Ndima ya 19 — “Ni ḓo vha ḓivha nga Mitshelo Yavho”
GSAM 299.1“O ṋea vhaṅwe uri vha vhe vhaapostola, vhaṅwe vhaporofita, vhaṅwe vhaevangeli, vhaṅwe vhalisa na vhafunzi; uri vhakhethwa vha lugiswe, uri hu shumiwe mushumo wa vhuḓinḓa, uri muvhili wa Kristo u fhaṱiwe; u swika roṱhe ri tshi swika kha vhuthihi ha lutendo na ha u ḓivha Murwa wa Mudzimu, ra vha muthu o fhelelaho, ra swika kha muelo wa u aluwa ha u ḓala ha Kristo.”1
GSAM 299.2Musi Mutshidzi a tshi vhea zwifhiwa zwa Muya wawe tshivhidzoni, uri zwi ite mushumo wa Murena “nga he a takalela ngaho” u swika ḓuvha ḽo fhelelaho ḽi tshi ḓa, ho ngo litsha vhathu vhawe vha tshi tou humbulela uri zwe zwa vhonala zwi bva ṱaḓulu kana kha mimuya mivhi. O ri ṋea milayo ine ngayo ra nga ḓivha arali muya u tshi bva kha Mudzimu kana u sa bvi khae. Na kha ano maḓuvha a vhufhelo, musi Murena a tshi ḓo shululela Muya wawe kha vhathu vhoṱhe, vharwa na vhananyana vha porofita, sa zwe muporofita Yoele a dzula o amba,2 Paulo u ri vhathu vha songo nyadza vhuporofita, fhedzi vha “linge zwoṱhe,” vha “farelele zwi re zwavhuḓi.”3
GSAM 299.3Zwithu zwo raloho zwi nga lingiwa hani arali hu si nga u zwi vhambedza na milayo ya Maṅwalo ya u ṱalukanya mushumo wa Muya wa Mudzimu? A si zwoṱhe zwi fhiraho u ṱalukanya ha mihumbulo ya vhathu zwi bvaho kha Mudzimu, ngauri Bivhili i amba uri maḓuvhani a vhufhelo Sathane u ḓo ita maḓembe a tshi fhura shango, uri a kuvhanganye vhathu nndwani ya ḓuvha ḽihulu ḽa Mudzimu Ramaanḓaoṱhe.4 Ngauralo tshifhiwa tsha ngoho tsha muya tshi nga ḓivhiwa nga u vhambedza nga vhuronwane zwe zwa vhonala na milayo ya Bivhili. Henefha hu ṱoḓea vhuronwane vhu fanaho na vhune vhathu vha shango vha vhu shumisa u ṱalula tshelede ya mazwifhi.
GSAM 300U Ṱalula Tshelede ya Mazwifhi
GSAM 300.1Kha Muḓivhadzi wa Tshelede ya Bammbiri ya Bannga wa Detroit wa Lambamai, 1863, Vho Preston vho ṋea milayo miṱanu ya u ṱalula tshelede ya mazwifhi. Vho amba uri muthu muṅwe na muṅwe ane a ṱolisisa nga vhuronwane tshelede iṅwe na iṅwe ya bammbiri ine a i wana, a tshi tevhedza yeneyo milayo, a nga si vhuye a ofha u fhurwa.
GSAM 300.2A hu na nḓila i fulufhedzeaho ya u linga tshifhiwa tsha vhuporofita i fhiraho u tshi vhambedza na ṱhaluso ya zwifhiwa zwo vhonalaho zwifhingani zwa Maṅwalo, na u tshi linga nga milayo yo ṋewaho henefho. Maṅwalo a ri lugisela nga vhuḓalo mishumo yoṱhe yavhuḓi (2 Timotheo 3:16, 17), a ṋea mafhungo a ngoho a u vhonala ha tshifhiwa tsha vhuporofita, na a nḓila ine mushumo wa ngoho wa Muya wa Mudzimu wa nga ṱalukanywa ngayo kha mishumo ya Sathane na zwifhiwa zwawe zwa mazwifhi.
GSAM 300MILAYO YA U ṰALUKANYA ZWIFHIWA ZWA NGOHO
GSAM 300.3Murena o ṋea ipfini ḽawe milayo yo fhambanaho i si fhasi ha ya sumbe, ine ngayo u vhonala ha ngoho ha Muya wa Mudzimu ha nga ṱalukanywa kha mushumo wa Sathane.
