Mazgu Ghakwamba gha Kope la 1992
GSAM -[Mazgu gha munozgi wa CD-ROM: Pakuti mu kope la 1992 mukaŵa vyakulembeka vya Loughborough ivyo vikaŵa vindasindikizgikepo kale (nga Chakusazgirapo A), tawona kuti ntchakwenelera kusazgamo fundo zakulongosora izi za sonosono, pamoza na mbiri na ivyo vikawoneka vyakukhwaskana navyo.]
GSAM 5Mbiri Yifupi ya Umoyo Wake
GSAM 5.1John Norton Loughborough wakajiwonera yekha kukhazikiskika kwa mpingo wa ŴaAdventist ŵa Zuŵa la Chinkhonde na Chiŵiri. Mbiri yifupi ya umoyo na uteŵeti wake mu mazgu ghake, iyo yatoleka mu Chakusazgirapo A, yiwovwirenge kupulikiska kope liphya ili la buku lake.
GSAM 5.2Nkhababika mu Victor, mu chigaŵa cha Ontario, N.Y., pa Janyuwale 26, 1832. Muzi uwu, uwo ukaŵa na ŵanthu 200 panji kujumpha, ukazingilizgika na malo ghakulimapo agho mukaŵa ŵanthu ŵanandi, kwa mtunda wa mamayilo ghanandi. Ukaŵa mumphepete mwa msewu wakale uwo ŵakendeskangamo makochi ghakuguza na mahachi ghakunyamura makalata kufuma ku Albany kuluta ku Buffalo. Mu muzi uwu ndimo nkhalutanga ku sukulu ya pa zuŵa lakwamba la sabata na ku mapemphero gha ŵanthu wose kufika mu nyengo ya kutumphuka kwa vyakumera ya 1848, apo msumba wa Rochester, N.Y. ukaŵa malo ghane ghakugwilira ntchito. Ŵadada na asekuru wose ŵaŵiri ŵakaŵa ŵateŵeti ŵa mpingo wa Methodist mu malo agha, kweni ŵakajisangiranga ŵekha vyakukhumbikwa pa umoyo....
GSAM 5.3... Mu sabata yaumaliro ya Disembala 1843, nkhapulika kakwamba upharazgi wakukhwaskana na kwiza kwa Khristu. M'bali James Barry ndiyo wakapharazganga, pa mutu wakuti, “Ora la Cheruzgo Chake Lafika.” Nkhongono zikuru za Chiuta zikafikiska unenesko uwo wakapharazganga mu mitima yithu. Vikaŵa nga kuti tikwimilira panthazi pa chitengo cha cheruzgo cha Chiuta. Chifukwa cha kuchiska uko muliska wakachita pamanyuma pake, ine pamoza na ŵanyake ŵanandi tikasendelera panthazi kuti ŵatilombere. Ndipo apa ndipo nkhambira kufwilirapo kulomba na kupenja Chiuta....
GSAM 5.4Mu nyengo ya chiwuvi ya 1852, pambere nindambe kupharazga uthenga wa mungelo wachitatu, apo nkhasandanga usange nkhwenera kupharazga uthenga uwu, panji kugwira ntchito ya mawoko kuti nisangire ine na muwoli wane vyakukhumbikwa, Mudumbu White ŵakapika mboniwoni ya nchimi pa ungano withu ku Rochester pa Sabata linyake. Ndipo ukaboni wa ulongozgi wakudunjika ukaperekeka kwa ine kuti nileke kuchita chizita, kweni nifumeko na kupharazga uthenga, ndipo Fumu yinijulirenge nthowa kuti nisangenge vyakukhumbikwa....
GSAM 6.1Apo nkhaŵa kuti nanjira makora mu mulimo, mu nyengo zakwambilira zira, pakaŵa chinthu icho panyengo iyo chikaŵa chisisi kwa ine. Chikaŵa ichi: pa ungano uliwose wakuzirwa mu vigaŵa vyakupambanapambana uko M'bali na Mudumbu White ŵakalutanga, ŵakanipemphanga kuti nilute nawo. Nkhajifumbanga kuti, “Chifukwa wuli nyengo zose ŵakuŵapempha yayi ŵateŵeti aŵa m'malo mwa ine?”
GSAM 6.2Kweniso, apo kuwukira kutatu kura kukachitika kwamba mu 1853 kufika mu 1865, apo ŵakambiska manyuzipepara ghatatu ghakupambanapambana, limoza pa kuwukira kulikose, chifukwa wuli ine nkhaŵapo na kuwona kwamba kwa kuwukira kulikose? Kweniso, chifukwa wuli nkhaŵapo kuwona Mudumbu White mu mboniwoni zawo zakujurika zakujumpha 40, kuwona ŵadokotala ŵakuŵasanda, na kuŵapulika ŵakuyowoyerathu vinthu ivyo vizamuchitika, vinthu ivyo vikawonekanga vyambura kugomezgeka ku awo ŵakapulikanga mauchimi agha, kweni vikafiskika nadi? Nkhuyowoya na mtima wose kuti mwaŵi uwu ukaŵa wa kujikuzgira yayi kwa ine, kweni ukaŵa chisisi. Nkhajifumbanga kuti, “Chifukwa wuli vyose ivi vili nthena?”
