Adventist Pioneer
Library
aplib.orgLibrary
22 / 31

Bung 19 — “An Rahai Hmangin Anni Chu Hriet In Tih”

John Norton Loughborough

GSAM 299.1“Aman mi ṭhenkhat chu tirko dingin, ṭhenkhat chu zâwlnei dingin, ṭhenkhat chu Chanchin Ṭha puongtu dingin, ṭhenkhat chu kohran châwmtu le inchûktirtu dingin a pêk a; mi inthienghai sukfamkimna dingin, rawngbâwlna sin thawna dingin, Krista taksa siemṭhatna dingin; ei rêngin ringna le Pathien Naupa hrietnaah inpumkhatna ei hung tlung a, mihriem puitling ei hung ni a, Krista famkimna lienzie inkhina ei hung tlung hma chu.”1

GSAM 299.2Sandamtu chun a Thlarau thilpêkhai chu kohranah a dah a, ni famkim a hung thlen hma chena Lalpa sin chu “a dit dân angin” thaw zo dingin a ruot a. A mihai chu inlârna pakhat chu vâna inthawk a ni am, thlarau ṭhanawhai kuoma inthawk a ni am ti an ngaihtuona chauva a hnutchhiah nawh; chu thlarau chu Pathiena inthawk a ni le ni naw hrietna ding dânhai a pêk lem a nih. Hi ni hnuhnûnghaia khawm hin, zâwlnei Joel hrillâwk angin, Lalpan mihriem po po chungah a Thlarau a sûrtir a, naupasalhai le naunuhmeihaiin thu an hrillâwk ding a ni chun,2 Paulin mihai chun hrillâwknahai chu an hmuhsit ding a ni naw a, “thil po po chu infie” ding le “a ṭha chu chel det ro.” tiin a hril a nih.3

GSAM 299.3Pathien Thlarau sin hriet hran theina dinga Pathien Lekhathua dânhai leh khaikhin naw chun, hi ang inlârnahai hi iengtin dangin am infie thei a ni ding? Mihriem rilru hriet thiem theina chin a pel thil tinrêng chu Pathiena inthawk a ni kher nawh. Pathien Lekhabu chun ni hnuhnûnghaia Setanin khawvêl hlêmna dingin thilmak a thaw ding thu a hril a; Engkimtithei Pathien ni ropui indonaa an inkhâwmna dingin a thaw ding a nih.4 Chuleichun, inlârna chu Pathien Lekhabua dânhai leh fimkhur taka khaikhin chauvin thlarau thilpêk diktak chu hriet thei a nih. Khawvêl mihaiin sumnaw tehlêm an hriet suokna dingin fimkhurna an hmang ang bawk chu hi thila hin a ṭûl a nih.

GSAM 300Sumnaw Tehlêm Hriet Suokna

GSAM 300.1Kum 1863, April thlaa Detroit Sumnaw Chanchin Hriettirtuah chun Pu Prestonin sumnaw tehlêm hriet suokna dinga dân pangâ a pêk a. Tu khawm chu dânhai ang chuna a kuta hung tlung sumnaw tinrêng chu nguntaka a en chieng chun, hlêma um ding a hlau a ṭûl tawh naw ding thu a puong a nih.

GSAM 300.2Hrillâwkna thilpêk infiena dingin, Pathien Lekhabua hunhaia chu ang thilpêkhai an inlâr dân hrilfiahna leh khaikhin a, chutaka dânhai pêk ang chuna infie nêka a him lem dân dang a um nawh. Pathien Lekhathu chun sin ṭha tinrêng thaw dingin ei sukthuom famkim a (2 Timothe 3:16, 17), Hrillâwkna thilpêk a inlâr dân thu diktak a ziek bawk a. Pathien Thlarau sin diktak chu Setan sin le a thilpêk tehlêmhai laka iengtin am hriet hran thei a ni ti a hril bawk a nih.

GSAM 300THILPÊK DIKTAKHAI HRIET HRANNA DÂNHAI

GSAM 300.3Lalpan a Thua hin Pathien Thlarau inlârna diktakhai chu Setan sin laka hriet hran theina dingin dân hran hran sari tal a pêk a nih.

