Kabitele 28 — Mbé teke môt a ne dip
GSAM 462.1“Me nga telé mbé ô ne nyoan asu dôé, a môt a ne te dip wô; amu ô bili bone ngu, ô nga baʼale ajô dam, a ô nji bene jôé dam.”1
GSAM 462.2Mejô mete mme a nga kobô bôte be ne e ntabane ya Filadélfi e keké ya Mbamba Foé. Keké te a nga vem a zene ya nkate foé na nsoan Krist ô ne bebé, nge na, a bôte be nga tukaʼa bi jam be nga wôʼô mfaʼa ya ajô te; amu a jô ajô keké ya Sardés (nyô a nga bo ôsu Filadélfi teke keké mfe zañe jap) na: “Ajô te, simesaʼane aval ô nga nyoñ a wôk, tukaʼa bi de, a kôñelane nlem. Nge wo bo te baʼale, ma ye so e be wo ane ñwuwup, a wo ye bo te yeme awolo ma ye so e be wo.”2
GSAM 462.3Ajô te, keké ya Sardés a nga wôʼô ñyeʼelane ya nsoan Nti ô ne bebé. Bôte be nga tukaʼa bi jam be nga wôʼô be nga ke ôsu e bebela éyoñ be nga tyendé “ételé lambe,” a be nga bo keké ya Filadélfi, nyô a nga jô nye na: “Amu ô nga baʼale ajô dam a mban ôse, ma fe ma ye baʼale wo na ô bo te nyiine awolo ya meveʼele, da ye so si ése na da veʼele bôt bese be too si. Tame yen, ma so avôl; tukaʼa bi jôm ô bili, na môt a bo te nyoñe wo ékate njôé jôé.”3 Nde, a jô keké ya Filadélfi te na: “Me nga telé mbé ô ne nyoan asu dôé, a môt a ne te dip wô.”
GSAM 462.4Nde nyi ô ne nkañete ô ne ngu ya Mfufube Ntilan: bôte Zambe a wulu na be ke kate si na Nti a so, a yeʼelane bôt na be kômesane tôbane Zambe, ba bili beta mvam Zambe e ésaé jap. Bôt be ne veʼele kange be, bo na ndulu jap é bo zezé, a dip “mbé ya nkobô”; ve tyiñe Zambe ja ke ôsu a wôʼôtan a dañe beta minyôn mese na: “Me nga telé mbé ô ne nyoan asu dôé.”
GSAM 463Nkean ôsu ya mimbu 74
GSAM 463.1E mefep kalate nyô me nga lôt, bi nga fombô a bone mejô éyoñe ya mimbu 74, a taté 1831 a kui 1905, bi tôleʼe atataʼa a nkean ôsu ya mefoé ya nsoan Krist, a dañe fe foé éngele lale. Bi nga liti avale foé nyô a nga kôlô e nsôlane a azoé, a ke ôsu a ngu a beta ngu mbu ôse, akekui a bili bisaé minlôman mia ziñi si ése. A nji foʼo ke ôsu aval ete amu foé a ve minleme ya minsôn mevak; amu a tele Sabat Nti ôsu wé, a mbaʼalane wô wo so a beta éliʼiti, wo sili na môt a kandane be ésaé a si môse ya sondô bôt ba dañe bo bisaé ya si. A nji fe ke ôsu amu ntyañan ô nji bo; amu a nga tôbane wô a taté atataʼa, beta ntyañane ya bôte ya atan, a minjuk be nga so bôte be nji ve Zambe bebien, ba be nga nyiine nsamba éyoñe éziñ. Mfaʼa ya ntabane ô nga so mintaʼan a bisaé be ba bia bia ya atan be nga bo, bi ne foʼo kobô ane David, ntili Besôm, na: “Nge Nti a nji be a bia, Israél a jôʼô de nté wu; nge Nti a nji be a bia éyoñ bôt be nga kôlô na be wosan a bia, be nga ye mine bia bi ngenan bi vee, éyoñ ayaa dap é nga bet e be bia. Nde mendim me nga ye buti bia, ôsôé ô nga ye dañe minsisime miangan; nde mendim ma ne ngu me nga ye dañe minsisime miangan. Nti a boʼo mboban, nyô a nji ve bia ane tite meyane map. Nsisim wongan ô yitibaneya ane ônon a yitiban e ôlañé ya minkaa: ôlañé ô ne ntéʼan, a bi yitibaneya. Mvolane wongan ô ne e jôé Nti, nyô a nga té yôp a si.”4
