Adventist Pioneer
Library
aplib.orgLibrary
Table of Contents
02 / 31
02 / 31

Marangaphanḓa a Khanḓiso ya 1992

John Norton Loughborough

GSAM -[Notsi ya mudzudzanyi wa CD-ROM: Samusi khanḓiso ya 1992 yo katela maṅwalwa a Loughborough a songo vhuya a ganḓiswa phanḓa ha zwenezwo (sa Ṱhumetshedzo A), zwo vhonala zwo tea u katela haya mafhungo a zwenezwino a ṱalutshedzaho vhubvo, na ḓivhazwakale na zwo ṱhogomelwaho zwi tshimbidzanaho nao.]

GSAM 5Manweledzo a Vhutshilo

GSAM 5.1John Norton Loughborough o vhona nga maṱo u thomiwa ha tshivhidzo tsha Vha-Adventist vha ḓuvha ḽa vhusumbe. Manweledzo mapfufhi a vhutshilo na vhuḓinḓa hawe nga maipfi awe (o bviswaho kha Ṱhumetshedzo A) a ḓo ṋea mafhungo a vhubvo ha heyi khanḓiso ntswa ya bugu yawe.

GSAM 5.2Ndo bebwa ngei Victor, tshiṱirikini tsha Ontario, N.Y., nga 26 Phando, 1832. Kuda kuvhundu kwa vhadzulapo vha 200 kana u fhira kwo vha kwo tangwa, kha vhukule ha maele manzhi, nga vhathu vhanzhi vhe vha dzula vha tshi lima. Kwo vha ku nḓilani ya kale ya gariki dza poso u bva Albany u ya Buffalo. Kha uku kuvhundu ndi he nda dzhena tshikolo tsha Swondaha na tshumelo dza vhurabeli u swika luṱavula lwa 1848, musi muḓi wa Rochester, N.Y., u tshi vha fhethu hanga ha u dzula na u shuma. Khotsi anga na makhulu wanga vhoṱhe vho vha vhe vhafunzi vha henefho kha tshivhidzo tsha Methodist, fhedzi vho vha vha tshi ḓiṱhogomela nga mishumo yavho....

GSAM 5.3... Kha vhege ya u fhedza ya Nyendavhusiku 1843, ndo pfa nyambo yanga ya u thoma ya u huwelelwa ha u ḓa. Yo vha i ya Muraravho James Barry, nga ṱhoho ine ya ri, “Tshifhinga tsha Khaṱhulo Yawe Tsho Swika.” Maanḓa mahulu a Mudzimu o ita uri ngoho ye a i ḓivhadza i dzhene mbiluni. Zwo vha zwi tshi tou nga ro ima phanḓa ha khoro ya khaṱhulo ya Mudzimu. Musi mufunzi a tshi ṱuṱuwedza nga murahu ha zwenezwo, nṋe na vhaṅwe vhanzhi ro phuletshedza ra ya phanḓa uri ri rabelelwe. Ndi henefho he nda thoma u lingedza u rabela na u ṱoḓa Mudzimu....

GSAM 5.4Musi hu vhuria ha 1852, ndi sa athu u thoma u huwelela mulaedza wa muruṅwa wa vhuraru, ndo vha ndi tshi kha ḓi ṱolisisa arali ndi tshi fanela u huwelela mulaedza kana u ṱhogomela nṋe na musadzi wanga nga u shuma nga zwanḓa. Nga iṅwe Sabatha kha muṱangano washu ngei Rochester, Khaladzi White vho ṋewa bono, nahone ha ṋewa vhuṱanzi ho livhaho kha nṋe ha uri ndi songo tsha timatima, fhedzi ndi bve ndi huwelele mulaedza, nahone Murena u ḓo mvulela nḓila ya uri ndi ṱhogomelwe....

GSAM 6.1Musi ndo no dzhena zwavhuḓi mushumoni, kha zwenezwo zwifhinga zwa mathomoni, ho vhonala zwithu zwe nga tshenetsho tshifhinga zwa vha tshiphiri kha nṋe. Zwo vha zwi hezwi—kha muṱangano muṅwe na muṅwe wa ndeme kha mavundu o fhambanaho we Muraravho na Khaladzi White vha ya khawo, vho vha vha tshi nkhumbela uri ndi ṱuwe navho. Ndo vha ndi tshi ḓivhudzisa nda ri, “Ndi ngani vha sa humbeli havha vhafunzi nṱhani ha u dzulela u humbela nṋe?”

