Adventist Pioneer
Library
aplib.orgLibrary
Table of Contents
12 / 31
12 / 31

Ka Lynnong 9 — Ka Por Jingap

John Norton Loughborough

GSAM 148.1“Te ïa ka hima bneng yn sa pynsyriem ïa ki shiphew ngut ki samla sotti, kiba la shim ïa ki sharak jong ki, bad ki la leit noh ban ïashem ïa u nongleitkurim. Bad san ngut na ki ki long kiba stad, bad san ngut kiba bieit. Kito kiba bieit ki la shim ïa ki sharak jong ki, bad kim shym la shim umphniang bad ki; hynrei kiba stad ki la shim umphniang ha ki khiew jong ki ryngkat bad ki sharak jong ki. Katba u nongleitkurim u dang slem, ki baroh ki la lyngngohthiah bad ki la ïohthiah.”1

GSAM 148.2U Khrist u long u nongleitkurim jong ka pharshi.2 Kumta ka jingleit noh ban ïashem ïa u nongleitkurim ka dei ban pyni ïa ka jingïaid jong ki briew U Trai ban ïashem ïa U Khrist ha ka jingwan jong U, namar ka mat jong ka jingkren ha u Mathai lynnong arphew saw bad arphew san ka long ka jingwan U Trai. Ka ktien U Trai ka long ka sharak.3 Ki samla sotti baroh ki la shim ïa ki sharak jong ki. Ka jingbieit jong katto katne na ki samla sotti ka long ba ki la pdiang tang ka jinghikai ïa ka jingshisha, khlem kata ka jingaiti shisha ïa U Trai kaba lah ban pynroi ïa ki jingbha U Mynsiem ha ka dohnud u riewngeit. Ïa kane ka kam la pyni ha ka pharshi da ka “umphniang ha ki khiew jong ki.” Ka jingslem jong u nongleitkurim ka dei ban pyni ïa ka jingsngewsih jong kito kiba leit noh da kaba kyrmen ban ïashem ïa la U Trai.

GSAM 148Ka Por kaba ka Pharshi ka Thew ïa ka

GSAM 148.3Ka kyntien “te,” kaba sdang ïa ka pharshi, ka ai ha ngi ka dak ban tip ïa ka por kaba ka thew ïa ka. Ka bud hajan ïa kaei kaba la ong ha ka lynnong kaba la dep, ym hadien ka jingwan arsien U Trai, hynrei hadien ba la pynbna ïa ka pharshi jong u dieng dumbur, kaba pyntip ba ka jingwan U Khrist ka long “ha ki jingkhang,” bad ba ka la poi kata ka pateng bynriew kaban ym leit noh tad ynda U Khrist hi Un paw ha ki lyoh bneng. Ka thew ruh ïa ka por haba katto katne na ki shakri kiba la ai ïa ka khubor ki ong ha ki dohnud jong ki, “U Trai jong nga u pynslem ïa la ka jingwan; bad ki sdang ban shoh ïa ki para shakri jong ki, bad ban bam bad dih bad kiba buaid.”

GSAM 149Ka Jingshoh ïa ki Para Shakri jong ki

GSAM 149.1Kine ki la long “ki para shakri,” kiba pynbna ïa kajuh ka khubor ha ka jingïatylli; hynrei mynta katto katne na ki ki phai noh na kata kaba ki la hikai, bad ki “shoh” ïa ki para shakri jong ki kiba ai ïa ka “jingbam ha ka por kaba biang”—kiba pynbna ïa ka jingpynkhreh kaba donkam ban ïashem ïa U Trai Uban sa wan shen. Ki “shoh” ha kajuh ka rukom kaba la thmu ban shoh ïa u Jeremaïah. Ki briew ki la ong, “To wan, bad to ngin shoh ïa u da u thylliej, bad to ngin ym sngap ïa kawei ruh na ki ktien jong u.”4 Kumta kine ki shakri ki la sdang ban hikai ha ka rukom kaba khanglad ïa ka kam jong ki shakri “kiba ïaineh.” Ïa kane kajuh ka kynhun la kren kumne, “To kynmaw namar kata kumno me la pdiang bad la ïohsngew, bad to bat skhem, bad kylla kaba mut. Namar kata lada men ym sharai, ngan wan ha me kum u nongtuh, bad men ym tip ha kano ka por ngan wan ha me.”5