GSAM 464Mvolan e be Nti
GSAM 464.1Nti a jô na a teléya asu bôte bé “mbé ô ne nyoan, a môt a ne te dip wô.” Ajô te, e nji bo jam ya kam na foé a nga ke ôsu teke tebe. A ne foé Zambe a ve bôt, a a yiane bi bibuma. E Nlitan 7:2, éngele a “bet a soʼo mfaʼa yat” a liti ésaé ya kômesane bôt na be telé éyoñ beta môse ya ayaa Zambe a ye so; nge, avale bôt béziñ ba kôñelan, “ane nlodane ya jôp.” Tame yen avale môs wa taté: atataʼa, nseñane ya éfufup ô yené mfaʼa yat; minseñan mite mia lat a ve éfufup a bet akekui tañ jôp ése ja yené mvoʼé. Nté “Njôô Môs” a bet a keleʼe e zañe yôp, éfufup jé, ayôñ dé, a ngu jé bia dañe bet.
GSAM 464.2Aval ete nde foé éngele lale a nga ke ôsu a taté 1848, éyoñ benya mejôô bé be nga teléban a vôm bôt be ne yene be mvoʼé, a a taté éyoñe te bi nga liti mvéman ô ne ntyelé a ô ne beta jam ya kam. Bi ne te yalane jam ete nge ve na Nti a tôé ajô dé e be ba melu ma, éyoñ nyiane wé ô ne ntoo bebé, “ba baʼale Sabat na be bo te ve wô mvin,”5 a ba kôlô akôl dap na be bo te bo nkômbane wop e mfufube môse Zambe. Nalé, a “mbunane Yésus,” avale foé éngele lale ya Nlitan 14 a jô, ba baʼale “metiñe me Zambe” mese. Nti a nga jô ajô bôte bete a zene ya nkulu mejô Ezayi na: “Éyoñ ete éfufup jôé ja ye kui ane tyé, a mvoʼé ya minsône miôé ja ye kui avôl; a zôsôô wôé [‘Nti a ne zôsôô wongan.’ Yérémie 23:6] a ye ke ôsu dôé; a duma Nti da ye baʼale wo mvus.”6 A mintiñane ya aval ete, aval avé bi nga ye yange jôm mfe nge sa na ésaé é ye bi bibuma? “Nge Zambe a ne a bia, za a ne wosan a bia?”
GSAM 464Aval avé bôte ba be ne ke ôsu?
GSAM 464.3Nge bia fombô ntabane ya 1846, éyoñ Mvendé Joseph Bates a nga taté tili kalate wé ôsu, kalate ôsu bebuni ya nsoan Krist ba baʼale môse zamgbwale be nga kuli ajô Sabat, a a mbe a bili ve bone biyeme moné 12½ ane moné wé ôse ya si, a a nga sili nye na a belane moné ate ôsusua môse wé ôsu ya ntilan a man; a nge bia beta fombô Mvendé James White a kuliʼe mone kalate mefoé wé ôsu, Bebela ya Éyoñe Ji, a moné a nga bi a zene ya ntyiʼane bilôk e afup bilôk, a lômeʼe kalate mefoé te zezé e be bôt bese ba kômbô lañe nye, a kobôʼe ajô dé ane foé a ye kui e menyu me si,—nge bia fombô bone mekataʼa mete, môt a nga ye sili, ane bôte ya melu me Amos, na: “Za a ye volô Yakôb na a telé? Amu a ne tyôtyoé.”7 Nge bia fombô ntabane te a nyô ya 1905, éyoñ benya mejôô ya foé ba kuluban e menda nkulane bekalate 20, me too mefas me si meval meval, éyoñe éziñ me boʼe ésaé a ngu dap ése na me ve bôt bekalate ba sili, bi ne foʼo jô na: Tama yenan, “mbé ô ne nyoan,” nyô teke môt a ngenan a dip.