GSAM 6.2Hafhu, musi honoho u shandukela huraru hu tshi bvelela u bva nga 1853 u swika nga 1865, musi vha tshi thoma gurannḓa tharu dzo fhambanaho, iṅwe ya nyambo iṅwe na iṅwe ya u vutshela, ndi ngani ndo vha ndi hone, nda vhona u thoma ha u shandukela huṅwe na huṅwe? Hafhu, ndi ngani ndo vha ndi hone u vhona Khaladzi White vhe kha mabono o vuleaho lwa u fhira fuṋa, u vhona vha tshi ṱoliwa nga madokotela, na u vha pfa vha tshi porofita zwithu zwe zwa vha zwi tshi ḓo itea—zwithu zwe zwa vhonala zwi sa tendisei kha vhe vha pfa vhuporofita honoho, fhedzi zwa ḓadzea nga vhukuma? Ndi amba nga u fulufhedzea hoṱhe ndi tshi ri, zwibuli izwi a zwo ngo ita uri ndi ḓikukumuse, fhedzi zwo vha zwi tshiphiri. Ndo vha ndi tshi ḓivhudzisa nda ri, “Ndi ngani hezwi zwoṱhe zwi nga u rali?”

GSAM 6.3... Nga 1890 ndo humbelwa nga Khonferentsi Khulwane uri ndi shume vhubvaḓuvha ha Thavha dza Rocky. Ha ḓa vhuṱanzi he ha ṅwalelwa Muhulwane O. A. Olsen, he khophi yaho ya rumelwa na kha nṋe, ha ri: “Ndi ri Muhulwane Loughborough kha a ite mushumo une zwivhidzo zwa u ṱoḓa vhukuma. Murena u ṱoḓa uri ipfi ḽawe ḽi pfale sa ḽa Yohane, a tshi amba zwithu zwe ene muṋe a ṱangana nazwo kha u takuwa na mvelaphanḓa ya mulaedza wa muruṅwa wa vhuraru. Muhulwane Loughborough kha a ime fhethu hawe ho teaho, sa Kalebe a tshi ḓa phanḓa, a tshi ṋea vhuṱanzi ho khwaṱhaho, naho hu na u sa tenda na u timatima na u hanedza, a tshi ri, ‘ri a kona zwavhuḓi u gonya ra dzhia ḽeneḽo shango ḽavhuḓi.’ Ni songo valela Muhulwane Loughborough khuḓani huṅwe fhethu. Ni songo mu vhofhelela kha khonferentsi nthihi fhedzi. Kha a ye ngeno na ngei na hoṱhe, a tshi amba zwe a zwi vhona na zwe a zwi ḓivha na zwe a zwi fara kha u takuwa ha mulaedza wa muruṅwa wa vhuraru.

GSAM 6.4(Vhonani Ṱhumetshedzo B malugana na maḓuvha a ndeme vhutshiloni ha Loughborough.)

GSAM 7U Vhidzwa ho Livhaho ha u Phaḓaladza Bugu ya Loughborough

GSAM 7.1Musi hu tshi thoma ḓana ḽiswa ḽa miṅwaha, nga murahu ha musi Muraravho Loughborough o ṅwala U Takuwa na Mvelaphanḓa ya Mulaedza wa Muruṅwa wa Vhuraru, ye ya ranga phanḓa Mutsukunyeo Muhulwane wa U ḓa ha Vhuvhili, Ellen White vho ṅwala haya maipfi:

GSAM 7.2Ndi kwamea vhukuma nga vhuimo hashu ha zwino. Zwino ri fanela u ita mushumo we wa vha wo fanela u vha wo no itwa kale. Ri fanela u ita sa zwe Murena a laedza Mushe uri a ite, musi vhana vha Isiraele, vho no pfuka sogani, vho atha madennde tsini na Yorodane. Mushe o laedzwa uri a vha vhudze hafhu zwoṱhe zwe Murena a vha itela musi vha tshi khou tshimbila sogani. Mafhungo a zwenezwo zwe a dovha a zwi anetshela a wanala buguni ya Doiteronomio.

