lya Kristo abakateya ekiro ky'akalinda byabya mugulu muguma oko migulu y'engabane y'omu mugambo w'ebyalaba. Tukayibuka ehiminyikalo ehitatolere erikeha ahasatu ehy'omugulu ng'oyu.
GSAM 8.3(1) Omugulu obuminyereri bunene bukabererera. Kutsibu emyatsi ng'eyi siyikalangirwa n'abandu banenene kutse eriyitegereribwa ndeke-ndeke oku ndambi eyo. Busana n'ekyo, kiri ky'obunene kandi ky'omugaso kwilaba erisubalangira enyuma, omw'ikolesya eritegererya eryasa enyuma w'ebyalaba, eriminya obunene bw'obuminyereri—amakwenda awo Omwami ateka-teka ng'Okwenene okw'omugulu ono busana n'omugulu oyo omu mugambo w'ekihugo.
GSAM 8.4(2) Omugulu emisingi yikahirwaho busana n'omubiri w'engabane oyo Omwami ateka-tekire erikola. Eriminya emigulu ng'eyi, kiri ky'obunene kwilaba erilangira ng'oku esyonkingi syahirwaho, ebikanganisyo by'omu Masako, n'emyatsi ey'erisondolwa na Nyamuhanga, eyagenda kitseka-kitseka iyikasondola “abatsuki”, abombeki abo ababirikirwa busana n'omugulu ng'oyo. Bitya mubasika omu kwikirirya okw'engebe kandi okukakwama enzira y'obwenge, oku Bukwenda n'oku mubiri oyo Nyamuhanga abaha.
GSAM 8.5(3) Omugulu embinduka nyinene sikabya omu mubiri w'oko Ahabuyirire ah'okwenene, aho ehy'erilangirirako hyabya hikakanganayaho. Kusangwa enzira ya Nyamuhanga “yiri oko Ahabuyirire” (Esyonzimbo 77:13), kiri ky'obunene kwilaba eritegererya n'erikwama n'erikirirya ebyo Nyamuhanga akakola erihwa ekitsibu ky'ekibi. Ekiri ky'omugaso kwilaba omu mwatsi ono n'erilingiranirya embinduka nyinene eyatsuka embere n'eyo eyabya omw'ibuka ly'eryasa lya Kristo. Omwami anzire itwakanakania oko byabya omw'ihuma erilwa omu luhande lw'embuga eriyingira Ahabuyirire (erilwa e Kalvari erihika okw'iyambukira elubula), kandi ng'oku abandu ba Nyamuhanga b'omu mugulu oyo, omu nzuko, batayitegererya ebyabya. Busana n'ekyo mubalaba omw'ihwa-maha eryabarenga kutsibu, nikwa oko muhindo mubaminya omwanya wabo omw'ibererera ly'endekateka ya Nyamuhanga. Ebyo balabamo bikaha ekyakakala oko byo abikirirya b'omo 1844 n'eby'enyuma balabamo, omw'ihuma erilwa Ahabuyirire eriyingira Ahabuyirire Ahalengire omo Bubuyirire (erilwa omw'itusabira eriyingira omw'itswera esyombanza ery'eritusabira).
GSAM 9.1Ehiminyikalo ebyo ehyosi bisatu tukalangiraho omu mugulu w'eritsuka ogo Mugala wetu Loughborough akatondogolaya omu mugambo wuwe. Twanzire erikwata n'eribana ekitsweka omu kirimu ng'eky'abo abasonda okwenene “ng'eritungo eribisamire”, mubabanako, n'eriyihonga n'ebyo bawite byosi erirangirirako.
GSAM 9—Erisubasikya Ekirimu ky'eriminyerera
GSAM 9.2Eyindi nzumwa y'erisubahulukya obwimiri bwa Loughborough ni erisubasikya omu biro byetu omwanya w'omubiri wa Ellen White omu mugambo w'ebyalaba n'omu Biblia, ng'omusaki, omukaniriri, n'owahabwa ongabane y'engabane y'Ekirimu, eyo Loughborough akaniaho omu bugerya bwuwe.