GSAM 149.2Ka pharshi jong ki samla sotti ka thew ïa ka por haba “ki para shakri” ki phai noh na ka khubor jong ka jingwan kaba jan U Trai, bad ki “sdang ban shoh.” Ki sdang ruh ban leh ïa kawei pat ka kam—ban “bam bad dih bad kiba buaid.” Ki ïakhawai bad kito kiba kwah ban pynhun ïa la ki jingkwah bam. U Solomon u la ong shaphang kiba kum kita, “Wat long hapdeng ki nongdih waiñ; hapdeng kiba bam doh palat: namar u nongbuaid bad u nongbam palat kin wan sha ka jingduk.”6

GSAM 149Ka Jingsngewsih kaba Nyngkong

GSAM 149.3Mynta ka jingkylli kan mih, “Kaei kaba la jia ha ka jingïashem jong ka jingwan arsien kaba ïahap bad kine ki jingkren?” Ki la don ki jingïaid kiba ïahap pura bad ka jingïathuhlypa. Kito kiba ai ïa ka khubor haduh u Ïaïong, 1844, ki la trei hapdeng ki balang, bad ki nongïalap jong ki balang bapher bapher ki la ïasnoh bad ki ha ki jingtrei jong ki. Kumta ki la long “ki para shakri.”

GSAM 150.1Kito kiba ai ïa ka khubor ki la hikai ba ki 2300 sngi jong u Daniel 8:14 kin kut ryngkat bad u snem Jiw 1843, kaba long ha u snem jong ngi 1844. Ki la pynbna ba ka por jong ka jingbishar U Blei kan wan ha kaba kut kata ka por. Kawei pa kawei ka kynhun balang ha ka ri ha kata ka por ka la ngeit ba ka sngi jingbishar kan sdang da ka jingwan arsien U Trai jong ngi. Kumta lah ban ïohi shai ba ki Adventist ki la mut ba U Trai Un wan ha kaba kut kata ka por jong ka jingïathuhlypa. Ki la ong, “Kane ka por ka lah ban kut ryngkat bad u bnai, Lber 21, 1844, kaba kut jong u snem Jiw 1843 katkum ka jingïaid jong ki aiom.” Kumta ki la khmih sha kaba kut jong u Lber ne kaba sdang jong u Ïaïong, 1844, kum ka por kaba U Nongpynim U lah ban wan.

GSAM 150La Pynpaw ïa ki Shakri Bymman

GSAM 150.2Haba kaba kut jong u Lber ka la poi bad ka la leit noh, bad U Trai Um shym la wan, kito kiba la trei mynshwa bad ki nongkit khubor U Trai, hynrei kim shym la aiti pura na ka dohnud ïa la ki jingim na ka bynta ka khubor, ki la phai ban ïaleh pyrshah ïa ka. Ki la sdang ban ïaleh pyrshah ïa ka kam, bad ban leh katba ki lah ban khanglad ïa kito kiba dang ïai hikai ïa ka jinghikai shaphang ka jingwan kaba jan U Trai bad ïa ka khubor jong ka por jingbishar. “Ha ki dohnud jong ki” ki la ong, “U Trai jong nga u pynslem ïa la ka jingwan.” Da ki rymmiang shyntur jong ki, ki la hikai mynta ba ka pyrthei baroh ka dei ban kylla kaba mut shuwa ba U Trai Un wan; ba ki Jiw baroh ki dei ban leit phai sha Palestine, bad ban seng ïa ka jinglehniam jong ki ha ka templ ha Jerusalem, shuwa ba U Messaïah Un wan. Katto katne ki la hikai wat ba ka jingwan U Khrist ka long ka “jingwan ba kynja mynsiem,” kaba jia ha ka jingkylla kaba mut, bad ruh ha ka jingïap jong ki briew jong U.

GSAM 151Ka Jingai ïa ka “Jingbam ha ka Por kaba Biang”

GSAM 151.1Katba kine ki la phai kumta pyrshah ïa ki para shakri jong ki, kito kiba dang bat skhem ïa ka jingngeit ki la khot ïa ki riewngeit ban ïalang ha ki ïingdorbar bad ha ki law dieng, da kaba ai ha ki ïa ka “jingbam ha ka por kaba biang”—da kaba pyni ha ki ba ki dak jong ki por bad ka jingïathuhlypa kaba la pyndep ki pynbna, kumjuh kum shuwa ka jingsngewsih jong ki, ba ka jingwan U Khrist ka long “hajan, wat ha ki jingkhang.”

