Ndima ya 9 — Tshifhinga tsha U Lindela
GSAM 148.1“Nga tshenetsho tshifhinga muvhuso wa ṱaḓulu u ḓo fanyiswa na khomba dza fumi, dze dza dzhia mbone dzadzo dza bva dza ya u ṱangana na mukwasha. Ṱhanu khadzo dzo vha dzi na vhuṱali, ṱhanu dzi matsilu. Dze dza vha dzi matsilu dzo dzhia mbone dzadzo, dza si dzhie mapfura; dza vhuṱali dzone dzo dzhia mapfura zwidzhavheloni zwadzo khathihi na mbone dzadzo. Mukwasha a tshi lenga, dzoṱhe dza kumedza dza eḓela.”1
GSAM 148.2Kristo ndi mukwasha wa tshifanyiso.2 Ngauralo u bva ha khomba dzi tshi ya u ṱangana na mukwasha hu tea u imela tshigwada tsha vhathu vha Murena tsha u ṱangana na Kristo musi a tshi ḓa, ngauri mafhungo a Mateo ndima ya fumbili na nṋa na ya fumbili na ṱhanu a amba nga u ḓa ha Murena. Ipfi ḽa Murena ndi mbone.3 Khomba dzoṱhe dzo dzhia mbone dzadzo. Vhutsilu ha dziṅwe khomba ho vha hu u ṱanganedza pfunzo ya ngoho fhedzi, dzi sa ḓikumedzi kha Murena nga mbilu yavho yoṱhe, lune ha ita uri zwifhiwa zwa tshilidzi zwa Muya zwi aluwe mbiluni ya mutendi. Mushumo uyu u sumbedzwa tshifanyisoni nga “mapfura zwidzhavheloni zwadzo.” U lenga ha mukwasha hu tea u imela u nyabwa ha avho vhe vha bva vho lavhelela u ṱangana na Murena wavho.
GSAM 148Tshifhinga Tshine Tshifanyiso Tsha Amba Ngatsho
GSAM 148.3Ipfi “nga tshenetsho tshifhinga,” ḽine tshifanyiso tsha thoma ngaḽo, ḽi ri thusa u ḓivha tshifhinga tshine tsha amba ngatsho. Tshi tevhela zwenezwo zwe zwa ambiwa kha ndima yo fhiraho, hu si nga murahu ha u ḓa ha vhuvhili ha Murena, fhedzi nga murahu ha musi tshifanyiso tsha muhuyu tsho ḓivhadzwa, tshi tshi amba uri u ḓa ha Kristo hu “miṋangoni,” na uri ho ḓa murafho une wa sa ḓo fhira Kristo ene muṋe a sa athu u vhonala kha makole a ṱaḓulu. Tshi dovha tsha amba nga tshifhinga tshine vhaṅwe vha vhalanda vhe vha vha vha tshi ḓivhadza mulaedza vha amba mbiluni dzavho vha ri, “Murena wanga u khou lenga u ḓa; vha thoma u rwa vhalanda ngavho, na u ḽa na u nwa na zwidakwa.”
GSAM 149U Rwa Vhalanda Ngavho
GSAM 149.1Vhenevha vho vha vhe “vhalanda ngavho,” vha tshi ḓivhadza mulaedza muthihi nga u tendelana; fhedzi zwino vhaṅwe vhavho vha laṱa zwe vha zwi funza, vha “rwa” vhalanda ngavho vhane vha khou ṋea “zwiḽiwa nga tshifhinga tshazwo”—vha tshi amba nga u lugiselela hu ṱoḓeaho u itela u ṱangana na Murena ane a ḓo ḓa hu si kale. Vha “rwa” nga nḓila ye vhathu vha vha vho dzudzanya u rwa Yeremia ngayo. Vhathu vho ri, “Iḓani, ri mu rwe nga lulimi, ri si thetshelese na ḽithihi ḽa maipfi awe.”4 Ngauralo vhalanda avha vha thoma u funza nga nḓila ya u thivhela mushumo wa vhalanda “vha fulufhedzeaho.” Vhathu vha wonoyu mufuda vha vhudzwa ha pfi, “Ngauralo humbula nḓila ye wa ṱanganedza na u pfa ngayo, u zwi farelele, u rembuluwe. Arali u sa dzuli wo fhaṱuwa, ndi ḓo ḓa kha iwe sa mbava, nahone a u nga ḓo ḓivha tshifhinga tshine nda ḓo ḓa khatsho kha iwe.”5
GSAM 149.2Tshifanyiso tsha khomba tshi amba nga tshifhinga tshine “vhalanda ngavho” vha laṱa mulaedza wa u ḓa ha Murena hu re tsini, vha “thoma u rwa.” Vha dovha vha thoma u ita zwiṅwe—u “ḽa na u nwa na zwidakwa.” Vha ṱanganela minyanyani na avho vhane vha ṱoḓa u fusha nyemulo dzavho dza zwiḽiwa. Salomo o amba nga vha ngauralo a ri, “U songo vha vhukati ha vhanwi vha veine; vhukati ha vhaḽi vha ṋama vha sa ḓifari; ngauri tshidakwa na muḽaho zwi ḓo shaya.”6
GSAM 149U Nyabwa ha u Thoma
GSAM 149.3Zwino hu ḓo vhudziswa ha pfi, “Ndi zwifhio zwe zwa itea kha tshenzhelo ya u ḓa zwi tshimbidzanaho na maipfi aya?” Ho vha na zwe zwa itea zwi tshi tendelana tshoṱhe na vhuporofita. Avho vhe vha ḓivhadza mulaedza u swika nga Lambamai 1844 vho shuma vhukati ha zwivhidzo, nahone vhafunzi vha zwivhidzo zwo fhambanaho vho ṱanganela kha mushumo wavho. Nga zwenezwo vho vha vhe “vhalanda ngavho.”