GSAM 300Mulayo wa u Thoma—Nyeletshedzo yo Khetheaho
GSAM 300.4Muporofita Yesaya, a tshi amba nga ha zwithu zwi re hone maḓuvhani a vhufhelo, u ri: “Vhofha vhuṱanzi, u vale mulayo nga luswayo vhukati ha vhafunziwa vhanga. Nṋe ndi ḓo lindela Murena, ane a dzumbela vha nḓu ya Yakobo tshifhaṱuwo tshawe, nda mu lavhelesa.... Musi vha tshi ri kha inwi: Ṱoḓani vhane vha amba na mimuya na vhaloi vhane vha tshwina na u ṅuṅuna; naa vhathu a vho ngo fanela u ṱoḓa Mudzimu wavho? Naa vho tshilaho vha nga ṱoḓela thuso kha vhafu? Kha mulayo na kha vhuṱanzi! Arali vha sa ambi u ya nga iḽi ipfi, ndi ngauri a hu na tshedza khavho.”5
GSAM 301.1Kha iḽi Liṅwalo ri vhudzwa nga ha vhathu vhane vha khou vhuyedzedza luswayo kha mulayo wa Mudzimu—vhathu vhane vha lindela Murena, vha tshi shuma mushumo wawe. Vha khou mu lavhelesa; zwine zwa amba uri vha lavhelela u ḓa hawe. Hezwi zwi itea nga tshifhinga tshine mimuya ine ya ḓiita mimuya ya vhafu ya humbela vhathu uri vha ṱoḓe thuso khayo. Vhaṅwe vha pfa musi i tshi vhidza, vha ṱoḓa nḓivho kha vhafu; fhedzi Murena u vhidza vhathu vhawe uri vha mu ṱoḓe. Hezwi zwi amba uri arali vha mu ṱoḓa, u ḓo vha ṋea nyeletshedzo yo khetheaho. A vha faneli u ṱoḓa thuso kha vhafu, vhane vha sa kone u vha vhudza tshithu; ngauri “a vha tsha ḓo vha na mukovhe na luthihi kha zwoṱhe zwi itwaho fhasi ha ḓuvha;” na uri “vhafu a vha ḓivhi tshithu.”6
GSAM 301.2Kha Liṅwalo ḽi re afho nṱha ho ṋewa mulayo une ngayo milaedza yoṱhe ya tea u lingiwa,—“Arali vha sa ambi u ya nga iḽi ipfi, ndi ngauri a hu na tshedza khavho.” Milaedza yoṱhe i bvaho kha Murena i ḓo tendelana na ipfi ḽawe na mulayo wawe.
GSAM 301.3Musi ndi tshi shumisa uyu mulayo kha maṅwalo a Mma White, ndi nga amba uri kha miṅwaha ya fuṱhanu na mivhili yo fhiraho ndo vhala vhuṱanzi havho nga vhuronwane, ndi tshi vhu vhambedza na mulayo wa Mudzimu na vhuṱanzi ha Bivhili, nahone ndi wana zwi tshi tendelana nga vhuḓalo. Nyeletshedzo dzavho a dzi ḓisi nzumbululo ntswa ine ya dzhia vhudzulo ha Maṅwalo, fhedzi dzi ri sumbedza hune vhathu vha nga xedzwa hone, na nḓila ine vha nga xedzwa ngayo kha zwino zwifhinga, vha bviswa ipfini. Vhudzulo ha vhuṱanzi ha Mma White vhu nga ṱaluswa zwavhuḓi nga zwe vhone vhaṋe vha ṅwala nga haho:—
GSAM 301.4“Ipfi ḽa Mudzimu ḽo lingana u vhonetshela muhumbulo wo swifhalelwaho nga maanḓa, nahone ḽi nga pfeseswa nga vhane vha vha na lutamo lwa u ḽi pfesesa. Fhedzi naho zwo ralo, vhaṅwe vhane vha amba uri vha guda ipfi ḽa Mudzimu vha wanala vha tshi tshila nga nḓila i lwisanaho tshoṱhe na pfunzo dzaḽo dzi re khagala vhukuma. Ngauralo, uri vhanna na vhafumakadzi vha si vhe na tshiitisi tsha u ḓiimelela, Mudzimu u ṋea vhuṱanzi vhu re khagala vhu livhaho kha mafhungo, a tshi vha vhuyedzedza kha ipfi ḽe vha litshelela u ḽi tevhedza.
GSAM 302.1“Ipfi ḽa Mudzimu ḽo ḓala milayo ya u fhaṱa maitele o lugaho a vhutshilo, nahone vhuṱanzi, ha vhoṱhe na ha muthu nga eṱhe, ho ṋewa uri vhu livhise mihumbulo yavho nga maanḓa kha yeneyi milayo.... Inwi a ni ḓivhi Maṅwalo zwavhuḓi. Arali no vha ni tshi guda ipfi ḽa Mudzimu, ni na lutamo lwa u swika kha muelo wa Bivhili na kha u fhelela ha Vhukriste, no vha ni sa ḓo ṱoḓa vhuṱanzi....