GSAM 9—Omugambo w'owalangira n'amaiso wuwe okwenene okwatsukirwako
GSAM 9.3Ebikanganisyo bikakanganaya esyonzumwa sitatolere erikeha sisatu esyaleka Ellen White, ihabirirenga ebirimo ng'90, inyalagira ati ekitabu kino kirandaganibwe omu bandu banenene, kandi ebinywa n'emigambo y'abo abahira emisingi y'omubiri bikeberibwe buhya n'erisubahulukibawa. (1) Abalangira n'amaiso wabo abo babya ibakinhola; neryo obwimiri bwabo obw'omulomo, obw'ebyo balabamo bone, bwabya ibukakihwa. (2) Esyonganda n'esyonganda sy'abandu ababya ibakinyingira omu kanisa, abatasi bone ebyo byabya oko nzuko kutse abandu abatsukako, bangaletire ekanisa eyitasi esyombitsi syayo esyahirwa na Nyamuhanga. (3) Emibiri y'esyongangirirya sy'amabehi yikendisyabya erirenga ekanisa, kwilaba omu mibere yayo y'obuhuma eyakanganibawa n'erilwa omu byabya e Minneapolis. Bitya eriyiketera ly'abandu banenene bati Omwami niyo wasondola omukukyo ono eritsuka kera likendisyabya erirengwa kutsibu omu syonzira nyinene, sy'embaganane kandi sy'erisamirisya. Kikendisyabya ky'obunene kwilaba erisubatondogola ndeke kandi n'obutoki ebikanganisyo by'okuboko kwuwe omu mubiri.
GSAM 9Ebinywa bihambire oko Kihande A ky'eryongerako
GSAM 9.4Obutasi obukabulyaya n'erisweka bw'abo abatetsilangira n'amaiso wabo bwalangirwa omu ngebe ya Mugala wetu Loughborough yene. Ekya erilangirirako kiguma ng'ekyo ni kyo kyamukuna erisaka ebyo bihirirwe hano ng'Ekihande ky'eryongerako. Tukalangiramo olukengerwa n'omuhigo erihira omw'isubirya liwe omo kitabu kino, kusangwa kino ky'engendo y'erimbere kyabirihulukibawa. Twaminya ng'oku lirine busana n'erikaniaho ly'omu hitabu hya L. E. Froom, Eribana abimiri b'obuminyereri ababya babirihera. Tukatula ebinywa bya Froom ebikatondogolaya omugambo w'ekisakango ekyo kiri Ekihande A ky'eryongerako:
GSAM 10.1Ekindi ky'erinene ekyongerwa kyabya kisakango kinene ekyo J. N. Loughborough asaka kitseka-kitseka n'ekyuma ky'ekera kya Blick eky'eritumira ebinywa n'amasanyarazi n'erisaka, byosi omu syonzamba nyinene. Kyabya erisubirya liwe, eryateka-tekibawa omo 1918, ihakine endambi nyike embere sy'oluholo liwe, oko myatsi y'amabehi n'erihindula ebyabya n'eritasaka eby'okwenene, eyo abandi bakahakania bamugasirako omu ndambi nyike eyatsuka embere. Emikasando eyo yabya iyihambire oko bitabu biwe by'erimbere ebyatondogola enzuko y'Omukukyo w'eryasa lya Kristo. Ekisakango eki kyabere kyahiribwa oko nyumba nguma y'oku manyumba wetu w'erihulukya ebitabu, kyabya kikaminyikana kiti sikyabya n'omugaso oko bandu abanenene oyu wangatolere erileka ikyahulukibawa. Busana n'ekyo mukyasubiribwa oko musaki.