GSAM 150.1Avho vhe vha ḓivhadza mulaedza vho funza uri maḓuvha a 2300 a Daniele 8:14 a ḓo fhela na ṅwaha wa Tshiyuda wa 1843, une wa vha kha ṅwaha washu wa 1844. Vho ḓivhadza uri tshifhinga tsha khaṱhulo ya Mudzimu tshi ḓo swika mafheloni a tshenetsho tshifhinga. Zwivhidzo zwoṱhe zwa shango nga tshenetsho tshifhinga zwo vha zwi tshi tenda uri ḓuvha ḽa khaṱhulo ḽi ḓo thoma nga u ḓa ha vhuvhili ha Murena washu. Ngauralo zwi a leluwa u vhona uri Vha-Adventist vho vha vha tshi humbula uri Murena u ḓo ḓa mafheloni a tshenetsho tshifhinga tsha vhuporofita. Vho ri, “Tshifhinga itshi tshi nga fhela na ṅwedzi, nga 21 Ṱhafamuhwe 1844, mafheloni a ṅwaha wa Tshiyuda wa mupo wa 1843.” Ngauralo vho sedza mafheloni a Ṱhafamuhwe kana mathomoni a Lambamai 1844 sa tshifhinga tshine Mutshidzi a nga ḓa ngatsho.
GSAM 150Vhalanda Vhavhi vha a Ḓivhonadza
GSAM 150.2Musi mafhelo a Ṱhafamuhwe a tshi swika a fhira, Murena a sa ḓi, avho vhe vha vha vho shuma na vhaḓinḓa vha Murena, fhedzi vha songo ḓikumedza nga vhutshilo havho hoṱhe na nga mbilu yavho yoṱhe kha mulaedza, vho u shandukela, vha thoma u pikisa mushumo, vha ita zwoṱhe zwe vha kona u thivhela nḓila ya avho vhe vha bvela phanḓa vha tshi funza pfunzo ya u ḓa ha Murena hu re tsini na mulaedza wa tshifhinga tsha khaṱhulo. “Mbiluni dzavho” vho ri, “Murena wanga u khou lenga u ḓa.” Zwino nga milomo yavho vho funza uri shango ḽoṱhe ḽi tea u rembuluwa Murena a sa athu u ḓa; uri Vhayuda vhoṱhe vha tea u humela Palestina, vha dovhe vha thome vhurabeli ha thembeleni ngei Yerusalema, Messia a sa athu u ḓa. Vhaṅwe vho vhuya vha funza uri u ḓa ha Kristo ndi “u ḓa ha muya,” hu iteaho musi muthu a tshi rembuluwa, na musi vhathu vhawe vha tshi fa.
GSAM 151U Ṋea “Zwiḽiwa nga Tshifhinga Tshazwo”
GSAM 151.1Musi avha vha tshi shandukela vhalanda ngavho nga nḓila iyi, avho vhe vha vha vha tshee vho farelela lutendo vho kuvhanganya vhatendi holoni na zwiṱakani zwa miri, vha vha ṋea “zwiḽiwa nga tshifhinga tshazwo”—vha tshi vha sumbedza uri zwiga zwa zwifhinga na vhuporofita ho ḓadzeaho zwo vha zwi tshi amba, sa zwe zwa vha zwi tshi amba vha sa athu u nyabwa, uri u ḓa ha Kristo ho vha hu “tsini, miṋangoni.”
