Adventist Pioneer
Library
aplib.orgLibrary
Table of Contents
22 / 31
22 / 31

Kabitele 19 — “Mia ye yeme be a bibuma biap”

John Norton Loughborough

GSAM 299.1“A nga ve bôt bafe na be bo minlôman; bafe na be bo bekulu mejô; bafe na be bo bekate Mbamba Foé; bafe na be bo bebaʼale mimbam a beyeʼele; asu ya bo na mimfufup bôt be bo ngômôtô, asu ésaé ya bo Nti ésaé, asu ya lôñe nyôle Krist; akekui bia bese bi kui e nlatane mbunane a nlatane ya yeme Mone Zambe, bi bo môt a maneya yaé, bi kui ôveke beta ntabane ya njalane Krist.”1

GSAM 299.2Eyoñe Nyii a nga telé mimveane mi Nsisime wé keké été, asu ya tôé ésaé Nti, “avale a nga nyeʼe,” akekui môs a ne ngômôtô a zu, a nji liʼi bôte bé na be veʼe nge jam e ne nlitane e so yôp nge e so mbia minsisim. Ve a ve metiñ mme bi ne yeme na, nsisim ô so e be Zambe nge momo. Nge e melu ma ma suʼulan, éyoñe Nti a nga yiane sôé Nsisime wé e be bôt bese, a bon befam a bon bebinga be kulu mejô, avale nkulu mejô Yoel a nga kate,2 Paul a jô na bôt be nji yiane biasé minkulane mejô, ve na be “fasane mam mese,” a “baʼalane jame da ne mvaé.”3

GSAM 299.3Ye bi ne fasan avale mam ete a zen éfe, nge saa na bi fombô me a metiñe ya Mintilane mi ne étyi mme ma volô bia yeme ésaé Nsisime Zambe? Sake jôm ése é dañe fek bôt be ne teke ngule ya yeme mam mese é so e be Zambe. Amu Kalate Zambe a jô na, e melu ma suʼulan, Satan a ye bo bitua bi mam asu ya duʼu si ése, na a sulane bôte ya mewosan ya beta môs ôte ya Zambe a ne Ngule Nyul.4 Ajô te, éyoñe bi tuka fombô jam e ne nlitane a metiñe ya Kalate Zambe, bi ne yeme nya mveane ya Nsisim. Bia yiane fasan a ayemé, avale bôte ya si ba fasan moné a ne minsos.

GSAM 300Yeme moné a ne minsos

GSAM 300.1E kalate Mbeʼe Foé ya Bekalate Moné ya Detroit ya ngone nyin, 1863, Tate Preston a nga ve metiñ metan asu ya yemelane moné a ne minsos. A nga jô na môt ase a ye tuka fasane kalate moné ase a nyoñ avale metiñ mete ma jô, a se fe yiane ko woñe ya na ba duʼu nye.

GSAM 300.2Teke zen é ne fasane mveane ya nkulane mejô a dañe na a fombô je a avale Mintilane mi ne étyi mia kate mimveane mite mi mbe mi yené melu yʼôsu, a fasane je a metiñ me ne valé. Mintilane mi ne étyi mia kôme bia asu mbamba bisaé bise (2 Timôté 3:16, 17). Mia kate bia a bebela avale mveane ya nkulane mejô ô nga yené, a avale bi ne selane nya ésaé Nsisime Zambe a bisaé Satan a mimveane mié mi ne minsos.

GSAM 300METIÑ ME YEMELANE BENYA MIMVEAN

GSAM 300.3E nkobô wé été, Nti a nga ve metiñ ma dañe ntye na zamgbwale, me ne ngule ya selane benya mam ma litane Nsisime Zambe a ésaé Satan.

GSAM 300Atiñ ôsu — Ñyeʼelan a ne asu ngume jam

GSAM 300.4Nkulu mejô Ezayi, éyoñ a kobô mam ma ye bo e melu ma suʼulan, a jô na: “Kaneʼe nkañete, feteʼe atiñ e zañe beyéʼé bam. A ma ye yange Nti, nyô a solé asu dé e be nda Yakob, a ma ye fombô nye.... A éyoñe ba ye jô mia na: Jeñane ba ba belan a minsisime bekôn, a bemvimviʼi ba yôñ a ba yiʼi; ye ayoñe bôt e nji yiane jeñe Zambe wop? Ye bevevee ba yiane sili miñwuan mam? E be atiñ a nkañete! Nge ba kobô te tôñe nkobô wu, é ne amu éfufup é se be be.”5