GSAM 302.2“Murena u ṱoḓa u ni sevha, u ni kaidza, u ni eletshedza nga vhuṱanzi ho ṋewaho, na u dzhenisa mihumbuloni yaṋu ndeme ya ngoho ya ipfi ḽawe. Vhuṱanzi ho ṅwalwaho a ho ngo ṋewa uri vhu ḓise tshedza tshiswa, fhedzi uri vhu khwaṱhise mbiluni nga nḓila i pfalaho ngoho dzo dzumbululwaho kale nga u hevhedzwa nga Mudzimu.... A hu ḓiswi ngoho ntswa, fhedzi nga vhuṱanzi Mudzimu o leludza ngoho khulwane dzo no ṋewaho, a dzi vhea phanḓa ha vhathu nga nḓila ye ene muṋe a i nanga, uri a karuse mihumbulo yavho, a dzi khwaṱhise khayo, uri vhoṱhe vha si vhe na tshiitisi tsha u ḓiimelela....
GSAM 302.3“Vhuṱanzi a ho ngo ṋewa u nyadzisa ipfi ḽa Mudzimu, fhedzi u ḽi hulisa na u kokodzela mihumbulo khaḽo, uri u leluwa havhuḓi ha ngoho hu kwame vhoṱhe.... Arali vhathu vhane zwino vha ḓivhidza dzanga ḽo khetheaho ḽa Mudzimu vha tshi nga thetshelesa zwine a zwi ṱoḓa, sa zwo sumbedzwaho ipfini ḽawe, ho vha hu sa ḓo ṋewa vhuṱanzi ho khetheaho uri vhu vha karusele kha mushumo wavho, vhu vha sumbedze zwivhi zwavho na khombo yavho i ofhisaho ya u litshelela u thetshelesa ipfi ḽa Mudzimu.”7
GSAM 302Mulayo wa Vhuvhili—Vhaporofita vha Ngoho
GSAM 302.4Ro no guda uri vhaporofita vhoṱhe vha ngoho vha ḓo amba zwi tendelanaho na mulayo wa Mudzimu na vhuṱanzi ha ipfi ḽawe. Muapostola Yohane u ṋea muṅwe mulayo une wa ṱalusa pfunzo ya vhaporofita vha ngoho. U ri: “Vhafunwa, ni songo tenda mimuya yoṱhe, fhedzi lingani mimuya ni vhone arali i tshi bva kha Mudzimu; ngauri vhaporofita vhanzhi vha mazwifhi vho bvela shangoni. Muya wa Mudzimu ni u ḓivha nga hezwi: muya muṅwe na muṅwe une wa ṱanziela uri Yesu Kristo o ḓa e ṋama u bva kha Mudzimu; muya muṅwe na muṅwe une wa sa ṱanziele uri Yesu Kristo o ḓa e ṋama a u bvi kha Mudzimu. Wonoyo ndi muya wa mulwa-na-Kristo, we na pfa uri u ḓo ḓa, nahone zwino u shangoni.”8
GSAM 303.1Ṱhogomelani nga vhuronwane Liṅwalo ḽi re afho nṱha. A ḽi ri muṅwe na muṅwe ane a ṱanziela uri Yesu Kristo “o vhuya a ḓa e ṋama,” fhedzi ḽi ri “o no ḓa e ṋama”; zwine zwa amba uri u ḓa nga Muya wawe, a dzula kha riṋe, a tshi fhindula lutendo lwashu. Hezwi ndi yone ngoho ya ndeme ya evangeli: “Kristo kha inwi, fulufhelo ḽa vhugala.”9
GSAM 303.2Pfunzo i kwamaho vhutshilo i re kha maṅwalo oṱhe a Mma White ndi uri ri ṱoḓa Kristo a tshi dzula kha riṋe sa Mutshidzi arali ri tshi ṱoḓa u bvela phanḓa nḓilani ya ṱaḓulu. Maṅwalo avho a funza uri Kristo u ṱoḓea u thomani, magumoni na tshifhinga tshoṱhe. U itela u sumbedza hezwi, ri nga sedza bugu yavho ine ya pfi Maga a u Ya kha Kristo. Ho no rengiswa khophi dzi fhiraho zwigidi zwa ḓana nga luambo lwa Luisimane, hu sa vhaliwi khophi dza zwigidi nga nyambo dza nnḓa dza fumi na malo dzine ya khou gandiswa ngadzo zwino. Mufunzi wa Vhapresbitheri, musi o no vhala yeneyo bugu, o humbela uri a ṋewe khophi dzi fhiraho maḓana mararu dza miraḓo ya tshivhidzo tshawe na khonani dzawe, a ri: “Iyi bugu yo ṅwalwa nga muthu ane a ḓivha Murena Yesu Kristo zwavhuḓi.”
