Adventist Pioneer
Library
aplib.orgLibrary
Table of Contents
01 / 31
01 / 31

Mazgu Ghakwamba

John Norton Loughborough

GSAM 3.1PALI kale mabuku ghanandi ghakovwira mu mawoko gha ŵanthu, ndipo chifukwa icho nkhusazgirapo linyake ntchakuti mu mapeji agha nkhuyowoya vinthu vinandi vyakukhwaskana na ŴaAdventist, chomenechomene ŴaAdventist ŵa Zuŵa la Chinkhonde na Chiŵiri, ivyo vindayowoyekepo kwa ŵanthu mu nthowa iyi. Kweniso, ŵanandi awo ŵakazomera mulimo uwu mu vyaka vyakulondezgapo, ndipo ŵandawone vinthu ivyo vyazunulika, ŵapempha chomene kuti awo ŵakadangira mu mulimo ŵalongosore vyakuchitika na ivyo ŵakakumana navyo. Pakuti nkhamanyanga gulu la kwiza kwa Khristu mu 1843 na 1844, ndipo kwamba pa Janyuwale 2, 1849, napharazga chisambizgo ichi, pakwamba nga Adventist, ndipo kwamba mu 1852 nga Adventist wa Zuŵa la Chinkhonde na Chiŵiri, nkhuwona kuti ntchakukondweska “kuyowoya vinthu ivyo nawona na kupulika.”

GSAM 3.2Nalongosora vya gulu la kwiza kwa Khristu, ilo kwamba mu 1831 kufika mu 1844 likathandazgika ku mtundu uliwose wa pa charu chapasi uwo ukaŵa na chitukuko.

GSAM 3.3Kwamba mu 1845 paŵa magulu ghanyake gha ŴaAdventist agho ghapharazga, ndipo ghachalipharazga, kuti kwiza kwa Khristu kuli pafupi. M'malo mwa kulongosora mbiri ya magulu ghose agha, chilato chane chaŵa kulongosora mwakukwana kwamba na kukura kwa ŴaAdventist ŵa Zuŵa la Chinkhonde na Chiŵiri, na kulaŵiska chomene pa ivyo, mu ulongozgi wa Chiuta, vyawovwira kuti pa ukavu na kwamba kuchoko pakure ŵanthu awo, nangauli ŵalipo pafupifupi 100,000 pera, ŵanyake mwa ŵakususka ŵawo ŵayowoya kuti, “Para munthu wangalaŵiska nkhongono na mwamphu uwo ŵakugwilira ntchito, wangaghanaghana kuti ŵalipo mamiliyoni 2.”

GSAM 3.4Nanga ni awo ŵakumanya pachoko waka mbiri ya ŴaAdventist ŵa Zuŵa la Chinkhonde na Chiŵiri ŵakumanya kuti kwamba mu 1845 Amai E. G. White ŵaŵa na malo ghakumanyikwa chomene mu gulu ili, pakuyowoya na pakulemba. Ŵakumanyaso kuti mu mulimo wawo mukaŵa mawonetsero, panji vyawanangwa, vyapadera. Nili na mwaŵi wa kuŵapo na kuwona chawanangwa ichi chikugwira ntchito pafupifupi ka makumi ghankhondi. Mu mapeji agha nalongora mauchimi ghakudunjika pafupifupi 26 agho Amai White ŵakayowoya, ndipo ghafiskika ndendende.

GSAM 4.1Padera pa ivyo ine nkhajiwonera, nalembaso ukaboni wa ŵanthu ŵanyake awo ŵakajiwonera ŵekha ivyo ŵakakumana navyo. Fundo izi zikwenera kuŵa zakuzirwa chomene kwa muŵazgi wa mtima wakunyoloka kuluska mazgu ghakuyowoyeka waka na awo ŵandaŵepo pa vyakuchitika vyantheura.

GSAM 4.2Nkhupereka buku ili ku ŵaŵazgi, na chigomezgo chakuti, na thumbiko la Chiuta, kuŵazga mapeji agha kungawovwira kuti mulimo wa Khristu ukure mu mitima yinandi. Nkhugomezgaso kuti wose, para ŵakuŵazga, ŵakumbukenge mazgu gha Paulosi ku Ŵatesalonika, “Yezgani vinthu vyose; koleskani icho ntchiwemi.”

GSAM -J. N. Loughborough. Mountain View, California, Meyi 1, 1905.

Note

Back