GSAM 301.1Mintilane mi ne étyi mi ma liti ayoñe bôt e ne e ésaé ya beta telé sitam e atiñe Zambe été; ayoñ e yange Nti, e bo ésaé jé. Ba fombô nye; nalé a ne na ba yange nsoane wé, a be bo nalé éyoñe minsisim mia jô na mi ne minsisime miñwuan mia loone bôt na be jeñe mie. Bôt bafe ba wôk niloone wop a jeñe miñwuan asu ya yeme mam. Ve Nti a loone bôte bé na be jeñe nye. Nalé a ne na nge ba jeñe nye, a ye ve be ñyeʼelan a ne asu ngume jam. Be se yiane jeñe miñwuan, émi mi se ngule ya kate be jam éziñ; amu “mi se fe a ngape ya nnôm éto e jôm ése ja boban jôp si;” a “miñwuan mi nji yeme jôm éziñ.”6

GSAM 301.2E mintilane mi ne yôp été, atiñ e ne nvean asu ya fasane mefoé mese: “Nge ba kobô te tôñe nkobô wu, é ne amu éfufup é se be be.” Mefoé mese ma so e be Nti ma ye tôñe nkobô wé a atiñe dé.

GSAM 301.3Nge ma belan a atiñ di asu mintilane mi Nganti White, ma jô na e mimbu 52 mi nga lôt, me nga tuka lañe minkañete mié, me fombô mie a atiñe Zambe a nkañete ya Kalate Zambe, a ma yene na mia wulu aval avet a teke jame ya selane mie. Miñyeʼelane mié mi nji so asu ya ve mfefé nlitan ô ye nyoñe vôme ya Mintilane mi ne étyi. Ve mia liti bia vôm a avale bôt be ne dutuban e melu ma, a be dutuban ôyap a nkobô Zambe. Vôme minkañete mi Nganti White mia bili ô ne tuʼa litibane a mam émien a nga tili asu dap na:—

GSAM 301.4“Nkobô Zambe ô ne ngule ya ve éfufup nge e ôsimesan ô ne ntoo abui dibi, a ba ba bili nkômbane ya wôk wô be ne wôk wô. Ve akôsa bo nalé, bôt bafe ba jô na ba yéʼé nkobô Zambe ba yené be nyiñ avale da telane miñyeʼelane mié mi ne éngengeñ. Ane, asu ya na befam a bebinga be bo te bi ajô ya ve, Zambe a ve minkañete mi ne éngengeñ a mia kate mam zôsôô, mia bulane be e nkobô be nga jôʼé tôñe.

GSAM 302.1“Nkobô Zambe ô bili abui metiñ asu ya kôme mbamba ntabane ya ényiñ. Minkañete mi ne asu bôt bese a mi ne asu ngume bôt mi nga veban asu ya bo na be tuka fombô metiñ mete.... Mia nji yeme Mintilane mi ne étyi mvaé. Nge mi nga bo nkobô Zambe jôme mia yéʼé, a nkômbane ya kui e ôveke Kalate Zambe a bo benya Bekristen, mi nga ye bo te bi nkômbane minkañete....

GSAM 302.2“Nti a kômbô ve mia ayemé, lebe mia a ve mia afek a zen ya minkañete a nga ve, a fulane minleme mienan a ayemé ya na bebela ya nkobô wé é ne anen. Minkañete mi ne ntilan mi nji so asu ya ve mfefé éfufup, ve asu ya futi e minlem été benya mejô Zambe a nga maneya liti.... Benya mejô mefe me nji fezu, ve a zen ya minkañete, Zambe a nga bo na beta benya mejô a nga maneya ve me bo te ndeñ yeme. A nga liti me bôt e zen émien a nga top, asu ya veʼele a neñese ôsimesane wop a mam mete, a bese be bo teke ajô ya ve....