GSAM 7.3Mafhungo a zwe vhathu vha Mudzimu vha ṱangana nazwo kha ḓivhazwakale ya mathomoni ya mushumo washu a fanela u dovha a ganḓiswa. Vhanzhi vhe vha ḓa ngohoni nga murahu a vha ḓivhi nḓila ye Murena a shuma ngayo. Zwe William Miller na vhashumisani nae, Kapiteni Joseph Bates na vhaṅwe vhavulanḓila kha mulaedza wa u ḓa vha ṱangana nazwo zwi fanela u dzula zwi phanḓa ha vhathu vhashu. Bugu ya Muhulwane Loughborough i fanela u dzhielwa nṱha. Vharangaphanḓa vhashu vha fanela u vhona zwine zwa nga itwa uri heyi bugu i phaḓaladzwe.

GSAM 7.4Ri fanela u ṱolisisa uri ri wane nḓila ya khwine ya u dovha ra lavhelesa zwe ra ṱangana nazwo u bva mathomoni a mushumo washu, musi ri tshi fhandekana na zwivhidzo, ra ya phanḓa nga ḽiga nga ḽiga tshedzani tshe Mudzimu a ri ṋea tshone. Nga tshenetsho tshifhinga ro ima kha uri Bivhili, Bivhili fhedzi, ndi yone ye ya vha i tshi fanela u ri livhisa; nahone a ro ngo fanela u vhuya ra litsha honoho u ima hashu. Ro ṋewa mbonalo dzi mangadzaho dza maanḓa a Mudzimu. Ho itwa maḓembe. Lunzhi-lunzhi, musi ro vha ro dzhena maṱunguni, maanḓa a Mudzimu o vhonadzwa a tshi ri thusa.—Luṅwalo 105, 1903 (CWE145) (u ombedzela ho engedzwa).

GSAM 7Ndi Ngani i Tshi Dovha ya Ganḓiswa?

GSAM 7.5Ri tshi vhonetshelwa nga vhuṱanzi ho bulwaho afho nṱha, kha ri elekanye nga zwiitisi zwa uri ndi ngani Muraravho Loughborough o laedzwa uri a anetshele ḓivhazwakale yashu, na uri ndi ngani ro pfa ri tshi livhiswa uri mafhungo awe a dovhe a phaḓaladzwe a vhalwe.

GSAM 8—U Vhidzwa ha u Humbula

GSAM 8.1Nga nṱha ha zwoṱhe, u dovha ra lavhelesa zwiitea zwa ḓivhazwakale zwi ri ṋea tshibuli tsha u tevhelela tshanḓa tsha Mudzimu tshi tshi shuma, na u vhona vhuṱanzi ha ṱhogomelo Yawe ya lufuno. Hezwi zwi fhaṱa lutendo, zwa ri funza ngudo dza tshifhinga tsho fhiraho, dza zwivhuya na dza zwivhi. Zwi dovha zwa lavhelesa mitheo ya Maṅwalo ya tshivhidzo tshashu, zwa dzumbulula muya wa u ḓidzima wa vhavulanḓila vhashu. Zwi ri humbudza midzi yashu ya muya. Sa zwe Muraravho Loughborough a amba kha siaṱari 33, “Arali zwo vha zwavhuḓi kha Isiraele u humbula nḓila dze Murena a vha livhisa ngadzo, naa a zwi zwavhuḓi na kha riṋe? A tshi khou pembelela, muṅwali wa dziphisalema u dovha a ri, ‘Renda Murena, iwe muya wanga, u songo hangwa zwivhuya zwawe zwoṱhe.’”

GSAM 8—Tshifhinga tsho Khetheaho kha Ḓivhazwakale

GSAM 8.2Miṅwaha ya u thomiwa ha mushumo wa Vha-Adventist vha ḓuvha ḽa vhusumbe yo vha i tshiṅwe tsha zwifhinga zwo khetheaho kha ḓivhazwakale. Hu ḓa muhumbuloni zwiṱaluli zwi si fhasi ha zwiraru zwa tshifhinga tsho raloho.

