Ka Jinglamphrang
GSAM 3.1DON bun ki kot kiba myntoi ha kti jong ki paidbah mynta, bad ka jingmap jong nga halor ka jingpynlang sa kawei pat ha kata ka thup ka long ba ha kine ki sla nga pynpaw bun kiei kiei kiba ïadei bad ki Adventist, khamtam ki Adventist jong ka sngi saitjain, kiba ym pat ju pynpaw ha kane ka rukom ha khmat ki paidbah. Nalor kane, bun kiba la pdiang ïa ka kam ha ki snem kiba hadien, bad kiba ym shym la sakhi ïa kine ki jingjia, ki la kyrpad da ka jingshitrhem ban ïathuh ïa kine ki jingshisha bad ki jingïashem na kito kiba la don shuwa ha ka kam. Namar ba nga la tip bha ïa ka jingïaid lynti jong ka jingwan arsien ha ki snem 1843 bad 1844, bad naduh ka 2 tarik u Kyllalyngkot, 1849, nga la pynbna ïa kane ka jinghikai, nyngkong kum u Adventist, bad naduh 1852 kum u Adventist jong ka sngi saitjain, nga kheiñ ba ka long ka jingsngewbha ban “ïathuh ïa kiei kiei kiba nga la ïohi bad ïohsngew.”
GSAM 3.2Nga la pyni ïa ka jingïathuh shaphang ka jingïaid lynti jong ka jingwan arsien, kaba naduh 1831 haduh 1844 ka la saphriang sha man ka ri kaba la shai ha ka pyrthei.
GSAM 3.3Naduh 1845 ki la don kiwei pat ki kynhun jong ki Adventist kiba la pynbna, bad ki dang pynbna, ïa ka jingwan kaba jan jong U Khrist. Ha ka jaka ban bud ïa ka jingïathuh jong kine baroh, ka jingthmu jong nga ka long ban ai, ha ka jingïathuh kaba jrong, ïa ka jingmih bad ka jingïaid lynti jong ki Adventist jong ka sngi saitjain, da kaba buh kyrpang ïa kita ki lad kiba, ha ka jingïalam jong U Blei, ki la jingïarap ban pynroi, na ka jingduk bad ki jingsdang kiba rit, ïa ka jaidbynriew kaba, watla ki don tang kumba shispah hajar, hynrei don ki nongïaleh pyrshah kiba la ong, “Namar ka bor bad ka jingshitrhem da kaba ki trei, uwei u briew un bishar ba ki long ar million.”
GSAM 3.4Wat kiba tip tang khyndiat shaphang ka histori jong ki Adventist jong ka sngi saitjain ki tip ba naduh 1845 ka Mrs. E. G. White ka la don ka jingïadei kaba paw bha bad kane ka jingïaid lynti, kum ka nongkren bad nongthoh. Ki tip ruh ba bad ka kam jong ka ki la don ki jingïaleh kiba kyrpang, lane ki jingai. Ka la long ka kabu jong nga ban donlang bad sakhi ïa ka jingïatreikam jong kane ka jingai kumba sanphew sien. Ha kine ki sla nga la buh jingmut ïa kumba arphew hynriew tylli ki jingïathuhlypa kiba shai kiba la pynbna da ka Mrs. White, kiba la urlong da ka jingbeit kaba khraw.
GSAM 4.1Nalor ki jingshisha kiba nga hi nga la ïohi, nga la pyni ruh ïa ka jingphla jong kiwei pat ki sakhi kiba la ïohi da la ki khmat shaphang ki jingïashem jong ki. Kine ki jingshisha ki dei ban khia kham bun ha u nongpule uba bishar hok ban ïa ki jingong kiba la shu pynmih khlem nongrim da kito kiba ym shym la don ha kine ki jingïalang.
GSAM 4.2Nga aiti ïa kane ka kam ha ki nongpule, da kaba kyrmen ba, da ka jingkyrkhu jong U Blei, ka jingïapule ïa kine ki sla kan long ka lad ban pynroi ïa ka kam jong U Khrist ha kiba bun ki dohnud, bad da kaba shaniah ba baroh, katba ki pule, kin kynmaw ïa ki ktien jong u Paul sha ki Thessalonika, “To tynjuh ïa kiei kiei baroh; bat skhem ïa kata kaba bha.”