GSAM 302.3“Minkañete mi nji so asu ya suʼulane nkobô Zambe si, ve asu ya bete wô yôp, a ve minlem nkômbane ya wô, na abekap ya bebela a ne te ndeñ yeme e fulane bese.... Nge bôt ba jô éyoñe ji na be ne éwôla akume Zambe be nga ye bo mam a sili be, avale me ne nkateban e nkobô wé été, minkañete mi ne asu ngume mam mi nga ye bo te veban asu ya veʼele be e ésaé be yiane bo, a liti be minsêm miap a beta angôndô ya jôʼé ve nkobô Zambe mewôk.”7

GSAM 302Atiñ baa — Benya bekulu mejô

GSAM 302.4Bi nga maneya yéʼé na benya bekulu mejô bese ba ye kobô avale da tôñe atiñe Zambe a nkañete ya nkobô wé. Nlômane Yôan a ve atiñ efe da liti ñyeʼelane ya benya bekulu mejô. A jô na: “A bôt ma nyeʼe, te buniane nsisim ase, ve fasane minsisim nge mia so e be Zambe, amu abui bekulu mejô be ne minsos be nga kôlô a ke e si. Avale di nde mia yeme Nsisim ô so e be Zambe: nsisim ase wo kañe na Yésus Krist a zuya a nsône môt ô so e be Zambe; a nsisim ase ô nji kañe na Yésus Krist a zuya a nsône môt ô nji so e be Zambe. Wu ñwô nsisim ya nsiñe Krist, nyô mi nga wôk na a ye zu; a éyoñe ji a maneya bo e si.”8

GSAM 303.1Tukaʼa fombô mintilane mi ne yôp. Mia nji jô na môt ase a kañese na Yésus Krist “a nga zu a nsône môt,” ve na “a zuya a nsône môt”; nalé a ne na, a so a zen ya Nsisime wé, a tabe biabebien été, éyoñe bia buni nye. Jam di e ne foʼo beta bebela ya Mbamba Foé, “Krist mia été, ndi ya duma.”9

GSAM 303.2Jam da yené e mintilane mise mi Nganti White, asu ényiñe wongan, e ne na bia yiane bi Krist ane Nyii a too bia été nge bia kômbô ke ôsu e zene ya yôp. Mintilane mié mia yeʼele na bia yiane Krist e atataʼa, e memane a biyoñe bise. Asu ya liti jam di, bi ne fombô kalate jé, Mevaʼa ma kee e be Krist. Bekalate be dañe 100000 be nga kuaban a nkobô Engilis, teke kane betoyini be bekalate ba ne e minkobô 18 mi mesi mefe, émi ba kule je éyoñe ji. Mbo ésaé Zambe ya keké Presbitérieñ a nga lañe kalate a yeñe bekalate be dañe 300 asu bôte ya keké jé a bemvôé bé. A nga jô na, “Kalate nyô a nga tilibane e be môt a tuʼa yeme Nti Yésus Krist.”

GSAM 303Atiñ lale — Bekulu mejô be ne minsos

GSAM 303.3Yôan a ve atiñ asu ya yemelane bekulu mejô be ne minsos: “Be ne bôte ya si; ajô te ba kobô mame ya si, a bôte ya si ba vôʼôlô be.”10 Ñyeʼelane bekulu mejô be ne minsos wo ye bo na nlem ô tôñe minsôn ô vak, ô nji bete zene ya bene émien a beʼe élé yôp. Bekulu mejô be ne minsos ba ye yeʼele “mam ma ne mvom,” teke bete “Nyô a ne Étyi ya Israél.”11 Môt ase a lañ nge ve ngume mefep ya mintilane mi Nganti White a ne yene na mia yeʼele ya bene émien a beʼe élé, a mi se avale ya bo na nlem wo tôñe mame ya si a minsôn ô vak.

GSAM 304Atiñ nyin — Njuk a mbane nlem

GSAM 304.1Eyoñe bia beta fasane ajô di, bi ye nyoñ mejô me nlômane Yakob ane atiñ nyin: “A bobejañe bam, nyoñane bekulu mejô be nga kobô a jôé Nti ane évuʼan asu njuk a mbane nlem.”12 Eyoñe bia lañ ényiñe bekulu mejô ya melu yʼôsu bete, bia yéʼé na, atiñan e mbe jia ya beta minjuk miap, na be yen Israél a bene nge a bo mbia éfase ya minkañete mi ne éngengeñ mi nga veban e be be. Nge bia yéʼé ve tyôtyoé mam ya melu mete, bi ye avôl avôl yene ntabane ya benya bekulu mejô a ya ba be ne minsos. “Nti ya minsamba mewosan a jô na: Te vôʼôlane mejô me bekulu mejô ba kulu mejô be mia. Ba bo na mi bo bivôlevôla; ba kate ñyenan ô so minleme miap été, ve sake anyu Nti.”13