GSAM 6.3... Mu 1890, Ungano Ukuru ukanipempha kuti nigwire ntchito kumafumiro gha dazi kwa Mapiri gha Rocky. Ndipo ukaboni wa ulongozgi uwu ukiza, uwo ukalembekera Mulara O. A. Olsen, ndipo kope lake likatumizgikaso kwa ine: “Nkhuti lekani Mulara Loughborough ŵachite mulimo uwo ukukhumba chomene kuchitika mu mipingo. Fumu yikukhumba kuti mazgu ghawo ghapulikikenge nga gha Yohane, ŵakulongosora ivyo iwo ŵakumana navyo ŵekha pakwamba na pakukura kwa uthenga wa mungelo wachitatu. Lekani Mulara Loughborough ŵayime mu malo ghawo ghakwenelera, nga Kalebi uyo wakiza panthazi na kupeleka ukaboni wakukhora pakati pa kuleka kugomezga, kukayika na kususka, wakuti, ‘tingakwaniska nadi kukwelera na kupoka charu chiwemi ichi.’ Mungaŵajaliranga Mulara Loughborough mu ngodya yinyake kulikose yayi. Mungaŵakakiliranga ku ungano wa mipingo umoza pera yayi. Ŵalekani ŵalutenge kuno na uko, na kulikose, ŵakulongosora ivyo ŵawona, ŵamanya na kukhwaska pakwamba kwa uthenga wa mungelo wachitatu.
GSAM 6.4(Wonani Chakusazgirapo B kuti muwone madeti ghakuzirwa mu umoyo wa Loughborough.)
GSAM 7Ntchemo Yapadera Yakuthandazga Buku la Loughborough
GSAM 7.1Pafupi na chaka cha 1900, M'bali Loughborough ŵakati ŵalemba Kwamba na Kukura kwa Uthenga wa Mungelo Wachitatu, ilo likadangira Gulu Likuru la Kwiza Kachiŵiri, Ellen White ŵakalemba mazgu agha:
GSAM 7.2Nkhukhwaskika chomene mu mtima na umo tiliri sono. Sono tikwenera kuchita mulimo uwo ukeneranga kuti ukachitika kale chomene. Tikwenera kuchita umo Fumu yikalongozgera Mozesi kuchita, apo ŵana ŵa Israyeli, ŵakati ŵajumpha mu chipalamba, ŵakazenga misasa ku mphaka za Yorodani. Mozesi wakaphalirika kuti waŵalongosolereso vyose ivyo Fumu yikaŵachitira pa ulendo wawo mu mapopa. Nkhani ya kulongosoraso uku yili mu buku la Dotoronome.
GSAM 7.3Nkhani ya ivyo ŵanthu ŵa Chiuta ŵakakumana navyo mu mbiri yakwambilira ya mulimo withu yikwenera kusindikizgikaso. Ŵanandi awo ŵiza mu unenesko kufuma nyengo yira ŵakumanya yayi umo Fumu yikagwilira ntchito. Ivyo William Miller na ŵanyake, Kapiteni Joseph Bates, na ŵapayiniya ŵanyake mu uthenga wa kwiza kwa Khristu ŵakakumana navyo, vikwenera kukumbuskika kwa ŵanthu ŵithu. Buku la Mulara Loughborough likwenera kupwelelerwa. Ŵalongozgi ŵithu ŵakwenera kuwona icho chingachitika kuti buku ili lithandazgike.
GSAM 7.4Tikwenera kusanda kuti tisange nthowa yiwemi chomene yakuweleramo ku ivyo takumana navyo kwamba pa kwamba kwa mulimo withu, apo tikafuma mu mipingo na kuluta panthazi pachokopachoko mu ungweru uwo Chiuta wakatipa. Nyengo yira tikasimikizga kuti Baibolo, ndipo Baibolo lekha, ndilo liŵenge mulongozgi withu; ndipo tingapatukangako chara ku fundo iyi. Tikawona mawonetsero ghakuzizwiska gha nkhongono za Chiuta. Minthondwe yikachitika. Nyengo na nyengo, apo tikasangananga na masuzgo ghakuru, nkhongono za Chiuta zikawonekanga kutovwira.—Kalata 105, 1903 (CWE145) (mazgu ghakonkhoskeka na munozgi).
GSAM 7Chifukwa Wuli Kusindikizgaso?