GSAM 300Dân Pakhatna—Inchûktirna Bîk

GSAM 300.4Zâwlnei Isai chun ni hnuhnûnghaia thil um dinghai thu a hrila, “Inhriettirna thu chu khuop la, ka inchûktirhai kârah dân chu chik rawh. Jakob chhûngte laka a hmêl thup Lalpa chu nghâk ka ta, ama chu beisei ka tih.... Chun an kuoma thlarau ko hlak mihai le bi bi le mum mum ṭawng mitthih thlarau be hlak mihai chu zawng ro, an ti cheu chun; mihai chun an Pathien an zawng ding a ni naw am? Mihringhai ta dingin mithihai an zawng ding am? Dân le inhriettirna thu kuomah fe ro; hi thu angin an hril naw chun, anniahin êng a um naw lei a nih.” a ti.5

GSAM 301.1Hi Pathien Lekhathua hin Pathien dâna chikna dah nâwkna sina inhmang mihai chu ensieng dingin ei ko a nih; anni chu Lalpa nghâka a sina inhmang mihai an nih. Ama chu an en a; chu chu, a hung ding an nghâk ti a nih. Hi hun bawk hin mithihai thlarau nia inchâl thlarauhai chun mihai chu an kuoma zawng dingin an ko a nih. Mi ṭhenkhat chun an kona chu an ngai a, hrietna hmuh dingin mithihai an zawng a; Lalpa ruok chun a mihai chu ama zawng dingin a sâwm a nih. Chu chun, ama an zawng chun inchûktirna bîk a pêk ding thu a hrilna a ni takzet a nih. Ieng thu khawm an kuoma hriettir thei naw mithihai chu an zawng a ṭûl nawh; “nisâ hnuoia thil thaw tinrêngah anni chu chatuonin chan an nei tawh naw ding a nih;” chun “mithihai chun iengkhawm an hre nawh.”6

GSAM 301.2A chunga Pathien Lekhathua hin thu hung tlung tinrêng infiena ding dân pêk a nih,—“hi thu angin an hril naw chun, anniahin êng a um naw lei a nih.” Lalpa kuoma inthawka thu hung tlung tinrêng chu a Thu le a dân leh inrem taka hril ding a nih.

GSAM 301.3Hi dân hi Pi White lekha ziekhai chunga hmangin, kum sawmngâ le pahni liem ta chhûng hin a Inhriettirna thuhai chu fimkhur takin ka tiem a, Pathien dân le Pathien Lekhabu inhriettirna thu leh ka khaikhin a, an pahnia hin inremna famkimtak ka hmu a nih, tiin ka hril duh a nih. A inchûktirnahai hi Pathien Lekhathu thlâkna dinga thuphuon thar pêkna dinga hung a ni nawh; hi hunhaia hin mihai chu khawlaiah le iengtin am hruoi suol le Thua inthawka hruoi bo an ni thei ti ei entirna ding a ni lem a nih. Pi White Inhriettirna thuhai dinhmun chu, ama ngeiin chuonghai chungchânga a ziek hmangin a ṭha taka hrilfiah thei a nih:—

GSAM 301.4“Pathien Thu chu lungthim inthim tâwpa khawm êng pêk dingin a tâwk a, hriet thiem duhna nei po poin an hriet thiem thei a nih. Nisienlakhawm, hi po po a ni hnunga khawm, Pathien Thu inchûktu nia inchâl mi ṭhenkhat chu a inchûktirna fiah tâwphai leh insâi taka um an la ni hlak a nih. Chuleichun, pasal le nuhmeihai chu inchhuânlama an um thei nawna dingin, Pathienin Inhriettirna thu fiah le chiengtakhai a pêk a, an zâwm ding an ngaihthah a Thu kuomah a hruoi kîr hlak a nih.

GSAM 302.1“Pathien Thu chu hringna dân indik siem dingin buldân ṭha tinrêngin a sip a nih. Inhriettirna thuhai, mi po po ta ding le mi mal ta dinghai chu, hi buldânhai chunga an lungthim an pêk bîkna dinga ruot an ni a nih.... Pathien Lekhathu chu in hre chieng nawh. Pathien Lekhabu inkhina tlung le Krista zuitu famkimna nei duhna neia Pathien Thu chu in inchûk zing ni sien chu, Inhriettirna thuhai hi in ṭûl naw ding a nih....

