Mejô yʼatataʼa
GSAM 3.1Bekalate be ne mfi abui be neya e mo me bôt, a ajô ma beta laté kalate mfe a be e di: e mefep mana été ma kañete mam abui mfaʼa bebuni ya nsoan Krist, a dañe dañe mfaʼa bebuni ya nsoan Krist ba baʼale môse zamgbwale, me nji ke nga liti bôt avale di melu mvus. A laté nalé, bôt abui be nga nyiine e ésaé e mimbu mi nga tôñ a be nji ke nga yen mam ba kañete be nga sili a ngule nlem ése na ba be nga taté ésaé be kañete be e mam a mintabane bite. Me mbe me yeme ndulu bôt ya nsoan Krist e 1843 a 1844; a ataté 2 ya ngone 1, 1849, me nga kañete ñyeʼelan ôte, atataʼa ane mbuni ya nsoan Krist, a ataté 1852 ane mbuni ya nsoan Krist a baʼale môse zamgbwale. Ajô te ma yene mvaé ya “kobô mam me nga yen a wôk.”
GSAM 3.2Me veeya nkañete mfaʼa ndulu bôt ya nsoan Krist, nyô a nga samane ataté 1831 a kui 1844 e meyoñ mese ya si nyô me nga ke ôsu e ñyeman a ngômôtô ényiñe bôt été.
GSAM 3.3Ataté 1845, bikôane bife ya bebuni ya nsoan Krist bi nga kañete, a bi ngenan bia kañete, na nsoan Krist ô ntooya bebé. Nlô nleme wom ô nji ke bo ya kañete bikôane bite bise, ve ya kañete a abui mejô atataʼa a nkean ôsu ya bebuni ya nsoan Krist ba baʼale môse zamgbwale. Ma dañe liti mame mete, amu mbaʼalane Zambe, me nga volô na ayoñe bôt e fôé, ataté ényiñe minjuk a mone atataʼa. Toʼo tañe jap é ne ve bebé 100 000, besiñ bape be nga jô na: “Nge môt a fombô ngu a ayong e ésaé jap été, a ne simes na be ne 2 000 000.”
GSAM 3.4Toʼo bôt ba yeme ve ayôme nkañete bebuni ya nsoan Krist ba baʼale môse zamgbwale ba yem na, ataté 1845, Nganti E. G. White a nga bili beta éfas e ndulu bôt été, ane nkobô a ntili bekalate. Ba yeme fe na, e ésaé jé été, me mbe mesimba nge mimvean mi ne ényenyam. Me nga bili ngule ya bo vôm a nga belane mveane nyô a yene je a mise mam bebé biyoñ 50. E mefep mana été, me litiya bebé minkulane mejô 26 mi ne ngumba ya Nganti White; mi nga tôéban avale zôsôô ése.
GSAM 4.1A laté mam me nga yen a mise mam, me veeya fe minkañete mi bôt befe be nga yen mam a mise map, e mfaʼa mam me nga kui be. E mam mete me yiane bili beta tañ e be nlañe kalate a jeñe bebela, a dañe mejô me ne teke ébamba ba be nji ke nga bo e bivôme bite ba jô.
GSAM 4.2Ma ve ésaé nyô e be belañe kalate. Me bili ndi nlem na, a ébotane Zambe, nlañane mefep mana ô ne bo zen ya volô ésaé Krist e minlem mi bôt abui. Me bili fe ndi na, éyoñ ba lañ, bese ba ye simes mejô Paul e be bôt ya Tésalonik na: “Fasaʼane mam mese; biʼane ngule jôm é ne mvaé.”