GSAM 465.1Ajô bôte ya melu mvus be nga simesane na ésaé é ne te bi bibuma, bi ne kobô mejô nkulu mejô Zekaria a nga lep bôte be nga simesane kange ésaé Zambe ya beta lôñe Yérusalém, na: “Za a nga biane môse ya bone biôm?”8 Ajô biôm bi nga yené ane minkôle minjuk e zen wop, Nti a nga jô a zene ya nkulu mejô na,—
GSAM 465Nkôl ô nga bo nseñ
GSAM 465.2“Ô ne za, a beta nkôl? Asu Zorobabel wo ye bo nseñ; a a ye kui a akoʼo ya nlô nda, bôt be yônôʼe na: Mvam, mvam ô boʼo e be de!”9 Nalé nde jam e nga bo e ésaé foé éngele lale, a nalé nde da ye ke ôsu akekui ba ye kui a “akoʼo ya nlô nda,” nge, a mejô mefe, akekui ésaé ja ye mane.
GSAM 465.3Fombôʼô bone bôte ya 1846, be mbe azoé mfaʼa ya moné a mfaʼa ôse, nge ve mfaʼa ya mbunane e be Zambe a akume ya bebela, a yene avale ésaé jap é véya. Simesaʼane biôm bia volô ésaé bi ne mo nté wu, bekalate bese be ne nkôman, nkôñelan a nkulan e minkobô mevale meval ya si, a mintéte mi bekuane bekalate ba futi bekalate bete e menda me bôt, kuane wop ô kui $400,000 mbu ôse. Nge ébotane Zambe ja ke ôsu a tabe e ésaé, bi ne yange mbamba bibuma. A biôm a bebo bisaé bete ba bet ngon ôse, a mbunane wongan e be Krist, bia yiane yange ve jam Salômôn a nga yia ajô keké Zambe éyoñ a nga kui e ntabane ya nkôte si, a “bômôʼô a wo Ñnyeʼan wé”; a liti nye a yenéʼe “abeñ ane ngon, éfufup ane jôp, a nyian ane beta nsamba biwosan a mindem miap.”10
GSAM 466Mvolan ô so mveane ya nkulane mejô
GSAM 466.1Bi nji ve yene na mbaʼalane Nti ô nga yoé zene ya mfañane bebela, a na beta ébotane dé é nga tabe a bisaé bôt be nga bo na be wulu e mezene a nga yoé; ve e atataʼa a nkean ôsu ya foé éngele lale a nga kobô a bôte bé a zene ya mveane ya nkulane mejô. Jam ete e nji bo ane mfefé nlitan a ye nyoñe vôme Bible, nge ane jam da ye kôñelane meyeʼelane ya Ntilan, ve na e liti vôm, melu ma, bôt be ne kui na be liʼi Mbamba Foé Krist ô ne teke mintômban, vôme bôt be ne kui na miboone ya melu ma mi wulu be, a be vaʼak a kônane Zambe a yené ve atan teke ngu été.