GSAM 302.2“Inhriettirna thu pêkhai hmangin Lalpan vau cheu le zilh cheu le thurâwn pêk cheu a tum a, a Thu thutak a pawimawhzie chu in lungthima nemngheh a duh a nih. Inhriettirna thu ziekhai hi êng thar pêkna ding an ni nawh; Pathien thâwk khuma puonglâr ta thutakhai chu thinlunga chiengtaka nemnghehna ding an ni lem a nih.... Thutak dang belsa puonglâr a ni nawh; amiruokchu Pathienin Inhriettirna thuhai hmangin thutak ropui pêksa hai chu a sukawl a, ama thlang dân ngeia mihai hmaah a dah a nih. Chuonghai chun an lungthim an kâitho a, an lungthima an nemnghehna ding le, mi po po inchhuânlama an um thei nawna dingin a thaw a nih....

GSAM 302.3“Inhriettirna thuhai chu Pathien Thu sukhniamna ding an ni nawh; a chawisan le, a kuoma lungthimhai hîp dingin an ni lem a nih, thutak awl mâwi tak chun mi po po lungthima hmun a nei theina dingin.... Tûna Pathien ro hlu bîk nia inchâl mihai hin a Thua a hril chieng a phuthai chu zâwm ni hai sien chu, an thaw ding hriettira anmani kâitho ding le, an suolzie le Pathien Thu zâwmna an hnutchhiah leia hlauhawmzie chu an hriettirna dinga Inhriettirna thu bîkhai hi pêk a ni naw ding a nih.”7

GSAM 302Dân Pahnina—Zâwlnei Diktakhai

GSAM 302.4Zâwlnei diktak po po chun Pathien dân le a Thu inhriettirna leh inrem taka an hril ding thu ei hriet ta a nih. Tirko Johan chun zâwlnei diktakhai inchûktirna dân hrilfiahtu dân dang pakhat a pêk a nih. Aman, “Dittakhai, thlarau tinrêng chu ring naw unla, Pathiena inthawk an ni le ni naw hriet dingin thlarauhai chu infie ro; zâwlnei tehlêm tamtak khawvêlah an fe suok ta leiin. Hi ang hin Pathien Thlarau chu hriet in tih: Isu Krista tisaa a hung ti pawm thlarau tinrêng chu Pathiena inthawk a nih; Isu Krista tisaa a hung ti pawm naw thlarau tinrêng chu Pathiena inthawk a ni nawh. Chu chu Krista kaltu thlarau, a hung ding thu in hriet kha a nih; tuhin khawm khawvêlah a um ta a nih.” a ti.8

GSAM 303.1A chunga Pathien Lekhathu chu nguntakin en ro. Isu Krista chu “tisaa a hung tawh,” ti pawm tu khawm tiin a hril nawh; “tisaa a hung a nih,” tiin a hril lem a nih. Chu chu ei ringna chhângin, a Thlarau hmanga a hung a, ei sûnga a um ti a nih. Hi hi Chanchin Ṭha thutak laimuru a ni takzet a nih, “in sûnga Krista, ropuina beiseina chu.”9

GSAM 303.2Pi White lekha ziek tinrênga nunpui ding thu bulpui chu, vân ram kawnga ei hmasuon duh chun, ei sûnga chêng Sandamtu dingin Krista a ṭûl ti hi a nih. A lekha ziekhai chun a hmasa, a hnuhnûng le hun tinrênga Krista ei ṭûl thu an inchûktir a nih. Hi thu entirna dingin, a lekhabu, Krista Kuoma Pênnahai, chu en dingin ei ko a nih. Chu lekhabu chu tuhin ram dang ṭawng sawmpariet insuo a ni a, chuong ṭawnghaia bu sâng tamtak umhai chu hril ta naw khawmin, Sâp ṭawng chauvin bu nuoi pakhat nêka tam zuar a ni ta a nih. Presbyterian rawngbâwltu pakhat chun chu lekhabu chu a tiem hnûhin, a kohran mihai le a ruolhai ta dingin bu za thum nêka tam a chah a. Aman, “Hi lekhabu hi Lalpa Isu Krista hretu ṭha tak mi pakhat ziek a nih,” a ti a nih.