GSAM 151Minyanya ya u Ḽa Zwivhidzoni
GSAM 151.2Musi vha tshi khou ita zwenezwi ho thoma zwe zwa vha zwi sa ḓivhei zwivhidzoni zwa Vhaprotestante—u kuvhanganya vhathu kerekeni uri vha ḽe minyanyani na u “ḓitakadza nga mitambo.” Vhoṱhe vhe vha vha vha tshi nga ḓa vho rambiwa u ḽa navho zwiḽiwa zwavho zwi ḓifhaho.
GSAM 151.3Lwa u thoma ri tshi pfa nga zwiṅwe zwa mufuda uyu ngei Amerika ho vha hu nga ṅwedzi wa Shundunthule 1844, nga murahu ha u nyabwa. Zwo itea nga nḓila iyi: musi William Miller e holoni ngei Rochester, N.Y., a tshi khou funza na u ṱuṱuwedza Vha-Adventist vha maḓana o vhalaho, a tshi vha vhudza a ri, “Ri kha tshifhinga tsha u lindela tsha Mateo fumbili na ṱhanu; farelelani lutendo lwaṋu; hu si kale ri ḓo vha na tshedza tsho engedzeaho kha mafhungo aya,” ho dzudzanywa “vhuṱambo” kha tshipiḓa tsha fhasi ha mavu ya iṅwe ya kereke khulwanesa dza Rochester. Ho kuvhangana gogo ḽa vhathu, miraḓo ya tshivhidzo na vha sa tendi, nahone musi muhulwane wa khoḽidzhi ya vhufunzi a tshi takadza gogo nga u kolela William Miller, vho vha rengisela zwipuka zwa lwanzheni zwiḽiwaho zwa maganda mavhili, khirimu yo omaho nga phepho, zwiluḓi, na tshibugwana nga sente dza fumbili na ṱhanu tshe uyu munna a vha o tshi ṅwala. Bugu yo vha i tshi pfi U Anetshela Pfunzo dza Miller Khagala.
GSAM 151.4Hu sa athu u fhela vhege mbili u bva nga tshenetsho tshifhinga tshiṅwe tshivhidzo kha wonoyo muḓi tsho dzudzanya “vhuṱambo” holoni ya vhathu vhoṱhe, vha tshi badelisa sente dza fumbili na ṱhanu dza u dzhena, vha tshi ramba vhoṱhe vhane vha funa u ḓa u ḽa navho zwipuka zwa lwanzheni zwiḽiwaho zwa maganda mavhili, khirimu yo omaho nga phepho, khekhe na zwiluḓi. Henefho ndi hone he minyanya iyi ya musalauno ya u ḽa zwivhidzoni ya thoma, ye ya bveledza “miṱangano ya vhutsilu ya u ḓitakadza,” “zwikhwama zwa u sokou dzhia zwifhiwa,” “madamu a u fasha khovhe dza mitambo,” “miṱangano ya u mamana,” na zwiṅwe. Minyanya iyi ya u ḽa zwivhidzoni yo hula lune zwino tshifhaṱo tsha kereke ya musalauno tsha si dzhiiwe tshi tsho teaho arali tshi si na khishi, fhethu ha u vhea zwiḽiwa na kamara ya u ḽela. Vhuimo uhu ha zwithu ndi hone he ha thoma kha “tshifhinga tsha u lindela,” sa zwe zwa sumbedzwa tshifanyisoni.
GSAM 152.1Wm. Miller ene muṋe u amba nga zwe zwa itea ngei Rochester nga maipfi a tevhelaho:
GSAM 152.1“Muṅwe wa vha re na D.D. ngei Rochester, Vho _____, vha tshivhidzo tsha _____, o ṅwala tshibugwana tsha u pikisa pfunzo dza Miller, a vhidzela vhahulwane vhawe vha vhanna na vhafumakadzi nḓuni ya Murena, a ita munyanya muhulu wa zwipuka zwa lwanzheni zwiḽiwaho zwa maganda mavhili na miṅwe ‘minyanya ya nnḓa,’ sa Belesatsara; vha nwa gofhi yavho na tie, vha ḽa zwiḽiwa zwavho zwi ḓifhaho zwi ḓuraho, vha rengisa khirimu yavho yo omaho nga phepho na zwiluḓi, na tshibugwana tshawe tsha u pikisa u ḓa ha vhuvhili ha Mutshidzi washu a funwaho.