GSAM 304.2Teke jôm é ne e mintilane mi Nganti White été é ne bo na nlañe be a bo ôvôlô. Ve, avale môt mfe a nga jô, “Me nga nyoñe abui mvaé ya nsisim a zen ya minkañete, éyoñ é ne teke alaé. Foʼo, me nji lañe mie éyoñ éziñ teke wôk na mia lebe ma amu ôzan mbunane e be Zambe, ôzane ya ve nye nleme wom, a ôzane ya bo a nlem ôse ésaé ya nyii minsisim.” Ajô te, ebuma ya minkañete mi Nganti White e selane foʼo abui a ji ya miñyeʼelane bekulu mejô be ne minsos, avale Yeremia a kate.

GSAM 304.3Nkulu mejô a kate fe bia avale bekulu mejô be ne minsos ba ye yeʼele: “Ba ke ôsu ya jô ba ba biasé ma na: Nti a jôya na, Mia ye bi mvoʼé; a ba jô môt ase a wulu a ôsimesane ya nleme wé émiene na: Abé e nji ye so be mia.”14

GSAM 304.4Mfaʼa ya aval ñyeʼelan Nganti White a ve e minkañete mié, ma ye nyoñe mejô ma ma tôñ, me môt a tuka lañ:

GSAM 304.4“Me nga lañe minkañete mié mise a kee ôsu a kui memane, abui ya été abui biyoñ, a me nji tame bi ngule ya yene nge ajô davet e ne mbia ntabane e minkañete mise mite été, nge jôm é nji bo teke mvin a ya avale ya Krist; teke jôm é ne kee môt ôyap a Kalate Zambe nge a Krist. Ve valé ma yene abendé da dañe a nlem ôse asu ya ve Zambe mewôk, nyeʼe Yésus, buni Mintilane mi ne étyi, a fasane mie biyoñe bise. Vʼa zen ya Nsisime Zambe nya ntabane bébé a Zambe avale di, nya mvean nlem avale di a benya meloon avale di asu ya nyiñ ényiñ é ne étyi bi ne so.”

GSAM 305.1Môt a tuka fombô minkañete mié a so atataʼa a tili na:

GSAM 305.1“Mfaʼa ya bo mam éngengeñ a bebela, teke woñ nge nsémane bôt, ma kômbô ve nkañete na ôzane ô nji bo. Nge mbia minkômban a mbia minlem mi mbe ngul é wo wulu ésaé ji, mejô ma seʼese bôt me nga ye nyoñe vôme minkañete mia fasane minlem a benya melep. Nkobô ô ne éngengeñ, benya melep amu mbia be mam, mejô ma litʼévôvôm a me ma ve ngu e be minsisim mia tyibelane a mia yeme nkômbane Nyii mi bili, a e be ba ba vutane a ba jeñ a nsuʼulan si zen ya vaa bivus biap,—mam ma mme me nga nyoñe beta ngabe e bisaé bié été. Nkañete Nganti White, ô lebe mbia be mam e be abui bôt a nga yene e ñyenan été, ô nga veban a beta bebela, a bi mbamba bibuma bia dañe.”15

GSAM 305Atiñ tan — Benya minkulane mejô mia tôéban

GSAM 305.2Ajô Môze a nga jô asu benya bekulu mejô a ba be ne minsos e ne e kabitele 18 ya Deuteronome. A jô na: “Bia ye yeme nkobô Nti a nji kobô aya? Eyoñe nkulu mejô a kobô a jôé Nti, nge jam e nji tôñ nge e nji tôéban, jam ete e ne nkobô Nti a nji kobô; ve nkulu mejô a kobôya de a na a too feʼé, wo ye bo te ko nye woñ.”16

GSAM 305.3Jam davet e ne fe e mintilane mi ne étyi mi ma tôñ: “Za a jô jam a da tôéban, éyoñe Nti a nji ve atiñ?”17 Asu nkulu mejô Samuel, be nga jô na, “Mam mese a jô ma tôéban bebela.”18 “Eyoñe nkobô nkulu mejô ô ye tôéban, wôna ba ye yeme na Nti nye a nga foʼo lôme nkulu mejô ate.”19