GSAM 466.2Nge bia fombô ajô te a éveʼela11 ya bekulu mejô ya melu mvus, nye Nti a nga ve bia ane metiñe méziñe ya be ma bia yiane veʼele meyenane ma, bia koone mesoñane me avale da na meyenane ma ma sili den avale me nga sili melu mvus; mme me ne na melu mese bôt be ne kui na meyeʼelane a miboone ya melu map, mia dañe wulu bôt éyoñe te, mi vaa be e zene bebela. Nlômane Paul, éyoñ a kobô ajô meyenane ya mimvean Nti a nga futi e keké, a jô na mi ne “asu ya bo befufup bôt mvoʼé, asu ésaé ya mbo ésaé Zambe, asu ya lôñe nyôle Krist; akekui bia bese bi ye bo jôme jia e mbunan a e ñyemane Mone Zambe, bi bo ngum môt, a kui abime mvéman ya njalan Krist; na bi bo te beta bo bongô, mindunde mi wuaʼa bia mfaʼa ôse, a évuñulu ése ya meyeʼelan é wuluʼu bia, a zene ya minsos mi bôt a fek be bili ya taʼane mezene ya duʼu bia. Ve, bi kobôʼô bebela a nyeʼan, bi véé e be nye mfaʼa ôse, nyô a ne nlô, nne Krist; e be nye nyôle ése ja latan mvoʼé a tyeleban a jôm nsôñane ôse wa ve, avale éfase ése ja bo ésaé a abime ngu dé, a ja bo na nyôl é vé, a é lôñ émien e nyeʼan.”12
GSAM 467.1Mejô ma tyane meyenane ya mveane ya nkulane mejô melu ma me nga ye fe kobôban a ngu avale da melu mvus; mme na, bi bili Mintilan, ajô te bi nji yi mimveane ya aval ete. Ve, Mintilane mite mmie mia kate bia na Krist a nga futi mimveane mite e keké na mi bo ésaé jap akekui “jôm é ne mvoʼé ése [ntabane ô ne mvoʼé ôse] é so,” a na keké a yiane bo te “jembane mvean ôse, a yangaʼan nsoane Nti wongan Yésus Krist.”13
GSAM 467Bia yi bekulu mejô amu jé?
GSAM 467.2Bôte ya melu mvus be nga ye simesane na be bili atiñe Zambe da liti mbamba mboan, de émien a nga tili a ônyia wé e bitate mekok; na be bili metiñ, mintyiʼane mejô a meyeʼelane me nga so anyu Zambe e be Môze, a me nga tili a mbaʼalan ôse; a na, jé é nga beta sili? Ve, toʼo be nga bili mbamba benya mejôô bete bese, Zambe a nga yene mvoʼé na a kobô be “biyoñe bi ne meval meval a mezene me ne meval meval, a zene ya befufup bekulu mejô bé.”
GSAM 467.3Bia koone na minkañete bekulu mejô be ne meval meval be nga ve, aval ane Ezayi, Yérémie, Ezekiél, Daniel, Ôzée, a bevok, mi nga yeʼele atiñe da éko ése mfaʼa ya wôʼô Zambe. Ve nkulu mejô ase a nga bili mintyame mié asu bôte ya melu mé, amu be nga kui na minsôme ya melu nkulane mejô ô nga veban mi dui be aval ane be kôlô e mfufup metiñe ya zôsôô.
GSAM 468Bia yi mimvean
GSAM 468.1Môt a ne jô na bi nji bili ve mbamba meyeʼelane ya Mintilane ya Nnôm Élat, ve bi bili fe mejô Nyii wongan émien a me ya belôman, ajô te, amu jé bia beta yi éfufup? Jam é ne na befufup belômane bete be nga liti melu mʼasuʼulan, éyoñ “melu me ne minjuk ma ye so,” a éyoñ bôt ba ye “bili avale kônane Zambe a yené atan, ve ba bene ngu dé”; be nga kate fe bia na “bôt béziñ ba ye kôlô e mbunan, be vôʼôlôʼô minsisime mia duʼu bôt a meyeʼelane ya bedémon.”
GSAM 468.2Amu mame mete mese, bôte Paul a kobô ajô dap éyoñ a tili Betesalônika, ba be ye bo te tabe e dibi na môse Krist a wua be mo nyô ane ñwuwup, ve ba ye bo bone bʼéfufup, ba lep be na be “veʼele mame mese” mfaʼa ya “minkulane mejô,” a na be “tukaʼa bi jôm é ne mvoʼé.”14 Jam ete e ne avale da a nkate be na bôte ba ye yange nsoane Nti Yésus Krist, a ba ye koone be be ne nkôman e môse te, ba ye bili meyenane me ne “mvoʼé,” me ne bebela, ya mveane ya nkulane mejô e zañe jap.