GSAM 152.2“Vhusikuni ha nga phanḓa ha musi ndi tshi ṱuwa, muṅwe wa vhafunzi avha o vha na munyanya wa zwiḽiwa nḓuni ya vhaeni, kana holoni, a rengisa sa zwe zwa ambiwa afho nṱha, dzithikithi dzawe, khirimu yo omaho nga phepho na zwiluḓi. Ndo takala u pfa uri zwiṅwe zwa zwivhidzo zwa zwigwada zwo fhambanaho a zwo ngo tendelana na minyanya yo raloho ya Babele; nahone ndi fulufhela mbiluni yanga uri a si zwivhidzo zwoṱhe zwa zwigwada izwi zwine zwa ḓo wanwa zwi tshi khou ‘ḽa na u nwa na zwidakwa’ Kristo a tshi ḓa. Ndi a mangala uri vhafunzi avha a vha ḓivhoni kha tshivhoni tsha ipfi ḽa Mudzimu; nahone ndi nga vha eletshedza uri vha vhale Luka 14:12-14; Mateo 24:48-51; Luka 13:25-28; 2 Petro 2:13; Yuda 10-21. Vhukuma, izwi ndi zwifhinga zwa vhufhelo.”
GSAM 152.3Arali Muhulwane Miller o vha o vhona zwe zwivhidzo zwa dzhena khazwo u bva nga tshenetsho tshifhinga, kha minyanya yazwo ya u kuvhanganya miṋeelo, ine ya vha na “khekhe dza u humbulela hune ringi ya vha hone, miṱangano ya u mamana nga sente dza fumi, maṱano a donngi, miṱangano ya vhutsilu ya u ḓitakadza, mitambo ‘mikhethwa’ ya u khetha nga mashudu,” na miṅwe mitambo ya mashudu, na zwiṅwe, o vha a tshi ḓo zwi shavha o tshuwa nga u ofha hu khethwa.
GSAM 152Tshifhinga tsha U Lindela
GSAM 152.4Vha-Adventist vho wana khuthadzo kha ngoho ya Maṅwalo ya uri musi hu tshi ḓivhadzwa u ḓa ha Murena hu re tsini hu ḓo vha na “tshifhinga tsha u lindela” tshi tshimbidzanaho nazwo. Izwi vho zwi vhona kha maipfi a Mutshidzi washu kha Mateo 25:5, 6, na kha Habakuku 2:1-3.
GSAM 153.1Nga ha vhuimo havho tshifhingani tsha u ṱuma ha zwimela tsha 1844, ri redza kha Mukosi wa Vhukati ha Vhusiku wa 9 Shundunthule 1844:—
GSAM 153.2“Musi ro no fhira fhethu he zwa vhonala uri zwifhinga zwa vhuporofita zwi ḓo fhela hone, ro vha kha vhuimo he Mudzimu a vha o zwi vhona kale uri vhana vhawe vha ḓo vha khaho mafheloni a bono; nahone o ita ndugiselelo nga muporofita Habakuku, musi a tshi ri, ‘Ndi ḓo ima fhethu hanga ha u linda, nda ḓivhea nṱha ha mutsheṱo, nda linda u vhona zwine a ḓo amba na nṋe, na zwine nda ḓo fhindula musi ndi tshi kaidzwa,’ kana sa zwine zwa vhalwa kha luṱa lwa siaṱari, ‘ndi tshi pikiswa.’ ‘Murena a mphindula a ri, Ṅwala bono, u ḽi bvisele khagala kha mbaba, uri a ḽi vhalaho a kone u gidima. Ngauri bono ḽi tshee ḽa tshifhinga tsho vhewaho, fhedzi mafheloni [a zwifhinga zwa vhuporofita] ḽi ḓo amba, ḽi si zwifhe: naho ḽi tshi lenga [u fhira mafhelo azwo ane a vhonala], ḽi lindele; ngauri ḽi ḓo ḓa zwa vhukuma, [musi zwifhinga zwa vhuporofita zwo ḓala, ḽa sa ḓo zwi fhira] a ḽi nga ḓo lenga.’7
GSAM 153.3“Uri ndayo iyi i amba nga tshifhinga tsha zwino, zwi vhonala kha zwe Paulo a zwi redza kha Vhaheberu 10:36-39: ‘Ngauri ni ṱoḓa u konḓelela, uri musi no no ita zwine Mudzimu a funa, ni wane zwe zwa fulufhedziswa. Ngauri hu tshee ho sala tshifhinganyana, ane a ḓo ḓa u ḓo ḓa, a si lenge. Zwino o lugaho u ḓo tshila nga lutendo; fhedzi arali muthu a tshi humela murahu, muya wanga a u nga ḓo takadzwa ngae. Fhedzi riṋe a ri vha u humela murahu vha lovha; ri vha tendaho uri muya u tshidzwe.’
GSAM 153.4“Ri tenda uri ri kha tshenetsho tshifhinga tshe Mutshidzi a amba ngatsho, musi mukwasha a tshi lenga (Mateo 25:5)—tshine muvhuso wa ṱaḓulu wa tea u fanyiswa natsho,—musi ‘mulanda muvhi uyo [musi zwo no vhonala uri tshifhinga a tsho ngo ḓadzea] a tshi ḓo amba mbiluni yawe a ri, Murena wanga u khou lenga u ḓa, a thoma u rwa vhalanda ngae, na u ḽa na u nwa na zwidakwa,’ Murena a ‘ḓa nga ḓuvha ḽine a sa mu lavhelele ngaḽo.’