GSAM 151Ka Jingkhawai ha ki Balang

GSAM 151.2Katba ki dang leh ïa kane, la sdang ïa kaei kaba ym pat ju tip mynshwa ha ki balang Protestant—ka jingkhot ïa ki briew ban ïalang ha ka balang ban ïakhawai bad ban “leh kai.” La khot sngewbha ïa baroh kiba mon ban wan, ba kin ïabam bad ki ïa ki jingbam ba thiang jong ki.

GSAM 151.3Ka sien kaba nyngkong ba ngi la ïohsngew ïa kaei kaei kaba kum kane ha America ka long ha u bnai Jymmang, 1844, tang hadien ka jingsngewsih. Ka la long kumne: Katba u William Miller, ha kawei ka ïingdorbar ha Rochester, N.Y., u dang hikai bad kyntu ïa katto katne spah ngut ki Adventist, da kaba ong ha ki, “Ngi don ha ka por jingap jong u Mathai arphew san; to bat skhem ïa la ka jingngeit; ngin sa ïoh shuh ka jingshai shaphang kane ka kam shen,” la pynbeit ïa “ka jingkhawai” ha ka mala kaba hapoh jong kawei na ki ïingmane kiba heh tam ha Rochester. Ki paitbah ki la ïalang, ki dkhot balang bad ki bym ngeit ruh, bad katba u khlieh jong kawei ka kolej pule niam u pynrkhie ïa ki paitbah da kaba rkhie beiñ ïa u William Miller, ki la die ha ki ïa ki doh shynrai duriaw, ka dud thah, ki jingbam thiang, bad ïa kawei ka kot lyngkot kaba une u briew u la pynkhreh, ha ka dor arphew san sent. Ka kyrteng jong kata ka kot ka long Ka Jingpynpaw ïa ka Jinghikai jong u Miller.

GSAM 151.4Shuwa ban kut ar taïew naduh kata ka por, kawei pat ka kynhun balang ha kajuh ka nongbah ka la pynbeit ïa “ka jingkhawai” ha ka ïingdorbar paidbah, da kaba shim arphew san sent kum ka bai rung, bad da kaba khot ïa baroh kiba mon ban wan bad ïabam bad ki ïa ki doh shynrai duriaw, ka dud thah, ki pu bad ki jingbam thiang jong ki. Ha kata ka por bad ha kata ka jaka la sdang ïa kane ka rukom khawai kaba thymmai ha ki balang, kaba la roi sha “ki jingïalang lehkai ba bieit,” “ki pla jingai nusib,” “ki pung tong jingai,” “ki jingïalang ïadoh,” bad kumta ter ter. Kane ka jingkhawai ha ki balang ka la nang roi haduh ba mynta ka ïing balang kaba thymmai kam ïahap bad ka rukom kaba la pdiang lada kam don la ka ïingshetja, ka kamra buh jingbam bad ka kamra bam. Kane ka long ka jinglong kaba la sdang ha ka “por jingap,” thik kumba la kdew ha ka pharshi.

GSAM 152.1U Wm. Miller hi u kren ïa ka jingjia ha Rochester da kine ki ktien harum:

GSAM 152.1“Uwei na ki D.D. ha Rochester, u Bah _____, jong ka balang _____, u la thoh ka kot lyngkot pyrshah ïa ka jinghikai jong u Miller, u la khot ïa la ki rangbah bad ki kynthei sha ka ïing U Trai, u la pynlong ka jingkhawai kaba khraw da ki doh shynrai duriaw bad kiwei ki ‘jingbam khawai shabar,’ kum u Belshassar, ki la dih ïa la ka kopi bad ka sha, ki la bam ïa la ki jingbam ba kordor, bad ki la die ïa la ka dud thah bad ki jingbam thiang, bad ïa ka kot lyngkot jong u pyrshah ïa ka jingwan arsien jong U Nongpynim baieit.

GSAM 152.2“Ha ka miet shuwa ba ngan mih, uwei pat na ki rangbah niam u la pynlong ka jingkhawai ha ka ïing paidbah, ne ka ïingdorbar, bad u la die kumba la ong haneng ïa ki tiket jong u, ka dud thah bad ki jingbam thiang. Nga la sngewkmen ban ïohsngew ba katto katne na ki balang jong ki kynhun niam bapher bapher kim shym la mynjur ïa kum kita ki jingkhawai Babilon; bad nga kyrmen na la ka mynsiem ba ym ïa baroh kine ki balang kynhun niam yn shem ba ki dang ‘bam bad dih bad kiba buaid’ haba U Khrist Un wan. Nga sngewlyngngoh ba kine ki rangbah niam kim ïohi ïalade ha ka ïit jong ka ktien U Blei; bad ngan ai jingmut ïa ki ban pule ïa u Loukas 14:12-14; Mathai 24:48-51; Loukas 13:25-28; 2 Petros 2:13; Judas 10-21. Shisha kine ki long ki por kiba khatduh.”