GSAM 468Mindeme ya asuʼulan
GSAM 468.3Bi ne melu mindem mi ne abui mfaʼa ôse mia liti na môse Nti a ne bebé. Bi ne foʼo melu me nga yiane na ayoñe bôt e kôlô, de da ye baʼale metiñ mese, a da ye fe “bili nkañete Yésus”15—nyô a ne “Nsisime nkulane mejô.”16 Jé bia koon? Na e mimbu 60 mi nga lôt, ayoñe ya aval ete e nga kôlô, e beʼe foé ya aval ete, a mveane ya nkulane mejô ô nga yené e zañe jap. Bi veʼeleʼe mvean ô nga yené a zene ya Nganti E. G. White a metiñe ya Bible, bi nga yene na ô nga tabe bebela e jam ése. A taté atataʼa a kui asuʼulan, e mintilan mise mi Nganti White, be nji koone nkobe wua wa ve bôt toʼo mone zene ya bo abé, nge wa yebe toʼo mone nkôlane ya ajô Zambe. Mintilane mite mi nji telé bebien Bible yôp, ve mia ke ôsu a lep bôt na be tuʼa yéʼé ajô Zambe a mbaʼalane ôse, mi litiʼi de ane beta éveʼele be ye fas mam mangan na be veʼele me môse ntyiʼane mejô ya asuʼulan. E mintilane mié, Krist a bete asu dangan ane éveʼele étam bi yiane tôñ. A liti nye a éfufup ése na nnye a ne ndi nleme wongan étam ya dañ vôm nyô, abômbô dangan étam ya yitibane ayaa da so, jôé étam a zene étam bi ne nyian a zene jé.
GSAM 469Nkañete môt émien a ve
GSAM 469.1Mfaʼa ya Nganti White a avale ésaé dé, mejô ma tôñ ma ma veban, me mbe ntilan mbu 1877 a môt a nga yeme nye a a nga yéʼé ésaé dé mimbu abui; a éyoñ mimbu bebé 53 ya meveʼele mi lôteya, mimbu ya mbaʼalane a mfombane, ma yebe a nlem ôse asimesan ése e ne ntilan été:—
GSAM 469.2“Mfaʼa ya nkôñ ényiñe Kal White ane mbuni Krist, ma sili na me jô na ma simesane na ma yeme jôm éziñ été. Me yemeya nye mimbu 18,—é dañe abôk ya nlañane bôte bangan. Me nga tabe nda bôt jap biyoñ a biyoñ, éyoñe éziñ besondô éko jia. Be nga tabe e nda jangan a e nda bôt jangan biyoñ abui. Me nga wulu a be bebé mevôm mese; me nga tabe a be étam a e mise me bôt, e bisulan a atan bisulan, a me nga bili mbamba mezene mese ya yeme jôm éziñ mfaʼa ya ényiñ, nkôñ ényiñ a nsisime Mojañ a Kal White. Ane mbo ésaé Zambe, me nga yiane bo mam a mevale me bôt mese a a mevale me nkôñ ényiñe mese, akekui ma simesane na me ne fas jôm éziñe ya jam môt a ne, toʼo éyoñ mimbu ya ntabane bebé mia be mi lôteya.
GSAM 470.1“Ma yeme na Kal White a ne minga a teke mintômban, a bili nlem ô ne si, nlem ô ne mvam, a a ne minga a yiane duma. Mimboone mite ya nkôñ ényiñe dé mi nji bo ve biôm a jaé ane ngômesan a a yéʼé, ve mia kui a abeñ a teke njuk e ntabane a bili a taté e nlem. A nji duma émien, simesane na a ne zôsôô a dañ bevok, nge bete émien, avale bôte ba tôñe mbunan ô ne teke fek ba bo éyoñ ése. Me nga tôbane bôte ya aval ete biyoñ abui, a me nga koone be éyoñ ése be ne njalan a mintômban, a mevun, be ne nkôman ya ve asimesane dap, be dumaʼan étyi jap, a mame mefe; ve éyoñ ése me nga koone Kal White a bili mboane mfe.