GSAM 10.2Omu birimo biwe by'obukulu, Omulisya Loughborough mwaha ekisakango ekyo H. A. Washburn, owabya oku ndambi eyo mukangirirya w'omugambo w'ebyalaba oko Kalasi ya Pacific Union, oyu wakitwala n'obunene n'eribikakyo. Ekiro kiguma enyumba nyike y'omukangirirya oyo muyasya yosi, haguma n'ekibikiro kiwe kibuya ky'ebitabu. Ebitabu bike ebyo asigalana byabya oko mesa yiwe oko kalasi. Omu byo mwabya ekisakango eki, kyawite omutwe oyu “Emyatsi mike y'ebyo nalabamo.” Oko muhindo w'ekitunga kyage ky'erimbere ky'esyongangirirya oko Mukukyo w'abakwami ba Miller, eyo nasabibwa erikangirirya oko nzuko y'Obwiyisya bw'e Biblia bw'ababirirengayo, obwateyibawa omu kirimo ekyo oko Kalasi ya Pacific Union, Omukangirirya Washburn mwaleta ekisakango eki n'erihirakyo omu byala byage, anabugire ati: “Lino namayitegererya busanaki ekisakango kino kyatolere eribya kiguma oko bindu bike ebyalamilibwa omu kibikiro kyage kyosi ky'ebitabu omw'ibya oko mesa yage oko kalasi. Nyamuhanga abya anzire ikyabikibwa busana n'omubiri ono. Wuhirekyo omu Kibikiro ky'ebisakango eby'enzuko y'eryasa lya Kristo.”—esyopapula 48, 49
GSAM 10Omwami akakola haguma n'abandu
GSAM 10.3Omw'iminya ekitsweka ky'obuhangiranwa bw'abandu ng'oku bukalangirwa omu mitima yetu, tukaminya ndeke obuteheke bw'esyonumbi sy'ebumba esyo Omwami abirikola nasyo erilwa kera. Tukaha ekitabu kino erisikyamo erikirirya omu nzira eyo Omwami abirikoleramo, si eriyombeka eriyiketera ly'amabehi omu buteheke bw'abandu abo akolesya erisonda erikola eby'enzanza yiwe. Situkasonderabo eby'eriyitangira omu syonzira syosi esyo emibere y'obundu y'abalume n'abakali ba Nyamuhanga aba yangabanikamwo oko musondi w'okwenene ow'omutima wosi omu biro byetu bino, omugulu akasoma ekitabu kino kutse ogundi mugambo w'emigulu ey'obunene eyo. Nyamuhanga abirikola erilwa kera haguma n'abandu, obundu ibuguma haguma n'obunya-Nyamuhanga (Abanya Efeso 2:20). Tukale itukahulikirira omulenge wuwe, n'omu binywa by'abandi ebiri n'obuteheke. “Mutegaye obuminyereri; mukeberaye ebindu byosi; mukwate ndeke ekibuya.” (1 Abanya Tesalonike 5:20, 21). (Langira Amakwenda awasombolibawa 3:342-347.)
GSAM 11Omugulu w'eritsuka niyo atondogolibwe kwilaba
GSAM 11.1Tukalangira ng'omugaso munene kwilaba w'ekitabu kino ni erisubirya ebibulyo binene (kutsibu n'ebitatebiribuliwa) ebihambire oko mugulu wetu w'eritsuka n'oko birimo by'erimbere. Ebindi bibulyo ebihambire oko byo ekanisa yalabamo enyuma, oko muhindo w'ekyasa ky'erikumi n'omwenda n'erilwa oku ndambi eyo, bikasubiribwa ndeke kwilaba ahandi. Omukwenda w'Omwami abiritondogola omu Bwimiri emibere y'ekanisa y'oko ndambi eyo, ekyakakala ekyo Omwami asonda erileta omo 1888, n'ebyakalwa omw'igana ly'ekanisa eri Bukwenda eryo, busana n'omugulu oyo n'ebirimo ebikahika omu biro byetu.