GSAM 152.3Lada u Tymmen Miller u la ïohi ïa kaei kaba ki balang ki la rung naduh kata ka por, ha ki jingïalang lum jingai jong ki, ryngkat bad “ki pu thew sati, ki jingïalang ïadoh ha ka dor shiphew sent, ki jingpyni kadda, ki jingïalang lehkai ba bieit, ki jingpynkhie nusib kyntang,” bad kiwei de ki jingpynbeit ïa ki jingïalehkai nusib, bad kumta ter ter, un da la kynran noh ha ka jingkyndit ba kyntang.

GSAM 152Ka Por Jingap

GSAM 152.4Ki Adventist ki la ïoh jingpyntngen ha ka jingshisha jong ka Jingthoh Bakhuid ba haba la pynbna ïa ka jingwan kaba jan U Trai, yn don ryngkat bad kata ka “por jingap.” Ki la ïohi ïa kane ha ki ktien U Nongpynim jong ngi ha u Mathai 25:5, 6, bad ha u Habakkuk 2:1-3.

GSAM 153.1Shaphang ka jinglong jong ki ha ka aiom pyrem jong u snem 1844, ngi sot na Ka Jingpyrta Shiteng Synñia jong u Jymmang 9, 1844:—

GSAM 153.2“Hadien ba ngi la lait na ka por kaba i kumba ka long ka jingkut jong ki por jingïathuhlypa, la buh ïa ngi ha ka jinglong kaba U Blei U la ïohi lypa ba ïa ki khun jong U yn buh ha kaba kut jong ka jingïohi-paw; bad na ka bynta kata U la pynkhreh da u nongïathuhlypa Habakkuk, haba u ong, ‘Ngan ïeng ha la ka jaka ap, bad ngan buh ïalade halor ka kut, bad ngan ap ban ïohi kaei ba Un ong ha nga, bad kaei ba ngan jubab haba la sneng ïa nga,’ lane kumba la thoh ha ka rud, ‘la ïatai bad nga.’ ‘Bad U Trai U la jubab ïa nga, bad U la ong, To thoh ïa ka jingïohi-paw, bad pynshai ïa ka ha ki lyngkniap, ba uta uba pule ïa ka un lah ban mareh. Namar ka jingïohi-paw ka dang na ka bynta ka por ba la buh, hynrei ha kaba kut [jong ki por jingïathuhlypa] kan kren bad kan ym lamler: wat la ka slem [palat ïa kaba i kum ka jingkut jong ki], to ap ïa ka; namar kan wan shisha, [ha ka jingdap jong ki por jingïathuhlypa, palat ïa kata] kan ym pynslem.’7

GSAM 153.3“Ba kane ka jingsneng ka thew ïa ka por ba mynta, ka paw shai na ka jingsot jong u Paul ïa ka ha ki Hebru 10:36-39: ‘Namar phi donkam ïa ka jingïaishah, ba hadien ba phi la leh ïa ka mon U Blei, phin ïoh ïa ka jingkular. Namar tang khyndiat por shuh, bad Uta Uban wan Un wan, bad Un ym pynslem. Te u bahok un im da ka jingngeit; hynrei lada uno uno u kynran noh, ka mynsiem jong nga kan ym sngewbha ha u. Hynrei ngi ym long na kito kiba kynran noh sha ka jingjot; hynrei na kito kiba ngeit sha ka jingpynim ïa ka mynsiem.’

GSAM 153.4“Ngi ngeit ba ngi don ha kata ka por ïa kaba U Nongpynim U la kren, haba u nongleitkurim u slem (Mathai 25:5)—ïa kaba dei ban pynsyriem ïa ka hima bneng,—haba ‘uta u shakri bymman [hadien ba ka la don ka jingbymurlong kaba paw ha ka por] un ong ha la ka dohnud, U Trai jong nga u pynslem ïa la ka jingwan, bad un sdang ban shoh ïa la ki para shakri, bad ban bam bad dih bad kiba buaid,’ bad U Trai Un ‘wan ha ka sngi kaba um khmih lynti ïa U.’