GSAM 303Mulayo wa Vhuraru—Vhaporofita vha Mazwifhi
GSAM 303.3Yohane u ṋea mulayo wa u ṱalula vhaporofita vha mazwifhi: “Vhone vha bva shangoni; ndi ngazwo vha tshi amba zwa shango, na shango ḽi tshi vha thetshelesa.”10 Pfunzo ya vhaporofita vha mazwifhi i ḓo takadza mbilu ya ṋama, nṱhani ha u hulisa nḓila ya u ḓihangwa na u hwala tshifhambano. Vhaporofita vha mazwifhi vha ḓo funza “zwi takadzaho,” nṱhani ha u hulisa “Mukhethwa wa Isiraele.”11 Muṅwe na muṅwe ane a vhala naho e masiaṱari a si gathi a maṅwalo a Mma White a nga vhona uri a livhisa kha u ḓihangwa na u hwala tshifhambano, nahone a si a u takadza mbilu ya ṋama ine ya funa zwa shango.
GSAM 304Mulayo wa Vhuṋa—U Tambula na u Konḓelela
GSAM 304.1Ri tshi bvela phanḓa u ṱolisisa iḽi fhungo, ri ḓo dzhia maipfi a muapostola Yakobo sa mulayo wa vhuṋa: “Vhamuraravho vhanga, dzhiani vhaporofita vhe vha amba dzinani ḽa Murena sa tsumbo ya u tambula na u konḓelela.”12 Musi ri tshi vhala nga ha zwe zwa ṱangana na vhenevho vhaporofita vha kale, ri guda uri muṅwe wa milingo yavho mihulwane yo vha i u vhona Isiraele a tshi landula vhuṱanzi vhu re khagala he vha vhu ṋewa, kana a tshi ita zwi lwisanaho naho. U guda nga ha zwenezwo zwifhinga lwa tshifhinganyana zwi ḓo ṱavhanya zwa sumbedza vhuvha ha vhaporofita vha ngoho na vha mazwifhi. “Murena wa Mavhuthu u ri: Ni songo thetshelesa maipfi a vhaporofita vhane vha ni porofitela; vha ni ḓadza nga zwi si na tshithu; vha amba bono ḽi bvaho mbiluni dzavho, ḽi sa bvi mulomoni wa Murena.”13
GSAM 304.2A hu na tshithu kha maṅwalo a Mma White tshine tsha ita uri muvhali a ḓihudze; fhedzi, sa zwe muṅwe a amba, “Ndo wana mbuyelo khulwane ya muya i sa vhalei kha vhuṱanzi. I ngoho, a thi vhu vhali ndi sa ḓipfi ndi tshi kaidzelwa u ṱahela hanga lutendo kha Mudzimu, u ḓiṋekedza, na u fhisea kha u tshidza mimuya.” Ngauralo, mbuyelo ya vhuṱanzi ha Mma White yo fhambana zwihulu na ya pfunzo dza vhaporofita vha mazwifhi, sa zwe Yeremia a zwi ṱalusa.
GSAM 304.3Muporofita u dovha a ri vhudza nḓila ine vhaporofita vha mazwifhi vha ḓo funza ngayo: “Vha dzulela u vhudza vhane vha nnyadza vha ri: Murena o ri: Ni ḓo vha na mulalo; vha dovha vha ri kha muṅwe na muṅwe ane a tshimbila nga mihumbulo ya mbilu yawe: A hu na vhuvhi vhune ha ḓo ni wela.”14
GSAM 304.4Nga ha vhuvha ha pfunzo ya Mma White kha vhuṱanzi havho, ndi ḓo redza maipfi a tevhelaho a muvhali ane a vhala nga vhuronwane:
GSAM 304.4“Ndo vhala vhuṱanzi havho hoṱhe u bva mathomoni u swika magumoni, vhunzhi haho lunzhi, nahone a thi athu wana fhungo na ḽithihi ḽi lwisanaho na vhuḓifari havhuḓi khaho hoṱhe, kana tshithu tshi si tsho kunaho tshoṱhe na tsha Vhukriste. A hu na tshine tsha bvisa muthu kha Bivhili kana kha Kristo; fhedzi henefho ndi wana khuwelelo dzi fhiseaho vhukuma dza u thetshelesa Mudzimu, u funa Yesu, u tenda Maṅwalo, na u dzulela u a ṱolisisa. U sendela ha u ralo kha Mudzimu, u ḓiṋekedza ho fhiseaho ha u ralo, na khuwelelo dzo dziaho dza u tshila vhutshilo vhukhethwa dzo raloho, zwi nga tutuwedzwa nga Muya wa Mudzimu fhedzi.”