GSAM 303Dân Pathumna—Zâwlnei Tehlêmhai

GSAM 303.3Johanin zâwlnei tehlêmhai hriet suokna ding dân a pêk a: “Anni chu khawvêla mi an nih; chuleichun khawvêl thu an hril a, khawvêlin an thu a ngai hlak a nih.”10 Zâwlnei tehlêmhai inchûktirna chun mani inphat le kraws pu kawng chawisan nêkin tisa duhzâwng thinlung chu a tlungpui ding a nih. Zâwlnei tehlêmhai chun “Israel Mi Inthieng chu” chawisan nêkin “thu ngai nuom” an inchûktir ding a nih.11 Pi White lekha ziek phêk tlêmtê chau tiem tu khawmin chuonghai chu mani inphat le kraws pu kawng an ni a, khawvêl leh tisa duhzâwng thinlung sukthlâwm ding an ni naw ti an hmu thei a nih.

GSAM 304Dân Palina—Hrehawm Tuorna le Dâwtheina

GSAM 304.1Hi thu hi ei la suichieng pei ding a, dân palina dingin tirko Jakob thuhai hi hmang ei tih: “Ka unauhai, Lalpa hminga thu hril zâwlneihai chu hrehawm tuorna le dâwtheina entirtu dingin hmang ro.”12 Chu hmasânga zâwlneihai thil tuor thu ei tiem chun, an chunga thlêmna lien tâwp ṭhenkhat chu, Israelhaiin an kuoma Inhriettirna thu fiah tak pêkhai an hnar le an kalh dân chu hmuh a nih, ti ei hriet a nih. Chu hunhai chu tawi têa inchûk khawmin zâwlnei diktak le tehlêmhai um dân a entir nghâl a nih. “Sipai rualhai Lalpan hiti hin a ti: In kuoma thuhrillâwk zâwlneihai thu chu ngai naw ro; anni chun in lungthim chu a thlâwnin an siem a nih. An thinlung ngeia inlârna thu an hril a, Lalpa bauva inthawk thu a ni nawh.”13

GSAM 304.2Pi White lekha ziekhaia hin a tiemtu lungthim a thlâwna siem ding iengkhawm a um nawh; mi dang pakhatin a hril angin, “Inhriettirna thuhai inthawkin sim sêng naw hial veiin thlarau lam ṭhatna ropui ka dawn ta a nih. A nih takzetin, Pathien ka ringna a tlêm dân le, inpêkna ka tlâkchham dân le, thlarauhai sandamna dingin ka ṭhahnemngai a tlêm dân leia zilhna dawng ang ka inhriet nawin ka tiem ngai nawh,” a ti lem a nih. Chuleichun, Pi White Inhriettirna thuhaiin an thaw suok chu Jeremiain a hrilfiah zâwlnei tehlêmhai inchûktirna inthawka suok leh a dang takzet a nih.

GSAM 304.3Zâwlnei chun zâwlnei tehlêmhaiin iengtin am an inchûktir ding ti khawm ei hril a nih: “Kei hmuhsit mihai kuomah, Lalpan, In rem ding a nih, a ti, an ti zing hlak a; mani thinlung suangtuona zuia fe mi tin kuomah, In chungah thil ṭhanaw iengkhawm a tlung naw ding a nih, an ti bawk hlak a nih.”14

GSAM 304.4Pi White Inhriettirna thuhai inchûktirna um dân chungchângah, fimkhur taka a tiemtu pakhat thuhai a nuoiha hi la chhuong ka tih:

GSAM 304.4“A Inhriettirna thuhai rêng rêng chu a bul inthawka a tâwp chen ka tiem ta a, a tam lem chu vei tamtak ka tiem a nih. Chuonghai rêng rêngah hin nungchang ṭhanaw thu tlar pakhat lek khawm ka hmu ngai nawh; thil inthieng tak le Krista zuitu nun leh inrem naw iengkhawm a um nawh. Tu khawm Pathien Lekhabu laka emaw, Krista laka emaw hruoi bo thei thil iengkhawm a um nawh; chuonghaia ruok chun Pathien thu zâwm ding le, Isu hmangai ding le, Pathien Lekhathu ring ding le, hun tina suichieng dingin ngênna ṭhahnemngai tâwp ka hmu a nih. Chu ang Pathien kuoma nai tak umna, inpêkna ṭhahnemngai tak, nun inthieng hmang dinga ngênna lungngai takhai chu Pathien Thlarau chauvin a chawktho thei a nih.”