GSAM 8.3(1) Musi vhuporofita ha ndeme vhu tshi khou ḓadzea. Kanzhi tshiitea tsho raloho a tshi ṱalukanywi nga vhathu vhanzhi kana nga vhuḓalo nga tshenetsho tshifhinga. Nga zwenezwo ndi zwa ndeme vhukuma nahone zwi a thusa u sedza murahu nga u pfesesa zwe zwa ḓivhea nga murahu, uri ri pfesese vhuhulwane ha vhuporofita—milaedza ye Murena a dzudzanya uri i vhe ngoho ya zwino kha tshenetsho tshifhinga tsha ḓivhazwakale ya ḽifhasi.

GSAM 8.4(2) Musi hu tshi khou vhewa mitheo ya mushumo wo khetheaho une Murena a dzudzanya u u ita. Musi ri tshi pfesesa zwifhinga zwo raloho, ndi zwa ndeme vhukuma u vhona nḓila ye thikho dza vhewa ngayo, vhuṱanzi vhu bvaho Maṅwaloni na zwiitea zwi livhiswaho nga Mudzimu zwe nga ḽiga nga ḽiga zwa livhisa “vhavulanḓila”, vhafhaṱi vho vhidzelwaho tshifhinga tsho raloho, uri vha swike kha khwaṱhisedzo i re na ṱhalutshedzo na i pfalaho nga ha mulaedza na mushumo zwe vha kumedzwa nga Mudzimu.

GSAM 8.5(3) Musi hu tshi vha na tshanduko khulwane kha tshumelo ya vhukuma ya fhethu hukhethwa, ine ya ḓadzisa zwe zwa fanyiswa. Samusi nḓila ya Mudzimu “i fhethu hukhethwa” (Dziphisalema 77:13), ndi zwa ndeme vhukuma u pfesesa na u tevhela nga lutendo zwine Mudzimu a ita uri a fhelise thaidzo ya tshivhi. Kha zwenezwi, u fanyisa tshanduko khulwane yo rangaho phanḓa na ye ya vha hone kha u vuwa ha dzangalelo kha u ḓa ha Kristo zwi a thusa vhukuma. Murena u ṱoḓa ri tshi elekanya nga zwe zwa itea musi hu tshi bviwa muṱani hu tshi yiwa fhethu hukhethwa (u bva Kalvari u ya kha u Gonya ṱaḓulu), na nḓila ye vhathu vha ofhaho Mudzimu vha tshenetsho tshifhinga vha si pfesese zwe zwa itea u thomani. Nga zwenezwo vho ṱangana na u nyabwa hu lemelaho vhukuma, fhedzi mafheleloni vha vhona fhethu havho kha u dzumbuluwa ha pulane ya Mudzimu. Zwe vha ṱangana nazwo zwi vhonetshela zwe vhatendi vha ṱangana nazwo nga 1844 na nga murahu, musi hu tshi bviwa fhethu hukhethwa hu tshi yiwa fhethu hukhethwa-khethwa (u bva kha U ri Imelela u ya kha Khaṱhulo ya U ri Imelela).

GSAM 9.1Ri vhona zwoṱhe zwiṱaluli izwi zwiraru zwo bulwaho afho nṱha kha tshifhinga tsha mathomo tshe tsha ṱalutshedzwa mafhungoni a Muraravho Loughborough. Ri tama u pfesesa na u kovhelana muya muthihi wa vhe vha ṱoḓa ngoho “sa dzanga ḽo dzumbwaho”, vha i wana, vha kumedzela zwoṱhe uri i ḓivhadzwe.

GSAM 9—U Khwaṱhisedza Muya wa Vhuporofita

GSAM 9.2Tshiṅwe tshiitisi tsha u dovha ra ganḓisa vhuṱanzi ha Loughborough ndi u dovha ra khwaṱhisedza misini yashu mushumo wa vhuḓinḓa ha Ellen White kha ḓivhazwakale na u ya nga Bivhili, sa muṅwali, muambi na muṱanganedzi wa tshifhiwa tsho khetheaho tsha Muya, tshe a amba nga hatsho marangaphanḓani awe.