GSAM 305.1Muthu we a ṱhogomela vhuṱanzi havho nga vhuronwane u bva mathomoni u ṅwala a ri:
GSAM 305.1“Nga ha u amba zwithu khagala na nga u fulufhedzea, hu si na nyofho kana tshiṱalula, ndi tama u ṱanziela uri a hu na zwe zwa ṱahela. Arali zwiṱuṱuwedzi zwi nyadziseaho na zwivhi zwo vha zwi zwone zwi langaho uyu mushumo, maipfi a u khwaṱhisedza muthu nga zwine a takalela u zwi pfa o vha a tshi ḓo dzhia vhudzulo ha vhuṱanzi vhune ha ṱolisisa mbilu na ha u kaidza nga u fulufhedzea. U amba khagala, u kaidza vhukhakhi nga u fulufhedzea, maipfi a khathutshelo na ṱhuṱhuwedzo kha mimuya i tetemelaho ine ya pfa u ṱoḓa Mutshidzi, na kha vho khakhaho vhane nga u ḓiṱukufhadza vha ṱoḓa u laṱa vhukhakhi havho,—hezwi ndi zwithu zwo vhumbaho tshipiḓa tshihulwane tsha mishumo yavho. Vhuṱanzi ha Mma White, vhune ha kaidza vhukhakhi ha vhathu vhanzhi vhe vha vha vhona kha bono, ho ṋewa nga u fulufhedzea huhulwane, ha vha na mbuyelo yavhuḓi vhukuma.”15
GSAM 305Mulayo wa Vhuṱanu—Vhuporofita ha Ngoho Vhu a Ḓadzea
GSAM 305.2Hu na zwe Mushe a amba nga ha vhaporofita vha ngoho na vha mazwifhi, zwi wanalaho kha ndima ya fumi na malo ya Doiteronomio. U ri: “Ri ḓo ḓivha hani ipfi ḽe Murena a si ḽi ambe? Musi muporofita a tshi amba dzinani ḽa Murena, arali tshithu tsha sa tevhela, kana tsha sa itea, ndi tshithu tshe Murena a si tshi ambe, fhedzi muporofita o tshi amba nga u ḓihudza; u songo mu ofha.”16
GSAM 305.3Zwenezwi zwi dovha zwa wanala kha Maṅwalo a tevhelaho: “Ndi nnyi ane a amba tshithu tsha itea, Murena a songo tshi laya?”17 Nga ha muporofita Samuele ho pfi: “Zwoṱhe zwine a zwi amba zwi a itea zwa vhukuma.”18 “Musi ipfi ḽa muporofita ḽi tshi ḓadzea, ndi hone hu tshi ḓo ḓivhiwa uri Murena o mu ruma zwa vhukuma.”19
GSAM 306.1Zwino ho no fhira miṅwaha ya fuṱhanu na miraru u bva musi muṅwali a tshi vhona Mma E. G. White lwa u thoma vhe kha bono ḽa vhuporofita. Kha yeneyi miṅwaha vho amba mafhungo manzhi a vhuporofita nga ha zwithu zwe zwa vha zwi tshi ḓo itea. Vhuṅwe ha hovhu vhuporofita vhu amba nga ha zwithu zwo no ḓadzeaho, vhuṅwe vhu kha ḓi ḓadzea, ngeno vhuṅwe vhu tshi kha ḓi vha ha tshifhinga tshi ḓaho. Kha vhu ambaho nga ha zwithu zwa kale kana zwa zwino, a thi ḓivhi na luthihi he ha kundelwa u ḓadzea. Vhuṅwe ha vhuporofita havho ho no bulwa. Vhuṅwe vhu ḓo vhonala kha ndima dzi tevhelaho musi ri tshi bvela phanḓa na mafhungo ashu.
GSAM 306Mulayo wa Vhurathi—Maḓembe a si Mulingo wa Muporofita wa Ngoho
GSAM 306.2Vhaṅwali vhanzhi vha zwa vhurereli vho khwaṱhisa, nahone zwo ṅwalwa kha ṱhalutshedzo dza Maṅwalo, uri tshiga tsha muporofita wa ngoho ndi u ita maḓembe. A ri athu funzwa nga Maṅwalo mulayo wo raloho.