GSAM 154.1“Ngi ngeit ba mynta ngi don ha kata ka por ïa kaba u Petros u la kren, haba ka ‘jingbishar jong ki, kaba la buh naduh mynbarim, kam pynslem, bad ka jingpynjot jong ki kam ïohthiah;’ ha kaba kin ‘wanrah rieh ïa ki jinghikai bakla kiba pynjot.’8 U Petros u ong ba kine kin don, kumba la don ki nongïathuhlypa lamler haba la thoh ïa ki Jingthoh Bakhuid. Namar kata kumba ki jong ka ïing Israel ki la ong, ‘Ki sngi ki la nang jrong, bad kawei pa kawei ka jingïohi-paw ka pulom,’9 kumta ka dei ban la don ka por kaba i kumba ka por ba la buh ka la leit noh, khnang ba ki nongrkhie beiñ jong 2 Petros 3:4 kin lah ban kylli, ‘Hangno ka don ka jingkular jong ka jingwan jong U?’ bad ban pynhun ïalade ba ‘kiei kiei baroh ki ïai long kumba ki la long naduh kaba sdang jong ka jingpynlong.’

GSAM 154.2“Ngi ngeit ba da kaba khmih ïa kum kane ka jingslem jong ka jingïohi-paw, u apostol Jakob u la ong, ‘To long kiba ïaishah namar kata, ko para bangeit, haduh ka jingwan U Trai;’ ‘ma phi ruh to long kiba ïaishah; to pynskhem ïa ki dohnud jong phi: namar ka jingwan U Trai ka la jan.’ Bad, ‘Ha khmih, U Nongbishar U ïeng ha khmat ka jingkhang.’

GSAM 154.3“Bad ngi ngeit ba da kaba tip lypa ïa ka jingleit noh jong ka por ba la khmih lynti, U Nongpynim jong ngi U la sneng ïa ngi, ha ka lynnong kaba khat-ar jong u Loukas, ‘To panpoh ïa ki syngkai jong phi, bad to ai ba ki sharak jong phi kin meh; bad ma phi hi to long kum ki briew kiba ap ïa la U Trai, ynda Un wan phai na ka jingkhawai shongkurim; ba haba U wan bad tied jingkhang, kin plie ïa U kumne kumne.’10 Ka jingap ka mut ba ka por ka la leit noh, namar shuwa kata ka por ngim ap. Namar kata U Trai jong ngi U ong shuh shuh, ‘Suk kita ki shakri ïa kiba U Trai, haba U wan, Un shem ba ki dang sharai.’

GSAM 154.4“Ngin ïai pynbna, lada U Blei U mon, ‘Ha khmih, u nongleitkurim u wan; to leit noh ban ïashem ïa u;’ bad, ‘Ka por jong ka jingbishar jong U ka la wan.’ Bad ngi kyrmen ba ngin ym rem ban ïai pyrta jam sha ka pyrthei bad ka balang, ba kin kyndit na la ki jingrwai jong ka ‘jingsuk,’ bad ban sngap ïa ki jingkhot isynei U Blei. Ngi thmu ban ïai ap bad sharai ïa ka jingwan U Trai, da kaba ngeit ba ka la jan bha ïa ngi.”

GSAM 155Ka Jingïasaid na ka Bynta ka Kam jong ki

GSAM 155.1Lah ban sngewthuh bha kumno ki Adventist ki la peit ïa la ka kam shuwa u Lber 21, 1844, bad tang hadien kata ka tarik, da kaba pule ïa kane ka jingsot harum, kaba la shim na ka jingthoh hapoh ka kyrteng, “Ka Jingïasaid,” ha U Nongpynbna jong ka Jingwan Arsien jong u Naiwieng 13, 1844, ba la pynmih da u J. V. Himes, u S. Bliss, bad u A. Hale:—