GSAM 9—Mafhungo a Ngoho dza Mutheo nga We a dzi Vhona nga Maṱo

GSAM 9.3Vhuṱanzi vhu sumbedza zwiitisi zwi si fhasi ha zwiraru zwe zwa ita uri Ellen White vha laedze miṅwaha i anganyelaho 90 yo fhiraho uri iyi bugu i wanale nga vhunzhi, na uri hu dovhe hu lavheleswe na u ganḓiswa maipfi na mafhungo a vhe vha vhea mitheo ya mushumo. (1) Havha ṱhanzi dza maṱo vho vha vha tshi khou fa, nga zwenezwo vhuṱanzi havho ha mulomo he vha vhu ṋea nga vhone vhaṋe ho vha vhu tshi khou fhumudzwa. (2) Zwigidi zwi engedzeaho zwa vhathu vhe vha vha vha tshi khou dzhena tshivhidzoni vha sa ḓivhi nga vhone vhaṋe zwiitea kana vhathu vha mathomoni, zwo vha zwi tshi ḓo bveledza tshivhidzo tshi sa ḓivhi midzi yatsho yo vhewaho nga Mudzimu. (3) Mishumo ya pfunzo dza vhufhura yo vha i tshi ḓo linga tshivhidzo, zwihuluhulu kha vhuimo hatsho ha u pofula he ha vhonala kha zwe zwa itea ngei Minneapolis, he zwa dovha zwa vhu engedza. Nga zwenezwo u fulufhela ha vhanzhi uri Murena o vhuya a livhisa kha hoyu mutsukunyeo ho vha hu tshi ḓo lingwa nga nḓila nnzhi, dzo fhambanaho na dzi sa ṱavhanyi u vhonala. Zwo vha zwi tshi ḓo vha zwa ndeme vhukuma uri vhuṱanzi ha tshanḓa Tshawe tshi tshi shuma vhu dovhe vhu anetshelwe nga u pfalaho na nga maanḓa.

GSAM 9Notsi nga ha Ṱhumetshedzo A

GSAM 9.4U sa ḓivha hu re na mbudziso na u timatima ha vhe vha si vhe ṱhanzi dza maṱo ho vhonala na musi Muraravho Loughborough a tshi kha ḓi tshila. Tshiṅwe tsha tsumbo dzo raloho tsho mu ṱuṱuwedza uri a ṅwale zwe zwa ṋewa fhano sa Ṱhumetshedzo. Ri vhona zwi ndugelo na vhuḓifhinduleli u kona u katela phindulo yawe kha heyi khanḓiso, samusi hu lwa u thoma i tshi ganḓiswa. Ro ḓivhadzwa nga ha u vha hone hayo nga ndaedzi i re kha kubugwana kwa L. E. Froom ku no pfi U Wana Ṱhanzi dza Vhuporofita dzo Xelaho. Ri redza ṱhalutshedzo ya Froom ya ḓivhazwakale ya ḽiṅwalwa ḽine ḽa vha Ṱhumetshedzo A:

GSAM 10.1Tshiṅwe tshithu tsha ndeme tshe tsha engedzwa tsho vha ḽiṅwalwa ḽihulwane ḽo thaiphiwaho, ḽe J. N. Loughborough a ḽi thaipha nga u tou pwatula-pwatula mutshini wa kale wa Blick wa u thaipha wa theḽegirafu, ḽoṱhe nga maḽeḓere mahulwane. Yo vha phindulo yawe, ye a i lugisa nga 1918 musi hu si kale phanḓa ha lufu lwawe, kha milandu ya u zwifha, u shanda mafhungo na u sa lulama ye vhaṅwe vhasasaladzi vha i vhea hu sa athu u fhela tshifhinga tshilapfu, vha tshi lwa na bugu dzawe dza u thoma nga ha mathomo a Mutsukunyeo wa U ḓa. Musi ḽi tshi ṋekedzwa iṅwe ya nḓu dzashu dza khanḓiso uri ḽi ganḓiswe, zwo vha zwi tshi vhonala uri a ḽi nga kungi vhathu vhanzhi zwo eḓanaho uri ḽi ganḓiswe. Nga zwenezwo ḽo humiselwa kha muṅwali.