GSAM 306.3Arali u ita maḓembe hu vhuṱanzi ha muporofita wa ngoho, uyo “muporofita wa mazwifhi” o bulwaho kha Nzumbululo 19:20 o vha a tshi ḓo fhedzisela o vhidzwa muporofita wa ngoho; ngauri ho pfi: “Tshivhanda tsha farwa, na muporofita wa mazwifhi we a ita maḓembe phanḓa hatsho, e one e a fhura ngao vhe vha ṱanganedza luswayo lwa tshivhanda.” One eneo maanḓa a dovha a bulwa kha Nzumbululo 13:14, hu tshi pfi a fhura “vha dzulaho kha ḽifhasi nga eneo maḓembe e a ṋewa maanḓa a u a ita phanḓa ha tshivhanda.” Arali ra shumisa uyu mulayo nga nḓila yeneyo, ri ḓo kombetshedzea u ri na Sathane ndi muporofita wa ngoho. Miṅwe mimuya ine ya ḓo ita mushumo wo khetheaho nga tshifhinga tsha ṱhamu ya vhurathi kha ṱhamu dza sumbe dza vhufhelo i vhidzwa “mimuya ya madimoni i itaho maḓembe, ine ya bvela kha mahosi a ḽifhasi na a shango ḽoṱhe, uri i a kuvhanganye nndwani ya ḓuvha ḽihulu ḽa Mudzimu Ramaanḓaoṱhe.”20
GSAM 306.4Arali vhuṱanzi ha muporofita wa ngoho vhu tshi wanala kha maḓembe ane a a ita musi a siho kha bono, ri nga wana vhaporofita vha si gathi vha Bivhili vhane vha nga kunda wonoyo mulingo, zwihuluhulu arali phetho i tshi fanela u bva kha zwo ṅwalwaho nga ha mishumo yavho. Ndi ngoho uri zwo ṅwalwa uri vhaṅwe vhaporofita vho ita maḓembe, sa Elia, Elisha na Paulo. Fhedzi ndi nnyi o wanaho kha Bivhili mafhungo o ṅwalwaho a maḓembe a Yesaya, Yeremia, Daniele, Hosea, Yoele, Amosi, na vhaṅwe? Naho zwo ralo, vhenevha vho vha vhe vhaporofita vha ngoho vha Murena, nahone vha sumbedzwa vhe vhenevho nga milayo ye Murena a ṋea sa mulingo wa muporofita wa ngoho.
GSAM 307.1Uri u ita maḓembe a si mulingo wa muporofita wa ngoho zwi vhonala khagala musi ri tshi vhala mafhungo a Maṅwalo nga ha Yohane Mulovhedzi. Uri o vha e muporofita zwi sumbedzwa nga vhuporofita ha khotsi awe Sakaria, musi vha tshi amba nga ha bono ḽe Mudzimu a vha ṋea nga ha murwa ane vha ḓo bebelwa ene: “Na iwe, ṅwana, u ḓo vhidzwa muporofita wa Wa-Ṱaḓulu-ṱaḓulu; ngauri u ḓo ranga Murena phanḓa, wa lugisa nḓila dzawe.”21 Mutshidzi washu ene muṋe o ṱanganedza Yohane sa ene muporofita we a vha a tshi ḓo lugisa nḓila phanḓa hawe; ngauri o amba nga ha Yohane a ri: “Fhedzi no bvela u vhona mini? Muporofita naa? Ee, ndi a ni vhudza, ane a fhira muporofita nga maanḓa. Hoyu ndi ene we ha ṅwalwa nga hae ha pfi: Vhona, ndi ruma muḓinḓa wanga phanḓa ha tshifhaṱuwo tshau, ane a ḓo lugisa nḓila yau phanḓa hau. Ngauri ndi a ni vhudza, kha vho bebwaho nga vhafumakadzi a hu na muporofita a fhiraho Yohane Mulovhedzi?”22
GSAM 307.2Henefha ri na maipfi a re khagala a Mutshidzi a uri Yohane o vha e muporofita. Kha ri shumise mulingo wa u ita maḓembe, ri vhone mbuyelo. Kha Evangeli yo ṅwalwaho nga Yohane muevangeli, ri na maipfi aya: “Vhanzhi vha ḓa khae [Kristo] vha ri: Yohane ho ngo ita ḓembe; fhedzi zwoṱhe zwe Yohane a amba nga hoyu muthu zwo vha zwi ngoho.”23 Maipfi aya e eṱhe a hanedza nga vhuḓalo muhumbulo wa uri tshiga tsha muporofita wa ngoho ndi u ita maḓembe.