GSAM 154.1“Ri tenda uri zwino ri kha tshifhinga tshe Petro a amba ngatsho, musi ‘khaṱhulo yavho ye ya dzula yo vhewa kale i sa lengi, na u laṱwa havho hu sa kumedzi;’ he vha vha vha tshi ḓo ‘dzhenisa tshiphirini pfunzo dza vhufhura dzi lovhisaho.’8 Petro u ri avha vho vha vha tshi ḓo vha hone, sa zwe ha vha hu na vhaporofita vha mazwifhi musi Maṅwalo a tshi ṅwalwa. Ngauralo, sa zwe vha nḓu ya Isiraele vha ri, ‘Maḓuvha a khou engedzea, na bono ḽiṅwe na ḽiṅwe a ḽi ḓadzei,’9 ho vha hu tshi tea u vha na tshifhinga tshine tshifhinga tsho vhewaho tsha vhonala tsho fhira, uri vhagoḓi vha 2 Petro 3:4 vha kone u vhudzisa vha ri, ‘Fulufhedziso ḽa u ḓa hawe ḽi ngafhi?’ vha ḓifhura nga uri ‘zwoṱhe zwi bvela phanḓa sa zwe zwa vha zwi zwone u bva mathomoni a tsiko.’
GSAM 154.2“Ri tenda uri muapostola Yakobo o vha a tshi khou humbula nga u lenga ho raloho ha bono musi a tshi ri, ‘Ngauralo, vhahashu, konḓelelani u swika Murena a tshi ḓa;’ ‘na inwi konḓelelani; khwaṱhisani dzimbilu dzaṋu: ngauri u ḓa ha Murena hu tsini.’ Na uri, ‘Vhonani, Muhaṱuli o ima phanḓa ha muṋango.’
GSAM 154.3“Nahone ri tenda uri Mutshidzi washu o ri kaidza a tshi khou dzula a tshi humbula nga u fhira ha tshifhinga tsho lavhelelwaho, kha ndima ya vhufumi na mbili ya Luka, a ri, ‘Kha ni vhe no vhofha khundu dzaṋu, na mbone dzaṋu dzi tshi duga; inwi ni nge vhanna vhane vha lindela Murena wavho musi a tshi vhuya munyanyani wa mbingano; uri musi a tshi swika a rwa muṋango, vha mu vulele nga u ṱavhanya.’10 U lindela zwi amba uri tshifhinga tsho fhira, ngauri tshenetsho tshifhinga tshi sa athu u swika a ri lindeli. Ngauralo Murena washu u dovha a ri, ‘Vho fhaṱutshedzwa vhalanda avho vhane Murena musi a tshi ḓa a ḓo vha wana vho linda.’
GSAM 154.4“Ri ḓo bvela phanḓa, Mudzimu a tshi funa, ri tshi ḓivhadza ra ri, ‘Vhonani, mukwasha u khou ḓa; ibvani ni mu ṱanganele;’ na uri, ‘Tshifhinga tsha khaṱhulo yawe tsho swika.’ Nahone ri fulufhela uri a ri nga kundelwi u bvela phanḓa ri tshi vhidzelela nga ipfi ḽihulu shango na tshivhidzo, uri vha ḓivuse kha nyimbo dzavho dza ‘mulalo,’ vha thetshelese Mudzimu musi a tshi vha vhidzela kha khathutshelo yawe. Ro ḓiimisela u bvela phanḓa ri tshi lindela u ḓa ha Murena ro fhaṱuwa, ri tshi tenda uri hu tsini-tsini na riṋe.”