GSAM 305.1A bul inthawka a Inhriettirna thuhai fimkhur taka en hlak pakhatin a ziek a:

GSAM 305.1“Hlauhna le mi thlang bîkna neia ni nawin, fiah le rinum taka mi leh indâwr dân chungchângah, tlâkchhamna iengkhawm a um naw thu inhriettir ka duh a nih. Hi sin ṭhuoitu thuneina chu tumna hniam le suolhai ni sien chu, nguntaka suichieng Inhriettirna thuhai le zilhna rinumhai hmunah fak vervêkna thuhai an sip ding a nih. Ṭawng fiahna, thil suol chunga rinum taka zilhna, Sandamtu an ṭûl thu inhriet thlarau khûrhai kuoma lainatna le infuina thuhai, le an thil tisualhai bânsan tuma inngaitlâwm taka zawng mi suolhai kuoma chu ang thu pêkna,—chuonghai chu a sin thawna pêng lien tak an ni a nih. Inlârnaa a hmuh mi tamtak thil tisualhai zilhna Pi White Inhriettirna thu chu rinumna ropui takin pêk a ni a, ṭhatna ropui tâwp a nei bawk a nih.”15

GSAM 305Dân Pangâna—Hrillâwkna Diktakhai An Tlung Kim Hlak

GSAM 305.2Zâwlnei diktak le tehlêmhai chungchânga Mosie thu hril pakhat chu Dân Pahnina bung sawmparietah a um a nih. Aman, “Lalpan a hril naw thu chu iengtin am ei hriet ding? Zâwlnei pakhatin Lalpa hminga thu a hril a, chu thil chu a zui hung suok nawin a tlung kim bawk naw chun, chu chu Lalpan a hril naw thu a nih. Zâwlnei chun mani inchâl hrimin a hril lem a nih; ama chu hlau naw rawh.” a ti.16

GSAM 305.3Hi thu bawk hi a nuoiha Pathien Lekhathuhaia khawm hin hmuh a nih: “Lalpan thu a pêk naw chun, tu thu hril am a tlung kim ngai?”17 Zâwlnei Samuel chungchângah, “A thu hril po po chu a tlung kim ngei hlak a nih.” tiin hril a nih.18 “Zâwlnei thu hril chu a tlung kim chun, Lalpan a tir ngei a nih ti chu zâwlnei chungchângah hriet a ni ding a nih.”19

GSAM 306.1Hi lekhabu ziektuin Pi E. G. White chu Hrillâwkna Inlârna neia a hmuh hmasatakah inthawk tuhin kum sawmngâ le pathum nêka tam a liem ta a nih. Hi kumhai chhûng hin, thil hung tlung dinghai chungchângah ama chun hrillâwkna thu tamtak a hril ta a nih. Hi hrillâwkna ṭhenkhat chu thil tlung kim tahai chungchâng an ni a, ṭhenkhat chu tuhin an tlung kim mêk a, danghai ruok chu nakin dinga la um an nih. Thil liem ta emaw, tûna um mêk emaw chungchângah chu, a hlawh tlung naw tum pakhat lek khawm ka hre nawh. A hrillâwkna ṭhenkhat chu hril lan a ni ta a nih. Ei thuhril hi ei la chhunzawm pei lai hin danghai chu bung hung zuihai ah an hung lang ding a nih.

GSAM 306Dân Parukna—Thilmak Thawna Chu Zâwlnei Diktak Infiena A Ni Nawh

GSAM 306.2Pathien thu ziek mi tamtakin zâwlnei diktak inchikna chu thilmak thawna a nih tiin an nemngheh a, Pathien Lekhathu hrilfiahna buhaia khawm ziek a nih. Chu ang dân chu Pathien Lekhathua inthawk ei la inchûk ding a la ni a nih.