GSAM 306.1Eyoñe ji, mimbu mi dañe 53 mi lôteya a so éyoñe ntili kalate nyô a nga yene Nganti E. G. White e ñyenan ya nkulane mejô éyoñe ôsu. E mimbu mite été, a nga ve abui minkulane mejô asu mam ma ye boban. Minkulane mejô mife mia kobô mame me maneya tôéban, mife mi ngenan mia tôéban, a mife mi ngenan asu melu ma zu. Mfaʼa ya mi mia kobô mam me maneya boban nge ma ma boban éyoñe ji, me nji yeme nge jam davet e nji tôéban. Bi nga maneya tote ngume minkulane mejô mié. Mife mia ye yené e bikabitele bia tôñ, éyoñe bia kee nkañete wongan ôsu.

GSAM 306Atiñ samane — Bitua bi mam bi se atiñ ya yemelane nya nkulu mejô

GSAM 306.2Abui betili bekalate ya mame Zambe be nga jô a ngul, a betili miñyeʼelane ya Mintilane mi ne étyi be nga tili na, ndeme nya nkulu mejô é ne mboane bitua bi mam. Bi nji tame yene atiñ avale te e Mintilane mi ne étyi été.

GSAM 306.3Nge mboane bitua bi mam ô ne ndeme nya nkulu mejô, wôna “nkulu mejô a ne minsos” a ne nkateban e Nlitan 19:20 a nga ye vebane jôé na nya nkulu mejô. Amu ba jô na, “Be nga bi tit, a ba be nkulu mejô a ne minsos a nga bo bitua bi mam ôsu dé, a zen ya bie a nga duʼu ba ba nga nyoñe ndem tit.” Ngul éte é ne fe nkateban e Nlitan 13:14, ane nyô a duʼu “bôt ba too e si a zen ya bitua bi mam a mbe a ngule ya bo e mise me tit.” Nge bia belan a atiñ di avale davet, bi nga ye yiane jô na nge Satan a ne nya nkulu mejô. Ngume minsisim mia ye bo ngume ésaé e éyoñe ébi samane ya bibé zamgbwale bia suʼulan, mia loonebane na “minsisime beédevila mia bo bitua bi mam, mia kôlô a ke e be bejô bôte ya si a ya si ése, na mi sulane be e mewosan ya beta môs ôte ya Zambe a ne Ngule Nyul.”20

GSAM 306.4Nge ndeme nya nkulu mejô ja yiane yené e bitua bi mam a bo éyoñ a se e ñyenan été, bi nga ye yene ve tyôtyoé bekulu mejô ya Kalate Zambe ba ne ngule ya tebe e mfasan ôte, dañedañe nge ntyiʼan ô yiane bo a mam me ne ntilane asu bisaé biap. E ne bebela na bitua bi mam bi ne ntilane ane bisaé ngume bekulu mejô be nga bo, aval ane Elie, Elizé a Paul. Ve za a yeneya e Kalate Zambe nkañete ya bitua bi mam bi Ezayi, Yeremia, Daniel, Ozé, Yoel, Amôs a bevoʼo? Ve bôt bete be mbe benya bekulu mejô be Nti, a metiñ Nti a nga ve asu ya yemelane nya nkulu mejô ma liti na be mbe nalé.

GSAM 307.1Bi ne tuka yene na mboane bitua bi mam ô se atiñ ya yemelane nya nkulu mejô nge bia lañe nkañete ya Yôan Ndoʼo Mendim e Mintilane mi ne étyi été. Nkulan ajô ésaa wé Zakari a nga ve, éyoñ a nga kate ñyenan Zambe a nga ve nye asu mon a nga yiane bialébane e be nye, wo liti na a mbe nkulu mejô: “A wo, mon, ba ye loone wo nkulu mejô ya Nyô a ne Yôp Yôp; amu wo ye ke ôsu Nti asu ya kôme mezene mé.”21 Nyii wongan émien a nga kañese na Yôan a mbe nkulu mejô ate a nga yiane kôme zen ôsu dé. Amu a nga jô asu Yôan na: “Ve mi nga kôlô a ke yene jé? Nkulu mejô? Owé, ma jô mia na, a môt a dañe nkulu mejô abui. Nyina ñwô be nga tili asu dé na: Fombôʼô, ma lôme nkalane wom ôsu asu dôé, a ye kôme zene jôé ôsu dôé. Amu ma jô mia na, e zañe bôt bebinga be nga biaé, teke nkulu mejô a dañe Yôan Ndoʼo Mendim anen?”22