GSAM 155U Imelela Mushumo Wavho
GSAM 155.1U vhala maipfi a tevhelaho, o dzhiiwaho kha thero i re na ṱhoho “U Imelela,” kha Muḓivhadzi wa U ḓa wa 13 Ḽara 1844, wo gandiswaho nga J. V. Himes, S. Bliss na A. Hale, zwi nga ri thusa u pfesesa zwavhuḓi uri Vha-Adventist vho vha vha tshi dzhia hani mushumo wavho hu sa athu u swika 21 Ṱhafamuhwe 1844, na nga murahu ha ḽeneḽo ḓuvha:—
GSAM 155.2“A ro ngo ṱavhanyedza u ṱanganedza mihumbulo yashu. Ri tenda uri ro vha ri vhaṱoḓi vha ngoho vha fulufhedzeaho vha re na dzimbilu dza ngoho. Ro thetshelesa ndaela ya Mutshidzi washu ya u ṱoḓisisa Maṅwalo. A ro ngo fulufhela vhuṱali hashu; fhedzi ro lavhelela Mudzimu uri a ri range phanḓa a ri livhise, ra lingedza u ḓivhea kha aletare yawe, ri tshi fulufhela uri u ḓo livhisa maga ashu zwavhuḓi. Ro ṱolisisa mbuno dzoṱhe dze dza ṋewa u ri pikisa, ri na lutamo lwa vhukuma lwa u ḓivha ngoho na u vhulungwa kha vhukhakhi; fhedzi ri tea u tenda uri mihumbulo minzhi yo fhambanaho ya vhapikisi vhashu yo sokou ri khwaṱhisa kha zwe ra vha ri tshi zwi tenda. Ro vhona uri naho ri tshi nga vha ro luga kana ro khakha, vhapikisi vhashu vho vha vha sa koni u vha vho luga; nahone vhone vhaṋe vho vha vha sa tendelani. Mbuno dza muṅwe na muṅwe dzo vha dzi si na maanḓa, dzi tshi nga dza vhana, lwe vha tea u dzulela u thutha zwe vhone vhaṋe vha zwi fhaṱa; nahone nga mihumbulo yavho i lwisanaho i hanedzanaho vho sumbedza uri naho vha tshi nga dzhia hani mihumbulo yashu, vho vha vha sa fulufheli mihumbulo ya vhaṅwe vhavho. Zwiṅwe hafhu, ho vha hu si na na mbuno nthihi ya ndeme kha lutendo lwashu lwoṱhe ye ra vha ri sa tikedzwi khayo nga muthihi kana vhanzhi vha avho vhe vha lingedza u hanedza u ḓa ha Murena hu re tsini. Musi ri tshi tikedzwa nga u ṱalutshedza Maṅwalo nga zwine maipfi ao a amba zwone, vhapikisi vhashu vho lingedza zwi sa vhuyedzi tshithu u sumbedza uri Maṅwalo ha tei u pfeseswa nga zwine maipfi ao a amba zwone, naho vhuporofita hoṱhe ho no ḓadzeaho ho ḓadzea nga yeneyo nḓila na kha zwipiḓa zwaho zwiṱukusa.
GSAM 156U Ṱalutshedzwa ha U Nyabwa
GSAM 156.1“Fhedzi tshifhinga—ṅwaha wa 1843, ṅwaha wa Tshiyuda—tsha fhira, ra nyabwa nga u sa vhona Khosi kha lunako lwayo. Nahone vhoṱhe vhe vha ri pikisa vho vha vha tshi tenda nga ngoho uri zwiṱaluli zwoṱhe zwa lutendo lwashu zwo sumbedzwa uri ndi mazwifhi; na uri ri tea, sa vhathu vha fulufhedzeaho, u laṱa zwoṱhe zwe ra vha ri tshi zwi tenda. Ngauralo vho mangala vha tshi vhona ri tshee ro farelela fulufhelo ḽashu, ri tshee ro lavhelela Khosi yashu.
GSAM 156.2“Naho zwo ralo, riṋe kha u nyabwa hashu a ro ngo vhona tshiitisi tsha u kulea nungo. Ro vhona uri Maṅwalo a sumbedza uri hu tea u vha na tshifhinga tsha u lindela, na uri musi bono ḽi tshi lenga ri tea u ḽi lindela. Ro dovha ra vhona uri mafheloni a ṅwaha tshifhinga tshi nga si vhe tsho fhela tshoṱhe, naho ra tenda uri mavhalele ashu a zwifhinga o vha o luga; na uri zwifhinga izwo zwo vha zwi tshi nga ḓadzea fhedzi nga tshiṅwe tshifhinga kha ṅwaha uno; naho zwo ralo, ro tenda khagala na nga vhuḓalo phanḓa ha shango uri ro khakha kha tshifhinga tsho tiwaho tshe ra tshi lavhelela nga fulufhelo ḽingafho; fhedzi naho ro khakha nga nḓila iyi, ri a kona u vhona tshanḓa tsha Mudzimu kha eneo mafhungo. Ri kona u vhona uri o shumisa u ḓivhadza honoho sa tsivhudzo kha shango, na sa mulingo kha tshivhidzo. Zwo ita uri vhathu vhawe vha dzule vho lavhelela. Zwo vhidza zwa bvisa vhe vha vha vho ḓiimisela u shengela dzina ḽawe. Zwo sumbedza uri ndi vhafhio vhe mukosi wa u ḓa ha Murena wa vha kha vhone mafhungo a dakalo ḽihulu, na uri ndi vhafhio vhe wa vha kha vhone mubvumo u sa funwi nḓevheni dzavho. Zwo sumbedza tsiko yoṱhe uri ndi vhafhio vhane vha ḓo ṱanganedza u vhuya ha Murena, na uri ndi vhafhio vhane vha ḓo mu landula kha u ḓa ha vhuvhili, sa zwe Vhayuda vha ita kha u ḓa hawe ha u thoma. Nahone ri zwi dzhia sa ḽiga ḽa u ḓadzisa ndivho ya Mudzimu, kha iḽi ‘ḓuvha ḽa ndugiselelo yawe,’ uri a bvise vhathu vhane vha ḓo ṱoḓa fhedzi zwine Murena a funa, uri vha lugiselelwe u ḓa hawe.”