GSAM 155.2“Ngim shym la kyrkieh ban pdiang ïa la ki jingmut. Ngi ngeit ba ngi la long ki nongwad ïa ka jingshisha kiba hok bad kiba shisha. Ngi la kohnguh ïa ka hukum U Nongpynim jong ngi ban wad bniah ïa ki Jingthoh Bakhuid. Ngim shym la shaniah ha la ka jingstad; hynrei ngi la khmih sha U Blei ban ïoh ka jingïalam bad ka jingbthah, bad ngi la pyrshang ban buh ïalade halor ka duwan jong U, da kaba shaniah ba Un ïalam beit ïa ki dienjat jong ngi. Ngi la bishar ïa ki jingïasaid baroh kiba la wanrah pyrshah ïa ngi da ka jingkwah shisha ban tip ïa ka jingshisha bad ban shah ïada na ka jingbakla; hynrei ngi dei ban phla ba ki jingmut bapher bapher bad kiba bun jait jong ki nongïaleh pyrshah ïa ngi ki la shu pynskhem ïa ngi ha la ki jingmut. Ngi la ïohi ba la ngi long kiba dei ne kiba bakla, ki nongïaleh pyrshah ïa ngi kim lah ban long kiba dei; bad kim shym la ïahap hapdeng jong ki hi. Ki jingïasaid jong uwei pa uwei ki la long kiba tlot bad kiba kum jong ki khynnah, haduh ba ki la hap ban ïai pynpra ïa kaei kaba ma ki hi ki la leh; bad da ki jingmut jong ki kiba ïapyrshah bad kiba ïatyngkhuh, ki la pyni ba katno katno ruh ki pyrkhat ïa ki jingmut jong ngi, kim don jingshaniah ha ki jingmut jong ki para jong ki. Bad shuh shuh, ym shym la don wat kawei ka mat kaba kongsan ha ka jingngeit jong ngi baroh ïa kaba ym shym la kyrshan da uwei ne kham bun na kito kiba la trei ban kyntait ïa ka jingwan kaba jan eh U Trai. Katba ngi don ka jingsngewthuh ïa ki Jingthoh Bakhuid katkum ki ktien jong ki ban kyrshan ïa ngi, ki nongïaleh pyrshah ïa ngi ki la pyrshang lehnohei ban pynshisha ba ym dei ban sngewthuh ïa ki Jingthoh Bakhuid katkum ki ktien jong ki, wat la kawei pa kawei ka jingïathuhlypa kaba la pyndep ka la urlong thik kumba la thoh, wat ha ki bynta kiba rit tam.

GSAM 156La Pynshai ïa ka Jingsngewsih

GSAM 156.1“Hynrei ka por—u snem 1843, u snem Jiw—ka la leit noh, bad ngi la sngewsih ba ngim shym la ïohi ïa U Syiem ha ka jingitynnad jong U. Bad baroh kiba la ïaleh pyrshah ïa ngi da ka jingmut ba hok ki la mut ba la pynshisha ba kawei pa kawei ka dak kaba kyrpang jong ka jingngeit jong ngi ka long kaba lamler; bad ba ngi dei, kum ki briew kiba hok, ban ieh noh ïa ka jingngeit jong ngi baroh. Namar kata ki la sngewlyngngoh ban ïohi ba ngi dang bat skhem ïa la ka jingkyrmen, bad ngi dang ap ïa la U Syiem.

GSAM 156.2“Hynrei ngi, ha ka jingsngewsih jong ngi, ngim shym la ïohi daw ban duh jingkyrmen. Ngi la ïohi ba ki Jingthoh Bakhuid ki kdew ba ka dei ban don ka por jingap, bad ba katba ka jingïohi-paw ka dang slem, ngi dei ban ap ïa ka. Ngi la ïohi ruh ba ryngkat bad kaba kut jong u snem, kata ka por kam lah ban kut pura, wat lada ngi shim ba ka jingkheiñ por jong ngi ka long kaba dei; bad ba kine ki por ki lah ban urlong tang ha kano kano ka por ha une u snem ba mynta. Wat la katta, ngi la pdiang khlem rieh bad pura ha khmat ka pyrthei ba ngi la bakla ïa kata ka por ba thikna ïa kaba ngi la khmih da ka jingshaniah kaba khraw; hynrei katba ngi la bakla kumta, ngi lah ban ïohi ïa ka kti U Blei ha kata ka kam. Ngi lah ban ïohi ba U la pyndonkam ïa kata ka jingpynbna kum ka jingpynkyndit ïa ka pyrthei, bad ka jingtynjuh ïa ka balang. Ka la buh ïa ki briew jong U ha ka jinglong kaba ap khmih lynti. Ka la khot mih ïa kito kiba la kloi ban shah shitom na ka bynta ka kyrteng jong U. Ka la pyni ha kiei ki briew ka jingpyrta jong ka jingwan U Trai ka long ka khubor jong ka jingkmen kaba khraw, bad ha kiei pat ka long ka sur kaba kim sngewbha ban ïohsngew. Ka la pyni ha ka jingpynlong baroh mano ban pdiang sngewbha ïa ka jingwan phai U Trai, bad mano ban kyntait ïa U ha ka jingwan arsien jong U, kumba ki Jiw ki la leh ha ka jingwan kaba nyngkong jong U. Bad ngi ñiew ïa ka kum kawei ka sienjam ha ka jingpyndep ïa ka jingthmu U Blei, ha kane ka ‘sngi jong ka jingpynkhreh jong U,’ ba Un ïalam mih ïa ki paid kiba wad tang ïa ka mon U Trai, khnang ba kin long kiba la pynkhreh ïa ka jingwan jong U.”