GSAM 10.2Musi miṅwaha yawe i tshi engedzea, Muhulwane Loughborough o ḽi ṋea H. A. Washburn, we nga tshenetsho tshifhinga a vha e phurofesa wa ḓivhazwakale ngei Khoḽidzhini ya Vhuthihi ya Pacific, we a ḽi dzhiela nṱha a ḽi vhulunga. Ḽiṅwe ḓuvha nnḓu ya phurofesa yo swa ya fhela, na laiburari yawe yavhuḓi ya fhela nayo. Bugu dzi si gathi dze a sala nadzo dzo vha dzi kha desike yawe ngei khoḽidzhini. Vhukati hadzo ho vha hu na iḽi ḽiṅwalwa, ḽe ṱhoho yaḽo ya vha i tshi ri “Zwiṅwe Zwe Nda Ṱangana Nazwo.” Mafheleloni a mutevhe wanga wa u thoma wa ngudo nga ha Mutsukunyeo wa Vha-Miller, dze nda humbelwa uri ndi dzi ṋee musi hu tshi vulwa Tshikolo tsha Nṱha tsha Bivhili tshe tsha farelwa Khoḽidzhini ya Vhuthihi ya Pacific nga ṅwaha wonoyo, Phurofesa Washburn vho ḓisa ḽiṅwalwa iḽo vha ḽi vhea zwanḓani zwanga vha ri, “Zwino ndi a pfesesa uri ndi ngani iḽi ḽiṅwalwa ḽo vha ḽi tshi fanela u vha tshiṅwe tsha zwithu zwi si gathi zwe zwa tsireledzwa kha laiburari yanga yoṱhe nga u vha zwi kha desike yanga khoḽidzhini. Mudzimu o vha a tshi ṱoḓa uri ḽi vhulungelwe hoyu mushumo. Ḽi vheeni kha Khuvhanganyo ya Zwiko zwa U ḓa.”—masiaṱari 48, 49

GSAM 10U Shumisana ha Murena na Vhathu

GSAM 10.3Nga u pfesesa zwiṅwe nga ha mvelo ya vhathu sa zwine zwa vhonala mbiluni dzashu, ri ḓivha zwavhuḓi uri Murena o dzulela u shuma nga midzio ya vumba. Ri ṋea heyi bugu uri i khwaṱhise lutendo kha nḓila ye Murena a shuma ngayo, hu si u fhaṱa fulufhelo ḽa mazwifhi kha vhushayanungo ha vhathu vhe A ṱoḓa u khunyeledza zwine A zwi funa ngavho. A ri imeleli vhukhakhi ha mvelo ya havha vhanna na vhafumakadzi vha ofhaho Mudzimu vhu nga dzumbululwaho kha muṱoḓi wa ngoho o ḓiimiselaho wa misini yashu, musi a tshi vhala heyi bugu kana maṅwe mafhungo a zwifhinga izwo zwa ndeme. Mudzimu o dzulela u shuma a tshi shumisana na vhathu, vhuthu ho ṱangana na vhumudzimu (Vhaefesa 2:20). Kha ri dzule ri tshi thetshelesa ipfi Ḽawe, naho ḽi tshi ḓa nga maipfi a vhaṅwe a sa khwaṱhi. “Ni songo nyadza vhuporofita; lingani zwithu zwoṱhe; farelelani zwivhuya.” (1 Vhathesalonika 5:20, 21). (Vhonani Milaedza yo Nangwaho 3:342-347)

GSAM 11Ṱhogomelo kha Tshifhinga tsha Mathomo

GSAM 11.1Ri vhona uri thuso khulwane ya heyi bugu ndi u fhindula mbudziso nnzhi (kanzhi na dzi sa athu u vhudziswa) nga ha tshifhinga tshashu tsha mathomo na miṅwaha ya u thoma. Dziṅwe mbudziso dzi tshimbidzanaho na zwe tshivhidzo tsha ṱangana nazwo nga murahu, mafheleloni a ḓana ḽa vhu-19 ḽa miṅwaha na u bva tshetsho, dzi ṱalutshedzwa khwine huṅwe fhethu. Muruṅwa wa Murena o ṱalutshedza kha vhuṱanzi vhuimo ha tshivhidzo nga tshenetsho tshifhinga, tshedza tshe Murena a lingedza u tshi ḓisa nga 1888, na mvelelo dza u hana ha tshivhidzo mulaedza wonoyo, nga tshenetsho tshifhinga na miṅwahani yo swikaho kha misini yashu.