GSAM 157ḒIVHAZWAKALE YA TSHIGWADA NGA MURAHU HA ṰHAFAMUHWE 1844
GSAM 157.1Ḓivhazwakale pfufhi ya tshigwada tsha u ḓa nga murahu ha 21 Ṱhafamuhwe 1844 i sumbedzwa kha maipfi a tevhelaho, o dzhiiwaho kha Zwiga zwa Zwifhinga ya 31 Tshimedzi 1844:—
GSAM 157.2“Nga murahu ha u fhira ha 1843,—ṅwaha wa Tshiyuda,—vhunzhi ha Vha-Adventist vho dzika kha lutendo lwa uri u bva zwino a ri tsha nga vhalela zwifhinga zwo tiwaho nga vhuṱanzi. Vho tenda uri ro vha ri fhethu he mavhalele ashu a zwifhinga a sumbedza hone, mafheloni a zwifhinga zwoṱhe zwa vhuporofita, zwine mafheloni azwo ha lavhelelwa u ḓa; nahone naho ro vha ri tshi ḓo tea u lindela fhedzi tshifhinganyana tshine mavhalele ashu a nga fhambana ngatsho na tshifhinga tsha Mudzimu, vho tenda uri a ri tsha ḓo vha na tshine tsha ri thusa u ḓivha tshifhinga tsho tiwaho. Vhoṱhe vho vha vho dzhia mbone dzavho vha bva vha ya u ṱangana na Mukwasha; fhedzi Mukwasha o vha o lenga a fhira tshifhinga (1843) tshe a vha o lavhelelwa ngatsho. Musi bono ḽi tshi khou lenga nga u ralo, zwo vhonala uri vhoṱhe vho ḓiimisela u ḽi lindela, vha tshi tenda uri ḽi nga si lenge, na uri ḽi nga lavhelelwa tshifhinga tshiṅwe na tshiṅwe. Naho zwo ralo, hu si kale zwo vhonala khagala uri vhanzhi vho vha vha tshi khou ita ndugiselelo dza matshelo, dze vha vha vha sa ḓo dzi ita arali vha tshi tenda uri Murena u ḓo ḓa ṅwaha uno; na uri vho vha vho eḓela kha u pfesesa ha vhukuma uri u vhonala ha Murena hu tsini-tsini. Nga maṅwe maipfi, vho humbula uri a nga ḓa ḓuvha ḽiṅwe na ḽiṅwe, kana uri zwi nga lenga tshifhinganyana, tshine vha nga ḓiphiṋa ngatsho nga u awela hu vha homolosaho. Zwino, izwi zwo vha zwi nga zwe Mutshidzi washu a amba uri zwi ḓo vha zwone, ‘Mukwasha a tshi lenga, vhoṱhe vha kumedza vha eḓela.’
GSAM 157U Livhisa Mihumbulo kha Tshifhinga tsha U Wa ha Maṱari tsha 1844
GSAM 157.3“U bva nga Shundunthule 1843, Muraravho Miller o vha o livhisa mihumbulo yashu kha ṅwedzi wa vhusumbe wa ṅwaha mukhethwa wa Tshiyuda, sa tshifhinga tsha u ita mikhuvha ya zwifanyiso zwine zwa sumbedza u ḓa ha vhuvhili; nahone tshifhingani tsho fhiraho tsha u wa ha maṱari ro lavhelela tshenetsho tshifhinga nga dzangalelo ḽihulu. Musi tsho no fhira, Muraravho S. S. Snow o ṱanganedza tshoṱhe muhumbulo wa uri, u ya nga zwifanyiso, u ḓa ha Murena, musi hu tshi itea, hu tea u itea nga ḓuvha ḽa vhufumi ḽa ṅwedzi wa vhusumbe; fhedzi o vha a sa khwaṱhisi nga ha ṅwaha. Nga murahu o vhona uri zwifhinga zwa vhuporofita a zwi fheli zwa vhukuma u swika kha ṅwaha uno wa 1844; zwenezwo a ima o khwaṱha kha muhumbulo wa uri tsini na 22 Tshimedzi—ḓuvha ḽa vhufumi ḽa ṅwedzi wa vhusumbe wa ṅwaha uno—ri ḓo vhona u ḓa ha Murena wa vhugala. Izwi o zwi funza ngei New York, Philadelphia na huṅwe fhethu tshifhingani tsho fhiraho tsha u ṱuma ha zwimela na tshilimo; nahone naho vhanzhi vho ṱanganedza mihumbulo yawe, ho vha hu sa athu u vhonala mvelelo dza hone nga nḓila yo khetheaho u swika tsini na Fulwana.