GSAM 470Mvôé ya azoé
GSAM 470.2“Môt ase, toʼo nyô a dañe bo azoé a nyô a dañe bo si, a ne ke e be nye teke ko woñ na a bi melep a mvôʼan, a a ye bo te biane nye. A fombô éyoñ ése bôt ba yi mvolan, ba be nji bili jôm, a ba ba jéñé, a vaʼa be biôm ba yi, a kañeʼe ajô dap.
GSAM 470.3“Me nji yem môt mfe a baʼale woñe Zambe e nlem wé éyoñ ése aval ete. A nji taté jôm ôse teke taté yeʼelane Zambe a nlem ôse. A yéʼé ajô Zambe a mbaʼalan ôse a a ntelan. Me nga wôʼô Kal White a kobôʼô mintéte mi biyoñ, me nga lañe minkañete mié mise a taté atataʼa a kui asuʼulan, abui ya été biyoñ abui, a me nji koone nkobe wua ô ne abé été ése, nge jôm ôse é nji bo mfufup ése a ya Krist; teke jôme ja kôlô a Bible a a Krist. Ve vôm ate ma koone beta meloene ya wôʼô Zambe, nyeʼe Yésus, buni Mintilan a ke ôsu a fas mie. Me nga bi beta mfi ya nsisim biyoñ bi ne te lang e minkañete. E ne bebela na, me nji lañe mie teke wôʼôtane na mia lep ma amu mbunan ô ne tyôtyoé me bili e be Zambe, amu me nji ve nye ényiñe jam ése, a amu me nji telé nlem ôse e ésaé ya nyii minsisim. Nge me bili fek ya fas mam a ñyemane ya nsisim, ma jô na minkañete mi bili nsisime wua a tyiñe da ane Mintilan.
GSAM 470.4“Mimbu 30 [bi ne jô nté wu na mimbu 60] bôte bangan be nga buni a lañe minkañete mite. Jam ete e nga bo be jé? Ye e nga bo na be kôlô e atiñe Zambe? Ye e nga bo na be liʼi mbunane e be Krist? Ye e nga bo na be wua Bible atan? Ye e nga bo na be bo bôt be ne mvin a bôt ba bo abé? Ma yeme na nge bia veʼele be a bôte ya ékôane mbunane Krist éfe ése, ba ye yené mvoʼé.
GSAM 471.1“Jam da me nga yemete e ne na bôte ba dañe tyane meñyenane me Kal White ba yebe na a ne mbuni Krist. Avale ba ne yebe jam ete, me nji yeme de. Ba jeñe na be yalan jam ete a zene ya jô na be nga duʼu nye. Be ne te liti toʼo mone mvin ô ne e ényiñe dé ése, nge nkobô wua ô ne abé e mintilane mié mise. Ba yiane yebe na abui ya mintilane mié é ne mvoʼé, a na môt ase a ye nyiñ a tôteʼe mame mese a jô a ye bo mbamba mbuni Krist, nyô a bili ndi nlem ya nyiine yôp. Jam ete e ne feʼe ne jam ya kam, nge a ne jôme Satan a belan, nge Satan nnye a ve nye mesimesan, nge mintilane mié mi ne abé, nge mi ne mesimesane me ne teke fek ma so ve e nleme wé émien.”
GSAM 471Bôte be nji yeme bia ba ve nkañete ya mintilan
GSAM 471.2Éyoñ bekalate mefoé bangan be bili mintilane mi Nganti White ba lômé, bôte ba dañe bili nlem ô ne si, woñe Zambe, a ba ne nveane e be nye mbe ba jeñe be. Éyoñ ba kate jam ba lañ, ba jô na: “Mintilane mi Nganti White mmie mia dañe bi minleme miangan. Mia volô ényiñ éyoñ ése, mia jalane a meyeʼelan ma bo na môt a dañe kui bebé a Nti, a dañe bo si, a ko woñe Zambe, a ve nye ényiñe dé. Mintilane mi mi tôñe avale Mintilan nalé na éyoñ bia lañe mie bia simesane na Nganti White a yiane bili nsisime wa ve nye mesimesane ya tili avale a bo.” Nkañete ôte ñwô ba ve abui biyoñ, bôte ba tilane bekalate a bebo bisaé minlômane bangan, bôte bete be nji toʼo yeme toʼo jame da na Nganti White a nyoñe mesimesane mé e mfufube ñyenan.