GSAM 11.2Ndi zwa ndeme u vhona phambano vhukati ha u lenga ha zwe vhathu vha lavhelela—zwe zwa vha tshipiḓa tsha vhutshilo ha vhathu vha Mudzimu u bva kale na kale, vhe vha fulufhela uri vho vha vhe tsini na u ḓa ha Murena, fhedzi vha wana vhuṱanzi ha uri zwo vha zwi si zwa tshifhinga tshavho—na u lenga ha zwe Murena a dzudzanya u zwi ita, musi A tshi ri ḓisa sa vhathu tsini na mikano ya Kanana, sa zwe A ita kha Isiraele wa kale, A ri, “Dzhenani”, fhedzi ri si dzhene nga ṅwambo wa u sa tenda. Kha ri vhone hune ra vha hone na uri ndi ngani ri hafha. Kha ri gude ngudo dza vhomakhulukuku vhashu, ri anetshele phaṱhutshedzo na u sa fhela ha Murena mbilwana, ri Mu tendele uri A ite kha riṋe na nga riṋe zwe A si kone u zwi ita miṅwaha ya 100 yo fhiraho.

GSAM 11.3(Vhonani Ṱhumetshedzo C)

GSAM 11Khaedu kha Tshivhidzo tsha Zwino

GSAM 11.4Kha marangaphanḓa a Muraravho Loughborough o amba uri Vha-Adventist vha ḓuvha ḽa vhusumbe vha 100,000 vhe nga tshenetsho tshifhinga vha vha vhe tshivhidzo vho sumbedza maanḓa na u fhisea zwe zwa ita uri vha nge vha milioni 2. Ri tshi shumisa tshikalo tshenetsho, naa zwino ri nga ri vhathu vhashu vha milioni 6 vha nga milioni 120? U anetshela hawe miṅwaha ya u thoma hu ḓisela tshivhidzo tsha ṋamusi khaedu dzifhio?

GSAM 12.1Ri ni siela mbudziso dzi si gathi dzi sa athu u fhindulwa, dzine ra rabela uri heyi khanḓiso ntswa i dzi vuse:

GSAM 12.2(1) “Mutsukunyeo” wo ya ngafhi?

GSAM 12.3(2) Naa wo dzula u tshi fulufhedzea kha mitheo yawo?

GSAM 12.4(3) Tshanduko dzine ra dzi vhona tshivhidzoni u bva misini ya Loughborough dzi nga ṱalutshedzwa u swika ngafhi nga tshanduko dza vhutshilo ha vhathu kana nga u shuma ha Murena vhukati hashu?

GSAM 12.5(4) Ndi ngani ri tshi kha ḓi vha fhano nga murahu ha miṅwaha i anganyelaho 150 u bva tshee mutsukunyeo wa thoma u ḓivhadza uri u vhuya ha Kristo hu tsini?

GSAM 12.6Musi ndi tshi dovha nda lavhelesa ḓivhazwakale yashu yo fhiraho, ndo tshimbila kha ḽiga ḽiṅwe na ḽiṅwe ḽa mvelaphanḓa u swika kha vhuimo hashu ha zwino, ndi nga ri, Rendani Mudzimu! Musi ndi tshi vhona zwe Murena a ita, ndi ḓala u mangala na u fulufhela Kristo sa murangaphanḓa. A ri na tshine ra fanela u tshi ofha nga ha matshelo, nga nnḓa ha arali ra hangwa nḓila ye Murena a ri livhisa ngayo na pfunzo Yawe kha ḓivhazwakale yashu yo fhiraho.—Manweledzo a Vhutshilo a Ellen G. White, 196

GSAM 12.7U songo sudzulusa mukano wa kale we vhokhotsi au vha u vhea.—Mirero 22:28 Komiti ya Laiburari ya Vhavulanḓila vha-Adventist Loma Linda, California, 1 Ṱhafamuhwe, 1992

Note

Back