GSAM 306.3Thilmak thawna chu zâwlnei diktak nihna hriettirna ni sien chu, Thuphuongsuo 19:20-a hril “zâwlnei tehlêm” khawm chu zâwlnei diktak tia puong a ni ding a nih; iengruol tiin, “Sahrâng chu man a ni a, a hmaa thilmak thawtu zâwlnei tehlêm khawm a rualin man a ni a nih. Chu thilmakhai hmang chun Sahrâng inchikna dawng tahai chu a hlêm a nih.” tiin hril a ni si a. Chu thuneina bawk chun “sahrâng hmaa thilmak thaw theina thu a nei hmanga khawvêla chênghai chu” a hlêm thu Thuphuongsuo 13:14-ah hril nâwk a nih. Hi dân hi chu ang bawka ei hmang chun, Setan ngei khawm zâwlnei diktak a nih, ti thu ei pawm dingin ei intir a ni ding a nih. Hremna hnuhnûng sari laha paruknaa sin bîk thaw ding thlarau ṭhenkhat chu “ramhuaihai thlarau, thilmak thawtu, Engkimtithei Pathien ni ropui indona dinga inkhâwmtir dingin leia le khawvêl pumpuia lalhai kuoma fe suoktu,” tiin ko an nih.20

GSAM 306.4Zâwlnei diktak nihna hriettirna chu Inlârnaa a um naw laia a thilmak thawhaia hmuh ding a nih chun, Pathien Lekhabua zâwlneihai laha chu infiena chu pal tlang thei chu tlem tê chau hmu ei tih; an sin chungchânga ziek chu thu tâwpna ding ei hmang bîk a nih chun a tlem lem ding a nih. Zâwlnei ṭhenkhatin thilmak an thaw thu ziek a nih, Elija le Elisa le Paul chungchângah ang khan. Nisienlakhawm, Pathien Lekhabu sûngah Isai, Jeremia, Daniel, Hosea, Joel, Amos le mi danghai thilmak thaw thu ziek tu am a hmu ta? Anni ruok chu Lalpa zâwlnei diktakhai an ni a, Lalpan zâwlnei diktak infiena dinga dân a pêkhai chun anni chu chu ang mi an ni ti a hriettir a nih.

GSAM 307.1Thilmak thawna chu zâwlnei diktak infiena a ni naw thu hi Baptistu Johan chungchânga Pathien Lekhathu thu ziek tiem chun fiah takin hmuh a nih. Zâwlnei a nih thu chu a pa Zakaria hrillâwknain a entir a nih. Pathienin a naupa ding chungchânga a kuoma Inlârna a pêk thu a hril laia chun, “Nang khawm, naupang, Chungnung Tâwp zâwlnei tiin ko i ni ding a nih; a kawnghai buotsaihna dingin Lalpa hmaa fe i ni ding si a.” a ti.21 Ei Sandamtu ngeiin Johan chu a hmaa kawng buotsaih ding zâwlnei ngei a nih ti a pawm a; iengruol tiin Johan chungchângah, “Nisienlakhawm, ieng en dingin am in fe suok? Zâwlnei en dingin am? A nih, in kuomah ka ti, zâwlnei nêka ropui lem tak en dingin. Hi mi chungchângah hin, Ngai ta, i hmaa ka thupuongtu ka tir a nih, i hmaa i kawng buotsaihpêk dingin, ti ziek a nih. In kuomah ka ti, nuhmei sul inthawka pienghai kârah Baptistu Johan nêka ropui lem zâwlnei an um nawh.” a ti a nih.22

GSAM 307.2Hitakah hin Sandamtu chun Johan chu zâwlnei a nih ti fiah taka a hril thu a um a nih. Thilmak thawna infiena chu hmang ei ti la, a suok chu en ei tiu. Chanchin Ṭha puongtu Johan ziek Chanchin Ṭha buah hin hi thuhai hi ei nei a nih: “Chun mi tamtak a kuomah [Krista] an hung a, Johan chun thilmak iengkhawm a thaw nawh; nisienlakhawm hi mi chungchânga Johan thu hril po po chu a dik a nih.” an ti a nih.23 Hi thu pakhat chau hin zâwlnei diktak inchikna chu thilmak thawna a nih ti inchâlna chu a hnâwl famkim a nih.