GSAM 157KA HISTORI JONG KA JINGÏAID LYNTI HADIEN U LBER, 1844

GSAM 157.1Ka histori lyngkot jong ka jingïaid lynti jong ka jingwan arsien hadien u Lber 21, 1844, ka paw ha kane harum, kaba la shim na Ki Dak jong ki Por jong u Risaw 31, 1844:—

GSAM 157.2“Hadien ba u 1843,—u snem Jiw,—u la leit noh, ka kynhun kaba bun jong ki Adventist ka la shongneh ha ka jingngeit ba naduh kata ka por ngim lah shuh ban kheiñ ïa ki por ba kyrpang da ka jingthikna. Ki la ngeit ba ngi don ha kata ka jaka ïa kaba ka jingkheiñ por jong ngi ka kdew, ha kaba kut jong ki por jingïathuhlypa baroh, ha kaba kut jong ki la khmih lynti ïa ka jingwan arsien; bad ba wat la ngi hap ban ap tang ïa ka por kaba lyngkot kaba ka jingkheiñ por jong ngi ka lah ban ïapher na ka por U Blei, hynrei ki la ngeit ba ngim lah shuh ban ïoh dak ban tip ïa ka por ba thikna. Ki baroh ki la shim ïa ki sharak jong ki bad ki la leit noh ban ïashem ïa u nongleitkurim; hynrei u nongleitkurim u la slem palat ïa ka por (1843) kaba la khmih lynti ïa u. Ha kane ka jingslem jong ka jingïohi-paw, ka la i kumba ki baroh ki la rai ban ap ïa ka, da kaba ngeit ba ym lah ban pynslem ïa ka, bad ba lah ban khmih lynti ïa ka ha kano kano ka khyllipmat. Hynrei tang shen ka la paw shai bha ba ki bun ki la pynkhreh ïa ki jingthmu na ka bynta ka lawei, ïa kiba kin ym pynkhreh lada ki ngeit ba U Trai Un wan ha une u snem; bad ba ki la ïohthiah ha kaba ïadei bad ka jingsngewthuh shisha ïa ka jingpaw kaba jan eh U Trai. Ha kawei pat ka rukom ong, ki la pyrkhat ba U lah ban wan ha kano kano ka sngi, lane ba lah ban pynslem khyndiat por, ha kaba ki lah ban ïoh ka jingjahthait kaba pynsngaid ïa ki. Te, kane ka la long kumba U Nongpynim jong ngi U la ong ba kan long, ‘Katba u nongleitkurim u dang slem, ki baroh ki la lyngngohthiah bad ki la ïohthiah.’

GSAM 157La Khot ban Khmih sha ka Aiom Synrai jong u 1844

GSAM 157.3“Naduh u Jymmang, 1843, u para Miller u la khot ïa ngi ban khmih sha u bnai uba hynniew jong u snem kyntang jong ki Jiw, kum ka por jong ka jingrakhe ïa kita ki dak pharshi kiba kdew sha ka jingwan arsien; bad ha ka aiom synrai kaba la dep ngi la khmih sha kata ka por da ka jingkwah kaba khraw. Hadien ba ka la leit noh, u para S. S. Snow u la pdiang pura ïa ka jingmut ba katkum kita ki dak pharshi, ka jingwan U Trai, haba ka jia, ka dei ban jia ha ka sngi kaba shiphew jong u bnai uba hynniew; hynrei um shym la thikna shaphang u snem. Hadien u la ïohi ba ki por jingïathuhlypa kim kut shisha tad haduh une u snem ba mynta, 1844; kumta u la ïeng skhem ha ka jingngeit ba kumba ha ka 22 tarik u Risaw—ka sngi kaba shiphew jong u bnai uba hynniew jong une u snem ba mynta—ngi dei ban ïohi ïa ka jingwan U Trai ka burom. Ïa kane u la ïalap ha New York, Philadelphia, bad kiwei pat ki jaka ha ka aiom pyrem bad ka aiom lyiur kaba la dep; bad wat la kiba bun ki la pdiang ïa ki jingmut jong u, hynrei ym shym la ïohi ïa kano kano ka dak kaba kyrpang jong ki jingmih jong ka tad haduh kumba u Naitung.