GSAM 307.2Ajô te, va bi bili ajô e ne éngengeñ Nyii a jô na Yôan a mbe nkulu mejô. Bi belaneʼe a mfasan ya mboane bitua bi mam a fombô ebuma. E Mbamba Foé Yôan nkate Mbamba Foé a nga tili, bi bili mejô ma: “A abui bôt be nga ke be nye [Krist] a jô na: Yôan a nji bo étua jam éziñ; ve mam mese Yôan a nga jô asu môt nyina me mbe bebela.”23 Ajô di étam e man bôé nkobô wo jô na ndeme nya nkulu mejô é ne mboane bitua bi mam.

GSAM 307.3Atiñ di e ne nveane e Deuteronome 13:1-3, nde bia loone atiñ samane e alaé dangan di, e ne asu ya baʼale bia na bi bo te mate mvus jôm ése ja kam nge jôm ya étua jam akekui bi taté tuka fombô nge é kee bôt bebê a Nti nge é kee be ôyap a nye. Efuse mintilan ényô é jô bia na bi belan a metiñ mese, dañedañe na bi fombô nge jam e ne a nlatane ba be Zambe a atiñe dé.

GSAM 308.1Atiñ samane di da yeʼele na, nge môt a ve émien jôé a bo étua jam, éyoñe ba tuka fasan, ba ye yene a jam ete mveñesan ô so e benya mejô me ne étyi ya nkobô Zambe a nsuʼulane ya ôvek si, asu ya kañese nlem wo kômbô mane ya zene ya bene émien. Nti a liʼi na avale môte te a kôlô, a zene jé é ne mfasan asu nya mone Zambe, na a bi zen ya tuka fase nkômban nge ôsimesane ya mbo bitua bi mam ate. Ba ba kane nkobô Zambe, éyoñe mba minsos mbo bitua bi mam a nji bi be minlem, ba kôlô e mam mete été a ngu e be Zambe.

GSAM 308.2E mbia melu ma, éyoñe abui bôt ba jô na be ne “bebo biañ ba belan a mbunan,” “bebo biañ ba belan a ngule Zambe,” “bebo biañ ya Christian Science,” a bevoʼo, e nga ye bo mvaé na bi tuka belan a metiñe ya Mintilane mi ne étyi. Amu bi ye yiane metiñe Zambe a éfufup ya Mfufup Nsisim asu ya tuka yemelane ôsimesan a nkômbane ya ngume “bebo biañ” bete, amu ésaé jap é ne mbamba nseme mefek. E mfaʼa mfe, bôt bafe ba biasé a mise me bôt atiñe Zambe a bebela jé ya éyoñe ji. Biyoñ bife, ba ba jô na be ne “bebo biañ” bete be nga furane ayaa ane miñgeñgé mi bôt, éyoñe ba wôk ve ntote ajô ya atiñe Zambe. Avale e ne bebela na Nti a bili foé ja kate atiñe dé e ne étyi, avale te fe e ne bebela na bôt ba yoʼé atiñe dé a titan ba ba tote nge ve jôé dé be se a metiñetane ya Mfufup Nsisim.

GSAM 308Atiñ zamgbwale — Bibuma biap

GSAM 308.3“Baʼalaʼane miabebien ôsu bekulu mejô be ne minsos, mbe ba zu be mia be jaé mengômesane mintômba, ve minleme miap été be ne beze ba kômbô di. Mia ye yeme be a bibuma biap. Ye bôt ba kôé bibuma bi ndiʼi woon e biyo, nge bibuma figié e biloʼo bi bili éyo? Avale te, mbamba élé ase a beʼe mbamba bibuma; ve élé a ne mbia a beʼe mbia bibuma. Elé a ne mvaé a se ngule ya wume mbia bibuma, a élé a ne mbia a se ngule ya wume mbamba bibuma. Elé ase a nji wume bibuma bi ne mvaé a tyiʼiban a a wuabane nduan été. Ajô te, mia ye yeme be a bibuma biap.”24

GSAM 309.1Mejô ma me Nyii wongan ma kañese na mveane ya nkulane mejô ô nga ye bo e éyoñe ya Mbamba Foé. Nge teke benya bekulu mejô be nga yiane lat a ésaé, a nge avale nlitan ase ya nkulane mejô a nga yiane so e mbia vôm, ye a nga ye bo te jô na, “Baʼalaʼane miabebien ôsu bekulu mejô”? Jam a kate bia éngengeñ avale bi ne yeme aval ase e ne ndem ja dañe ya na e ésaé ya Nvolô, e Mfufup Nsisim, asu ya liti “mam ma zu” (Yôan 16:13), nya mveane ya nkulane mejô ô nga ye bo. Atiñ di, nde bia loone atiñ zamgbwale e alaé dangan été, e se ngule ya vuus. Krist a nji jô na mi ne yeme be a bibuma biap; ve a nga jô a ngul na, “mia ye yeme be a bibuma biap.”