GSAM 471Vôme ntyañan ô so
GSAM 471.3Nge bia fombô bibuma mveane wu ô ve, nsili wa kôlô na: Ntyañane ya ñyenane mveane wu ô nga so vé a amu jé? A bôte ba tyane wô be nga suʼulane aval avé? Me baʼalaʼan a mfombane ôse ajô te a taté 1852, me nga koone na beta ngabe ya ntyañane ya ñyenane wu é nga so bôte be nga tyam be amu bibua bi nkôñ ényiñe dap, amu be bili minsôme mi ne abé, nge amu zene mboane wop ô nji be mvoʼé. Abui ya bôte be nga tyam be be nga jô na be nji bo abé avale nkañete a nga liti be, a be nga kômbô liti na be ne ke ôsu a bi bebela toʼo be nji yebe mintyame be nga ve be. Éyoñ é nga liti na abui ya bôte bete be nga bene mbunane wop a man kôlô e nsamba. Bôte béziñ be nga yene abé dap, a be nga dañe tukaʼa bi bebela. Nsili wa kôlô na: Nge Nti nnye a wulu bôte ba tyane mveane wu, amu jé ba ye jañese ényiñe dap ya nsisim, a beta kôlô e be Zambe? Atiñe Nyii wongan é ne na ba yiane yeme élé a bibuma bié. A jô a ngu ése na “élé é ne abé é ne te wume mbamba bibuma.”
GSAM 472Ntyañan ô nji bi bibuma
GSAM 472.1Bia simesane biyoñ bôt be nga kôm ntyañane ô nga kôlô ajô minkañete mi Nganti White, be jôʼô na beta mbamba bibuma bi nga ye tôñe ésaé jap nné ane be ye vaa minkañete. Ve be nga mane kôñelane mintaʼane miap mi bo teke tôéban. Éyoñ mimbu ya biwosan mi lôt, be nji liti na be mfañeya bebela ya Sabat e mise me si a dañ avale bôte ya avale dap be nga bo mimbu 49 mi nga lôt. Nge ésaé jap é ne ésaé Nti a nga tobe émien, amu jé foé wop a nji bi abui bibuma a lôt?
GSAM 472Mbamba bibuma bi ne vé?
GSAM 472.2Mfaʼa ôvok, éyoñ bia fombô foé nyô a kate si metiñe me Zambe a mbunane Yésus,—foé nyô a lat a ñyenane mveane ya nkulane mejô wu, a melep mé, meyeʼelane mé a mintyame mié,—bia yene na a nga ke ôsu a ntelan, teke tebe, a taté atataʼa dé a kui melu ma. Bôte be vôʼôlôʼô melep Nti a ve a zene ya mveane te, a be keleʼe ôsu a ngu Nti, foé, avale bi nga liti, a ziñeya si ése, a a ke avôl e be “ayoñ ese, nda bôt ése, nkobô ôse, a bôt bese.”
GSAM 473.1Mfaʼa ya nkean ôsu wé ya melu mvus, bi ne jô na ajô Zambe e tôébaneya, éyoñ a nga jô na: “Te jôme biwosan be nga kôm na é wosan a wo ja ye bi bibuma.” A bebela, wo Zambe ô yenéya e mbamba bibuma bi nga tôñe atataʼa a nkean ôsu ya beta ndulu bôt ya nsoan Krist nyô akekui den; a mfaʼa ya melu ma zu bia buni na ajô dé da ye foʼo tôéban, na: “Me nga telé mbé ô ne nyoan asu dôé, a môt a ne te dip wô.” E mbunane wu bi ne yia a ndi nlem ôse na:—