GSAM 158Ki Jingthung ba la Ieh ha ki Lyngkha

GSAM 158.1“Ha kaba sdang jong ka aiom, katto katne na ki para bangeit jong ngi ha ka phang shatei jong New Hampshire ki la shah ktah jur da ka jingngeit ba U Trai Un wan shuwa kawei pat ka aiom tlang, haduh ba kim shym la rep ïa la ki lyngkha. Kum ha ka shiteng jong u Naitung,—kaba long ka janmiet jong ka shiteng synñia jong ka sngi-snem Jiw (janmiet-step, da kaba kheiñ naduh u bnai thymmai jong u Ïaïong, kaba sdang jong une u snem Jiw), kiwei pat kiba la bet symbai bad thung ha la ki lyngkha ki la shah ktah jur da ka jingsngew ïa ka jingpaw kaba jan eh U Trai, haduh ba kim lah ban ot ïa ki jingthung jong ki bad ïai long kiba ïahap bad la ka jingngeit. Katto katne, haba ki la leit sha la ki lyngkha ban ot ïa ki phlang jong ki, ki la shem ba kim lah satia ban bteng, bad da kaba bud ïa la ka jingsngew ïa ka kamram, ki la ieh ïa la ki jingthung ba kin ïai ïeng ha lyngkha, ban pyni ïa la ka jingngeit da la ki kam, bad kumta ban pynrem ïa ka pyrthei. Kane ka la saphriang kloi lyngba ka phang shatei jong New England.

GSAM 158Ka Jingbishar kan Long Shuwa ka Jingwan Arsien

GSAM 158.2“Ha kajuh ka por, ki para bangeit jong ngi ha Maine ki la pdiang ïa ka jingmut ba ka jingbishar ka dei ban long shuwa ka jingwan arsien; ba ka long ha kajuh ka por bad ka jingot, bad kam long tang ha kaba kut ka pyrthei, hynrei ka shim ïa kawei ka por kaba long thik shuwa ka jingkut. Katkum kane ka jingmut, ki la pyrkhat ba ngi don ha ka jingbishar, ba dang ring ïa u lain pynïakhlad, bad ba dang shon shap ha ki shyllangmat jong ki shakri U Blei. Ka jingpyndep ïa kata kan long ka dak ïa ki saw ngut ki angel kiba bat ïa ki saw tylli ki lyer jong ka khyndew (Jingpynpaw 7:1), ba kin pyllait ïa ka jingbat jong ki.

GSAM 159Ka Jingkyndit Thiah ha ka Shiteng Synñia

GSAM 159.1“Kum ha ka shiteng jong u Naitung, ka jingkyrkhu U Blei ha kaba wallam pat ïa kiba la phai dien ka la sdang ban bud ïa ka jingpynbna ïa ka por. Bad kito kiba la pdiang ïa kawei ne kawei pat na ki jingmut ba la kdew ki la pyni ïa ka jingkylla kaba shai ha ka jinglong jong ki, bad ka jingkyndit na ka jingïohthiah kumne kumne, kumba la ïathuhlypa. ‘Ha ka shiteng synñia la don ka jingpyrta, Ha khmih, u nongleitkurim u wan; to leit noh ban ïashem ïa u. Te kita ki samla sotti baroh ki la khie bad pynbeit ïa la ki sharak.’ Naduh u Naitung kine ki jingïaid ki la don ha ki bynta bapher bapher jong New England, bad ki la long kiba ïapher na kawei sha kawei pat; hynrei ïa ki baroh la bud da ka jingkyrkhu U Blei ha kaba wallam pat ïa kiba bun kiba la jan lip ki sharak jong ki, bad ha ka jingpynkyntang ïa ki riewkhuid jong U. Ha ka jingïalang tambu ha Exeter, kine ki jingktah baroh ki la ïakynduh, ki la ïakhleh sha kawei ka jingïaid lynti kaba khraw, bad ki la saphriang kloi lyngba ki kynhun jong ka jingwan arsien baroh ha ka ri.”

Notes

  1. Mathai 25:1-5. ↩
  2. Markos 2:18-20. ↩
  3. Salm 119:105. ↩
  4. Jeremaïah 18:18. ↩
  5. Jingpynpaw 3:3. ↩
  6. Proberb 23:20, 21. ↩
  7. Habakkuk 2:1-3. ↩
  8. 2 Petros 2:1, 3. ↩
  9. Esekiel 12:22. ↩
  10. Loukas 12:35, 36. ↩

Note

Back