Ciugo cia Mbere
GSAM 3.1Nĩkũrĩ mabuku maingĩ ma bata marĩ moko-inĩ ma andũ, na gĩtũmi gĩakwa kĩa kwongera rĩngĩ harĩ mo nĩ atĩ marũrata-inĩ maya nĩndĩgweta maũndũ maingĩ ma Etereri a gũũka gwa Kristo, na makĩria ma Etereri a Gũũka gwa Kristo a Mũthenya wa Mũgwanja, matarĩ matwarĩirwo andũ na njĩra ĩno mbere ĩyo. Na rĩngĩ, aingĩ arĩa metĩkĩrire wĩra ũyũ mĩaka-inĩ ya thuutha, na matarĩ mone maũndũ marĩa magwetetwo, nĩmahooete mũno ũhoro wa maũndũ macio na marĩa maahũndũkĩire ũheanwo nĩ arĩa maambĩrĩirie wĩra mbere yao. Nĩ ũndũ ndamenyete Mũingĩ wa etereri a gũũka gwa Kristo mĩaka-inĩ ya 1843 na 1844, na ngĩkorwo kuuma mweri wa 1, mũthenya wa 2, 1849, nĩhunjagia ũrutani ũcio, mbere ndĩ Mwetereri wa gũũka gwa Kristo, na kuuma 1852 ndĩ Mwetereri wa Gũũka gwa Kristo wa Mũthenya wa Mũgwanja, nĩnjiguaga ngĩkena “kwaria maũndũ marĩa nyonete na ngĩigua.”
GSAM 3.2Nĩndaheana ũhoro wa Mũingĩ wa etereri a gũũka gwa Kristo, ũrĩa kuuma 1831 nginya 1844 watambire nginya harĩ o rũrĩrĩ rwa thĩ rwathiĩte na mbere mũtũũrĩre-inĩ waruo.
GSAM 3.3Kuuma 1845 nĩgũkorĩtwo na ikundi ingĩ cia Etereri a gũũka gwa Kristo iria cihunjĩtie, na o na rĩu nĩcihunjagia, atĩ gũũka gwa Kristo gũrĩ hakuhĩ. Handũ ha kũrũmĩrĩra ũhoro wa ikundi icio ciothe, itua rĩakwa rĩarĩ kwarĩria na ũraihu ũiganu ũhoro wa kwambĩrĩria na gũthiĩ na mbere kwa Etereri a Gũũka gwa Kristo a Mũthenya wa Mũgwanja, ngĩonanĩria makĩria maũndũ marĩa, nĩ ũndũ wa ũmenyereri wa Ngai, mateithĩtie gũkũra kuuma ũthĩni na kwambĩrĩria kũnini, magatuĩka andũ arĩa, o na gũtuĩka nĩ ta ngiri igana rĩmwe tu, amwe a amenangi ao nĩmoigire atĩ, “Nĩ ũndũ wa hinya na kĩyo kĩrĩa mahũthagĩra wĩra-inĩ, mũndũ angĩĩciria atĩ nĩ milioni igĩrĩ.”
GSAM 3.4O na arĩa mooĩ hanini tu ũhoro wa ndũgĩrĩri ya Etereri a Gũũka gwa Kristo a Mũthenya wa Mũgwanja nĩmooĩ atĩ kuuma 1845 Mũtumia E. G. White nĩakorĩtwo na gĩcunjĩ kĩnene mũingĩ-inĩ ũcio, ta mwaria na mwandĩki. Ningĩ nĩmooĩ atĩ wĩra wake ũkorĩtwo na maũndũ ma mwanya, kana iheo. Nĩndakoretwo na kĩheo kĩa gũkorwo ho na kuona ũndũ kĩheo gĩkĩ kĩrutaga wĩra ta maita mĩrongo ĩtano. Marũrata-inĩ maya nĩndoonanĩtie maũndũ ta mĩrongo ĩĩrĩ na matandatũ marĩa Mũtumia White aarathĩte ũhoro wamo na njĩra ĩmenyagĩrĩka, na makahinga o ũrĩa moigĩtwo.
GSAM 4.1O hamwe na maũndũ marĩa niĩ mwene nyonete, nĩndaheana o na ũira wa andũ angĩ arĩa moneire na maitho mao maũndũ marĩa maahũndũkĩire. Maũndũ ta macio maagĩrĩirwo nĩ gũkorwo na ũritũ mũnene harĩ mũthomi ũrĩ na mũtima mwĩhokeku gũkĩra ciugo cia o ũguo tu iria ciaragio nĩ andũ matarĩ makorwo harĩ maũndũ ta macio.
GSAM 4.2Nĩndĩneana wĩra ũyũ harĩ athomi, ndĩ na mwĩhoko atĩ, na kĩrathimo kĩa Ngai, gũthoma marũrata maya nĩgũgũteithia wĩra wa Kristo gũthiĩ na mbere mĩtima-inĩ ya andũ aingĩ, na ngĩĩhoka atĩ othe, rĩrĩa magũthoma, nĩmarĩririkanaga ciugo cia Paũlũ kũrĩ Athesalonike, “Geriai maũndũ mothe; nyiitai wega ũndũ ũrĩa mwega.”