GSAM 11.2Kiri ky'obunene erilangira embaganane ahokati k'erimalayo ly'ebyo abandu balindirire, eryabiribya mugabo w'abandu ba Nyamuhanga omu migulu yosi, abalindirira n'amaha bati bali hakuhi n'eryasa ly'Omwami nikwa mubahabwa ebikanganisyo biti siliri ly'omu mugulu wabo, n'erimalayo ly'enzanza y'Omwami, omugulu atuletera, ng'abandu buwe, oko mbibi sya Kanana ng'oku akolera Israeli w'ekera, n'eribuga ati: “Mwingire”, nikwa itutatoka eriyingiramo busana n'obutikirirye. Tulangire aho turi n'ebyaleka itwabya hano. Twige eby'eryiga by'abasokulu betu, tutondogole omuyisa n'eriyiyinia ly'Omwami, n'erimuleka akole omw'isi wetu kandi omu syonzira syetu ekyo atatoka erikola, ihabirirenga ebirimo 100.
GSAM 11.3(Langira Ekihande C ky'eryongerako.)
GSAM 11Eky'erikanakania n'erikola ky'ekanisa y'omugulu ono
GSAM 11.4Omu Bugerya bwa Mugala wetu Loughborough, mwabuga ati Abalindiriri b'eryasa lya Kristo abakateya ekiro ky'akalinda 100,000 ababya ekanisa y'oko ndambi eyo bakangania akagala n'omuhati ebyaleka ibalangirwa ng'abandu 2,000,000. Twamakolesya olulingiriranyo iwan'oluguma, twangatoka eribuga lino tuti abandu betu 6,000,000 bakalangirwa ng'abandu 120,000,000? Omugambo wuwe w'ebirimo by'erimbere akaleta ebihe by'erikanakania n'erikola oko kanisa y'omugulu ono?
GSAM 12.1Tukabasigira ebibulyo bindi ebitasibwe, itukasaba tuti ekitabu kino ekyasubahulukibawa kirete abandu erikanakania kubyo:
GSAM 12.2(1) “Omukukyo” wabirigenda hayi?
GSAM 12.3(2) Wabirikala omu bwiketerwa oko misingi yagwo?
GSAM 12.4(3) Embinduka esyo tukalangira omu kanisa erilwa omu biro bya Loughborough syangatoka erisoboleribwa erihika hehe omw'ilingiraniasyo n'embinduka sy'emibere y'abandu, kutse n'omubiri w'Omwami omu kati-kati ketu?
GSAM 12.5(4) Busanaki tukinahano, ihabirirenga ebirimo ng'150 erilwa oko nzuko y'omukukyo erirangirira liti erisuba lya Kristo liri hakuhi?
GSAM 12.6Omw'isubakebera omugambo wetu w'ebyalaba, n'omu ngendire oko buli kitseka ky'erigenda embere erihika oko mibere yetu y'omugulu ono, ngatoka eribuga nti: Nyamuhanga ahalambwe! Omugulu ngakalangira ebyo Omwami abirikola, ngakusulibwa n'eritangania haguma n'eriyiketera omu Kristo ng'omusondoli. Situwite kindu ky'eritisya busana n'omugulu oyukasa, erilusirirya itwamabirirwa enzira eyo Omwami atusondoleramo n'engangirirya yiwe omu mugambo wetu w'ebyalaba.—Emyatsi y'engebe ya Ellen G. White, 196
GSAM 12.7Iwetelusyaho ekiminyikalo ky'ekera eky'olubibi, ekyo basogokulu bawu bahiraho.—Emigani 22:28 Ekitunga ky'abasondoli b'Ekibikiro ky'ebitabu ky'abatsuki b'eryasa lya Kristo Loma Linda, California, ebiro 1 by'omukera owakasatu, 1992