GSAM 307.3Uyu mulayo wo ṋewaho kha Doiteronomio 13:1-3, une ra u vhidza mulayo wa vhurathi kha u vhala hashu ha zwino, ndi wa u ri tsireledza kha u tevhela tshithu tshiṅwe na tshiṅwe tshi akhamadzaho kana tsha maḓembe ri sa athu ṱhogomela nga vhuronwane arali tshi tshi livhisa kha u sendela tsini na Murena kana kha u ṱutshela kule nae. Nga ngoho ndimana iyi i ri vhudza uri ri shumise milayo yoṱhe, zwihuluhulu u vhona arali zwi tshi tendelana na Mudzimu na mulayo wawe.
GSAM 308.1Uyu mulayo wa vhurathi u funza uri arali ḓembe ḽa itwa nga muthu ane a ḓiita muporofita, musi ḽi tshi lingiwa nga vhuronwane hu ḓo vhonala u ṱutshela ngoho khethwa dza ipfi ḽa Mudzimu na u tsitsela fhasi muelo uri u takadze mbilu ine ya ṱoḓa u shavha nḓila ya u ḓihangwa. Murena u tendela muthu o raloho ane a ḓiita muporofita a tshi bvelela, nahone nḓila yawe i vha mulingo kha ṅwana wa ngoho wa Mudzimu, ya mu ṋea tshibuli tsha u ṱolisisa nga vhuronwane hune onoyo ane a ita maḓembe a livhisa hone kana tshiṱuṱuwedzi tshawe. Vhane vha farelela ipfi ḽa Mudzimu, nṱhani ha u kungwa nga muthu wa mazwifhi ane a ita maḓembe, vha bva kha tshenzhemo yo raloho vho khwaṱha kha Mudzimu.
GSAM 308.2Kha ano maḓuvha mavhi, musi vhanzhi vha tshi ḓivhidza “vhafhodzi nga lutendo,” “vhafhodzi nga Mudzimu,” “vhafhodzi vha Christian Science,” na zwiṅwe, zwo vha zwi tshi ḓo vha zwavhuḓi u shumisa nga vhuronwane milayo ya Maṅwalo; ngauri ri ḓo ṱoḓa milayo ya Mudzimu na u vhonetshelwa nga Muya Mukhethwa uri ri kone u ṱalukanya khagala zwine vhaṅwe vha avha “vhafhodzi” vha elekanya na zwine vha zwi ṱoḓa, ngauri mushumo wavho wo dzumbama nga maanḓa. Nga huṅwe hu na vhane vha nyadza khagala mulayo wa Mudzimu na ngoho yawe ya tshino tshifhinga. Nga zwiṅwe zwifhinga avha vhane vha ḓiita “vhafhodzi” vho sinyuwa sa vhathu vho pengaho na musi hu tshi tou bulwa mulayo wa Mudzimu. Samusi zwi ngoho uri Murena u na mulaedza une wa ḓivhadza mulayo wawe mukhethwa, zwi dovha zwa vha ngoho uri vhathu vhane vha sema mulayo wawe na u pandela phanḓa havho vhane vha tou u bula a vha na u tutuwedzwa nga Muya Mukhethwa.
GSAM 308Mulayo wa Vhusumbe—Mitshelo Yavho
GSAM 308.3“Ṱhogomelani vhaporofita vha mazwifhi vhane vha ḓa kha inwi vho ambara zwiambaro zwa nngu, ngeno nga ngomu vhe maḓevhele a re na nḓala khulu. Ni ḓo vha ḓivha nga mitshelo yavho. Naa vhathu vha ka maṱirivhe mipfani, kana mahuyu kha zwiṱhatshana zwa mipfa? Ngauralo muri muṅwe na muṅwe wavhuḓi u aṋwa mitshelo yavhuḓi, fhedzi muri wo sinaho u aṋwa mitshelo mivhi. Muri wavhuḓi u nga si aṋwe mitshelo mivhi, na muri wo sinaho u nga si aṋwe mitshelo yavhuḓi. Muri muṅwe na muṅwe u sa aṋwiho mitshelo yavhuḓi u a remiwa wa poswa muliloni. Ngauralo ni ḓo vha ḓivha nga mitshelo yavho.”24
GSAM 309.1Aya maipfi a Mutshidzi washu a ṱanganedza uri tshifhiwa tsha vhuporofita tsho vha tshi tshi ḓo vha hone tshifhingani tsha evangeli. Arali ho vha hu sa ḓo vha na vhaporofita vha ngoho vho ṱanganaho na mushumo, nahone u vhonala hoṱhe ha vhuporofita ho vha hu tshi ḓo bva kha tshisima tshivhi, naa o vha a sa ḓo ri: “Ṱhogomelani vhaporofita”? U ri vhudza hawe khagala uri lushaka luṅwe na luṅwe lu nga ḓivhiwa hani ndi vhuṱanzi havhuḓisa ha uri kha mushumo wa Mufhumudzi, Muya Mukhethwa, wa u sumbedza “zwi ḓaho” (Yohane 16:13), ho vha hu tshi ḓo vha na tshifhiwa tsha ngoho tsha vhuporofita. Uyu mulayo, we kha u vhala hashu ra u vhidza mulayo wa vhusumbe, a u khakhi. Kristo ho ngo ri ni nga vha ḓivha nga mitshelo yavho, fhedzi o amba o khwaṱhisa a ri: “Ni ḓo vha ḓivha nga mitshelo yavho.”