GSAM 307.3Dân Pahnina 13:1-3-a pêk hi dân, tûna ei siarnaa dân parukna ei ti hi, thilmak emaw, thilmak thawna emaw tinrêng hnunga ei tlân hrim hrim nawna dinga ei vênghimtu a nih. A hmasa takin chu thil chun Lalpa kuomah ei suknaipui lem am, ama laka ei hruoi bo am ti fimkhur taka ei hriet hma chun ei zui ding a ni nawh. Hi châng hin a tak takah dânhai rêng rêng hmang dingin ei hril a, Pathien le a dân leh a inrem le rem naw en bîk dingin ei hril a nih.

GSAM 308.1Hi dân parukna hin mi tehlêm pakhatin thilmak a thaw chun, fimkhur taka infie a ni chun, a ruala Pathien Thu thutak inthienghai laka pên bêngna le, mani inphat kawng kal duh naw thinlung tlungpui dinga inkhina sukhniamna chu hmuh a ni ding a nih ti a inchûktir a nih. Lalpan chu ang mi tehlêm chu hung suok a phal a; a fe dân chu Pathien nau diktak infiena a ni a, thilmak thawtu um dânin a hruoi tlung ding hmun le a tumna chu fimkhur taka ngaihtuona hun a pêk a nih. Pathien Thu chel det mihai chu thilmak thawtu tehlêmin a hîp suol nêkin, chu ang thil an tuor zârah Pathienah an hung nghet lem a nih.

GSAM 308.2Hi ni suolhaia hin mi tamtakin “ringnaa tidamtu,” “Pathien thiltheinaa tidamtu,” “Krista Zuitu Thil Hrietna hmanga tidamtu,” le a dang dang nia an inchâl lai hin, Pathien Lekhathua dânhai nguntaka hmang chu a ṭha ding a nih. Hi “tidamtu” ṭhenkhat an tum le an thil duhhai fiah taka hriet hran dingin Pathien dânhai le Thlarau Inthieng êng pêkna ei ṭûl ding a nih; an sin thaw chu a vervêk takzet a nih. A dang ṭhenkhat ruok chun Pathien dân le tuhun dinga a thutak chu lang taka an ngaihthah a nih. Hi “tidamtu” nia inchâl ṭhenkhat chu Pathien dân hril langna chau khawmah mi âa sipa um angin an hung thinrim hlak a nih. Lalpan a dân inthieng puonglâr thucha a nei thu a dik ang bawkin, a dân sawisiet a, chu dân hril lang chau tuhai khawm an hma laka hnawt suok mihai chu Thlarau Inthieng chawkthona an nei naw thu a dik bawk a nih.

GSAM 308Dân Sarina—An Rahai

GSAM 308.3“Zâwlnei tehlêmhai lakah inring ro; anni chu berâm silfên silin in kuomah an hung a, nisienlakhawm an sûngah ruok chun satene riltâm hrângtakhai an nih. An rahai hmangin anni chu hriet in tih. Mihaiin hlinga inthawk grêp rah emaw, lênhlinga inthawk theichang rah emaw an lâ khâwm hlak am? Chu ang bawkin thing ṭha tinrêngin rah ṭha a chhuo hlak a; thing ṭhanaw ruok chun rah ṭhanaw a chhuo hlak a nih. Thing ṭha chun rah ṭhanaw a chhuo thei naw a, thing ṭhanaw khawmin rah ṭha a chhuo thei nawh. Rah ṭha chhuo naw thing tinrêng chu sât thlâkin a um a, meia paih lût a ni hlak a nih. Chuleichun an rahai hmangin anni chu hriet in tih.”24

GSAM 309.1Ei Sandamtu hi thuhai hin Chanchin Ṭha hun chhûngah Hrillâwkna thilpêk a um ding thu a pawm a nih. Hi sin leh inzawm zâwlnei diktak an um ding a ni naw a, Hrillâwkna Inlârna tinrêng chu thil ṭhanaw inthawk a ni vawng ding a nih chun, “Zâwlneihai lakah inring ro,” a ti naw ding am? A chi tinrêng iengtin am hriet hran thei a ni ti fiah taka a hril hi, Thlamuontu, Thlarau Inthiengin “thil hung tlung dinghai” (Johan 16:13) a entirna sina hin Hrillâwkna thilpêk diktak a um ding thu hriettirna ṭha tâwp a nih. Hi dân, ei siarnaa dân sarina ei ti hi, hlawh tlung naw ngai a ni nawh. Kristan an rahai hmangin anni chu hriet thei in tih a ti nawh; chieng takin, “an rahai hmangin anni chu hriet in tih.” a ti lem a nih.