GSAM 158Zwiliṅwa zwo Siwaho Masimuni
GSAM 158.1“Mathomoni a tshenetsho tshifhinga vhaṅwe vha vhahashu devhula ha New Hampshire vho vha vho kwamea nga maanḓa nga lutendo lwa uri Murena u ḓo ḓa tshifhefho tshiṅwe tshi sa athu u swika, lwe vha si lime masimu avho. Tsini na vhukati ha Fulwana,—he ha vha hu madekwana a vhukati ha vhusiku ha ḓuvha ḽi imelaho ṅwaha ḽa Tshiyuda (madekwana-matsheloni, hu tshi vhalwa u bva kha ṅwedzi muswa wa Lambamai, mathomo a uno ṅwaha wa Tshiyuda), vhaṅwe vhe vha zwala vha ṱavha masimuni avho vho kwamea nga maanḓa nga u pfesesa uri u vhonala ha Murena hu tsini-tsini, lwe vha si kone u kaṋa zwiliṅwa zwavho vha tshi tshimbidzana na lutendo lwavho. Vhaṅwe, musi vha tshi ya masimuni avho u rema hatsi, vho ḓiwana vha sa koni na luthihi u bvela phanḓa, nahone, vha tshi ita zwe vha vha vha tshi vhona uri ndi mushumo wavho, vha sia zwiliṅwa zwavho zwo ima tsimuni, uri vha sumbedze lutendo lwavho nga mishumo yavho, na u haṱula shango nga u ralo. Izwi zwo ṱavhanya zwa phaḓalala devhula hoṱhe ha New England.
GSAM 158Khaṱhulo i Tea u Ranga Phanḓa U ḓa
GSAM 158.2“Nga tshenetsho tshifhinga vhahashu ngei Maine vho ṱanganedza muhumbulo wa uri khaṱhulo i tea u ranga phanḓa u ḓa; uri i itea nga tshifhinga tshithihi na khaṋo, nahone a i sokou vha mafheloni a shango fhedzi, fhedzi i dzhia tshifhinga tshi re tsini-tsini na magumo a sa athu u swika. U ya nga muhumbulo uyu, vho humbula uri ro vha ri kha khaṱhulo, uri ho vha hu tshi khou talwa mutalo wa u khethekanya, na uri vhalanda vha Mudzimu vho vha vha tshi khou swaiwa kha phanḓa dzavho, hune u fhela ha zwenezwo ha vha tshiga tsha uri vharuṅwa vhaṋa vho faraho mimuya miṋa ya ḽifhasi (Nzumbululo 7:1), vha i vhofholole.
GSAM 159U Vuwa Vhukati ha Vhusiku
GSAM 159.1“Tsini na vhukati ha Fulwana phaṱhutshedzo ya Mudzimu ya u vhuyisa vho humelaho murahu yo thoma u vha hone musi hu tshi ḓivhadzwa tshifhinga, nahone vhe vha ṱanganedza muṅwe wa mihumbulo yo ambiwaho vho sumbedza tshanduko i vhonalaho kha vhuḓifari havho, na u vuwa khofheni nga u ṱavhanya, sa zwe zwa dzula zwo ambiwa. ‘Vhukati ha vhusiku ha pfala mukosi wa uri, Vhonani, Mukwasha u khou ḓa; ibvani ni mu ṱanganele. Zwenezwo khomba idzo dzoṱhe dza vuwa dza lugisa mbone dzadzo.’ U bva nga Fulwana zwigwada izwi zwo vha zwi zwipiḓani zwo fhambanaho zwa New England, zwi sa ṱangani; fhedzi zwoṱhe zwo vha zwi na phaṱhutshedzo ya Mudzimu ya u vhuyisa vhanzhi vhe mbone dzavho dza vha dzo no ṱoḓou dzima, na ya u ita vhakhethwa vhawe uri vha vhe vhakhethwa. Kha muṱangano wa khempu wa Exeter, hezwi zwoṱhe zwo ṱangana, zwa ṱanganyiswa zwa vha tshigwada tshithihi tshihulwane, zwa ṱavhanya zwa phaḓalala kha zwigwada zwoṱhe zwa u ḓa kha shango.”