GSAM 309.2Ri a vhudzisa: Ndi mutshelo ufhio une wa fanela u vhonala kha mushumo wa zwifhiwa zwa ngoho zwa Muya wa Mudzimu? Phindulo i wanala kha maipfi a Paulo nga ha ndivho ya Murena ya u vhea zwifhiwa tshivhidzoni: “Ndi ngazwo a tshi ri: Musi a tshi gonya ṱaḓulu, o thuba vhuthubwa, a ṋea vhathu zwifhiwa.... O ṋea vhaṅwe uri vha vhe vhaapostola, vhaṅwe vhaporofita, vhaṅwe vhaevangeli, vhaṅwe vhalisa na vhafunzi; uri vhakhethwa vha lugiswe, uri hu shumiwe mushumo wa vhuḓinḓa, uri muvhili wa Kristo u fhaṱiwe; u swika roṱhe ri tshi swika kha vhuthihi [“u dzhena kha vhuthihi,” kha luṱa lwa siaṱari] ha lutendo na ha u ḓivha Murwa wa Mudzimu, ra vha muthu o fhelelaho, ra swika kha muelo wa u aluwa ha u ḓala ha Kristo.”25
GSAM 309.3Shumisani uyu mulayo kha tshifhiwa tsha vhuporofita tshe tsha ṱangana na mulaedza wa muruṅwa wa vhuraru u bva u thomani hawo; mbuyelo ndi ifhio?—Ri wana uri nyeletshedzo yo dzulelaho u ṋewa nga Mma White yo livhisa kha vhuthihi na u tendelana, i tshi eletshedza u “eletshedzana” na u “sendelana,” uri ri vhe vhathihi na Kristo, nga zwenezwo ra vha na vhukonani ha ngoho na vhuthihi vhukati hashu.
GSAM 310.1Vhaṅwe vha vhapikisi vha uyu mushumo vho amba nga u goḓa vha ri: “Arali hu si nga mabono a Mma White ane na vha nao vhukati haṋu, mushumo waṋu wo vha u tshi ḓo vha wo no kwashea kale.” Ha fhindulwa ha pfi: “Ndi ngoho; ngauri nga tshenetsho tshisima Murena o ṋea nyeletshedzo, tsevho na tshedza, nga zwenezwo phambano dza bviswa, mushumo wa bvelela.” Ngauralo zwe vha ṱoḓa u zwi shumisa u lwa na tshifhiwa zwi vha vhuṱanzi ha uri mutshelo watsho ndi wa tshifhiwa tsha ngoho tsha vhuporofita.
GSAM 310.2Lwa miṅwaha ya furathi na u fhira, u vhonala ha tshifhiwa tsha vhuporofita nga Mma White ho lingiwa nga milayo iyi ya sumbe, nahone kha zwoṱhe ho swikelela zwine zwa ṱoḓea kha vhuporofita ha ngoho.
Notes
- Vhaefesa 4:11-13. ↩
- Yoele 2:28, 29, ↩
- 1 Vhathesalonika 5:20, 21. ↩
- Nzumbululo 16:14. ↩
- Yesaya 8:16-20. ↩
- Muhuweleli 9:6, 5. ↩
- Vhuṱanzi ha Tshivhidzo, volumu ya 5, masiaṱari 663-667. ↩
- 1 Yohane 4:1-3. ↩
- Vhaefesa 3:17; Vhakolosa 1:27. ↩
- 1 Yohane 4:5. ↩
- Yesaya 30:10, 11. ↩
- Yakobo 5:10. ↩
- Yeremia 23:16. ↩
- Ndimana ya 17. ↩
- J. N. Andrews, kha Ṱolokanyo ya Nyendavhusiku, 1867. ↩
- Doiteronomio 18:21, 22. ↩
- Zwililo 3:37. ↩
- 1 Samuele 9:6. ↩
- Yeremia 28:9. ↩
- Nzumbululo 16:14. ↩
- Luka 1:76. ↩
- Luka 7:26-28. ↩
- Yohane 10:41. ↩
- Mateo 7:15-20. ↩
- Vhaefesa 4:8-13. ↩