GSAM 309.2Pathien Thlarau thilpêk diktakhai sina hin ieng rah am hmuh ding a ni? tiin ei zawt a nih. Lalpan kohrana thilpêkhai a dahna tum chungchânga Paul thu hrilah a chhânna chu hmuh a nih: “Chuleichun aman a ti, chung sâng taka a hang fe laia chun, saltânga umhai chu salin a ṭhuoi a, mihriemhai kuomah thilpêkhai a pêk a nih.... Chun aman mi ṭhenkhat chu tirko dingin, ṭhenkhat chu zâwlnei dingin, ṭhenkhat chu Chanchin Ṭha puongtu dingin, ṭhenkhat chu kohran châwmtu le inchûktirtu dingin a pêk a; mi inthienghai sukfamkimna dingin, rawngbâwlna sin thawna dingin, Krista taksa siemṭhatna dingin; ei rêngin ringna le Pathien Naupa hrietnaah inpumkhatna [a sîra ziekah, “inpumkhatnaa lûtna”] ei hung tlung a, mihriem puitling ei hung ni a, Krista famkimna lienzie inkhina ei hung tlung hma chu.”25

GSAM 309.3Vântirko pathumna thucha a inṭanna inthawka a leh inzawm Hrillâwkna thilpêk chunga hi dân hi hmang la, ieng am a hung suok?—Pi White hmanga inchûktirna pêk zinhai chu inpumkhatna le inremna kawng an ni ti ei hmu a nih. “Inrâwn khâwm ro,” le “inchel khâwm det ro,” tiin anni chu Krista leh inpumkhat dingin an zilh a, chu ang chun inpâwlna diktak le inkâra inpumkhatna chu a sukdet a nih.

GSAM 310.1Hi sin dotu ṭhenkhatin nuihsawhna thuin, “In kâra Pi White Inlârnahai um kha ni naw sien chu, in sin hi rei tak khan a keh darh tawh ding a nih,” an ti ta a nih. A chhânnaah, “Chu chu a dik a nih; chu hmang chun Lalpan thurâwn le vaukhânna le êng a pêk a, chu ang chun inṭhenna thu chu paih bo a ni a, sin chu a hmasuon ta a nih,” ti a nih. Chuleichun, chu thilpêk bei dingin an tum chu a tak takah a rah chu Hrillâwkna thilpêk diktak rah a nih ti inhriettirna a ni lem a nih.

GSAM 310.2Kum sawmruk le a nêka tam chhûng hin Pi White hmanga Hrillâwkna thilpêk inlârnahai chu hi dân sarihai hmangin infie a ni ta a, iengkimah Hrillâwkna diktak dinga phût po po chu an tlung kim ta a nih.

Notes

  1. Ephesi 4:11-13. ↩
  2. Joel 2:28, 29, ↩
  3. 1 Thessalonika 5:20, 21. ↩
  4. Thuphuongsuo 16:14. ↩
  5. Isai 8:16-20. ↩
  6. Thuhriltu 9:6, 5. ↩
  7. Kohran Ta Dinga Inhriettirna Thuhai, bu 5, phêk 663-667. ↩
  8. 1 Johan 4:1-3. ↩
  9. Ephesi 3:17; Kolossa 1:27. ↩
  10. 1 Johan 4:5. ↩
  11. Isai 30:10, 11. ↩
  12. Jakob 5:10. ↩
  13. Jeremia 23:16. ↩
  14. Châng 17. ↩
  15. J. N. Andrews, kum 1867, December thla Ennâwkna le Thupuongtu-ah. ↩
  16. Dân Pahnina 18:21, 22. ↩
  17. Ṭap Hla 3:37. ↩
  18. 1 Samuel 9:6. ↩
  19. Jeremia 28:9. ↩
  20. Thuphuongsuo 16:14. ↩
  21. Luka 1:76. ↩
  22. Luka 7:26-28. ↩
  23. Johan 10:41. ↩
  24. Matthai 7:15-20. ↩
  25. Ephesi 4:8-13. ↩

Note

Back