GSAM 309.2Bia sili na, jʼavale ebuma ja yiane yené e ésaé ya benya mimveane mi Nsisime Zambe? Eyalan é ne e mejô Paul a nga jô asu nkômbane Nti a nga bili, éyoñ a nga telé mimveane keké été: “Ajô te a jô na, Eyoñ a nga bet e vôm ô ne yôp, a nga kee ba be mbe minkôme, a ve bôt mimvean.... A nga ve bôt bafe na be bo minlôman; bafe na be bo bekulu mejô; bafe na be bo bekate Mbamba Foé; bafe na be bo bebaʼale mimbam a beyeʼele; asu ya bo na mimfufup bôt be bo ngômôtô, asu ésaé ya bo Nti ésaé, asu ya lôñe nyôle Krist; akekui bia bese bi kui e nlatan [“nyiine nlatan été,” e mbôse kalate] ya mbunan, a ya ñyemane Mone Zambe, bi bo môt a maneya yaé, bi kui ôveke beta ntabane ya njalane Krist.”25

GSAM 309.3Belaʼane a atiñ di asu mveane ya nkulane mejô ô nga lat a foé éngele lale a so atataʼa dé, a ebuma é ne avé?—Bia yene na miñyeʼelan mi nga vebane e be Nganti White biyoñe bise mi nga bo e zene ya nlatan a mvoʼé, mi lebe na bôt be “luke mefek nsamba,” a “be kôane nsamba,” na be bo jôme jia a Krist, avale te mi telé bebela ékôan a nlatan e zañe jap.

GSAM 310.1Bôt bafe ba bene ésaé ji be nga jô a nsekan na, “Nge miñyenan mi Nganti White mi ne e zañe jenan mi nga bo te bo, ésaé jenan é nga ye maneya nyam abui melu mvus.” Eyalan é ne na, “E ne bebela; amu a zen ôte Nti a nga ve mefek, ayemé a éfufup, ane mintép mi nga vaaban, a ésaé é nga ke mvaé ôsu.” Ajô te, jam be nga kômbô belan a de asu ya bôé mvean, e ne foʼo nkañete na ebuma jé é ne ji ya nya mveane ya nkulane mejô.

GSAM 310.2E mimbu 60 a dañe, mam me nga litane mveane ya nkulane mejô a zen ya Nganti White me nga fasabane a metiñ zamgbwale ma. A e jam ese, me nga tôé mam ma yiane nya nkulan ajô.

Notes

  1. Efeze 4:11-13. ↩
  2. Yoel 2:28, 29, ↩
  3. 1 Tésalonik 5:20, 21. ↩
  4. Nlitan 16:14. ↩
  5. Ezayi 8:16-20. ↩
  6. Ecclésiaste 9:6, 5. ↩
  7. Minkañete asu keké, ngabe 5, mefep 663-667. ↩
  8. 1 Yôan 4:1-3. ↩
  9. Efeze 3:17; Kôlôs 1:27. ↩
  10. 1 Yôan 4:5. ↩
  11. Ezayi 30:10, 11. ↩
  12. Yakob 5:10. ↩
  13. Yeremia 23:16. ↩
  14. Efus 17. ↩
  15. J. N. Andrews, e Nfomban a Mbeʼe Foé ya ngone awôm a baa, 1867. ↩
  16. Deuteronome 18:21, 22. ↩
  17. Minyôn 3:37. ↩
  18. 1 Samuel 9:6. ↩
  19. Yeremia 28:9. ↩
  20. Nlitan 16:14. ↩
  21. Lukas 1:76. ↩
  22. Lukas 7:26-28. ↩
  23. Yôan 10:41. ↩
  24. Metias 7:15-20. ↩
  25. Efeze 4:8-13. ↩

Note

Back