GSAM 7.5Pakughanaghanira maukaboni gha ulongozgi agho ghali pachanya apa, tiyeni tighanaghanire vifukwa ivyo M'bali Loughborough ŵakalangulikira kuti ŵalongosoreso mbiri yithu, ndiposo chifukwa icho tawonera kuti talongozgeka kwambaso kuthandazga chomene nkhani yawo.
GSAM 8—Ntchemo Yakukumbukira
GSAM 8.1Kuluska vyose, kuŵazgaso vyakuchitika vya mu mbiri kukutipa mwaŵi wa kulondezga woko la Chiuta pakugwira ntchito, na kuwona ukaboni wa kupwelelera kwake kwachitemwa. Ichi chikuzenga chipulikano, ndipo chikutisambizga ivyo vili kuchitika kale, viwemi na viheni wuwo. Chikukumbuskaso vyakuzikapo vya mu Malemba vya mpingo withu, ndipo chikuvumbura mzimu wa kujipata wa ŵapayiniya ŵithu. Chikutikumbuska misisi yithu ya uzimu. Nga umo M'bali Loughborough ŵakalembera pa peji 33, “Usange chikaŵa chiwemi kuti Israyeli wakumbukenge umo Fumu yikaŵalongozgera, asi ntchiwemi kwa ise wuwo? Mu chimwemwe chikuru, wamasalimo wakutiso, ‘Tumbika Yehova, wamoyo wane, ndipo ungaluwanga viwemi vyake vyose chara.’”
GSAM 8—Nyengo Yapadera mu Mbiri
GSAM 8.2Vyaka ivyo mulimo wa ŴaAdventist ŵa Zuŵa la Chinkhonde na Chiŵiri ukakhazikiskikiranga vikaŵa yimoza ya nyengo zapadera mu mbiri. Tikukumbuka vimanyikwiro vitatu panji kujumpha vya nyengo yantheura.
GSAM 8.3(1) Para uchimi ukuru ukufiskika. Kanandi pa nyengo iyo, ŵanthu ŵanandi ŵakumanya yayi panji ŵakupulikiska makora yayi vyakuchitika vyantheura. Ntheura ntchakuzirwa na chakovwira chomene kulaŵiska kumanyuma, na kupulikiska uko kukuŵapo pamanyuma pa vyakuchitika, kuti timanye ukuru wa uchimi uwu, mauthenga agho Fumu yikanozga kuti ghaŵe unenesko wa sono pa nyengo yira mu mbiri ya charu chapasi.
GSAM 8.4(2) Para vyakuzikapo vikuŵikika vya mulimo wapadera uwo Fumu yikukhumba kuchita. Pakupulikiska nyengo zantheura, ntchakuzirwa chomene kuwona umo mizati yikaŵikikira, ukaboni wa mu Malemba, na vyakuchitika ivyo Chiuta wakalongozganga. Ivi vikawovwira pachokopachoko “ŵapayiniya,” ŵazengi awo ŵakachemeka ku nyengo yantheura, kuti ŵasimikizge na mtima wose mwakupulikikwa ndiposo mwakulondezgana na fundo, vya uthenga na mulimo uwo Chiuta wakaŵapa.
GSAM 8.5(3) Para pakuchitika kusintha kukuru mu uteŵeti wa chihema chakupatulika cheneko, uwo uteŵeti wakale ukaŵa chithuzithuzi chake. Pakuti nthowa ya Chiuta “yili mu chihema chakupatulika” (Salimo 77:13), ntchakuzirwa chomene kupulikiska na kulondezga mwa chipulikano ivyo Chiuta wakuchita kuti wamazge suzgo la kwananga. Chakovwira chomene pa ichi nkhudenderezga kusintha kukuru uko kukadangira na kusintha uko kukachitika pa kuwuka kwa uthenga wa kwiza kwa Khristu. Fumu yikukhumba kuti tighanaghanire ivyo vikachitika pa kufuma mu luŵaza kuluta mu malo ghatuŵa (kufuma pa Kalivari kufika pa kukwelera kuchanya), na umo ŵanthu ŵakopa Chiuta ŵa nyengo yira pakwamba ŵakapulikiskira mwakubudika ivyo vikachitika. Chifukwa cha ichi ŵakakhuŵara chomene, kweni paumaliro ŵakamanya malo ghawo mu kuvumbulika kwa khumbo la Chiuta. Ivyo ŵakakumana navyo vikungweluska ivyo ŵakugomezga ŵakakumana navyo mu 1844 na pamanyuma pake, pa kufuma mu malo ghatuŵa kuluta mu malo ghatuŵa chomene (kufuma pa kuŵeyelera kufika pa cheruzgo cha kuŵeyelera).
GSAM 9.1Vimanyikwiro vyose vitatu ivyo vyazunulika pachanya apa tikuviwona mu nyengo ya kukhazikiska mulimo iyo yalongosoreka mu nkhani ya M'bali Loughborough. Tikukhumba kupulikiska na kuŵa na mzimu wenewura wa awo ŵakapenjanga unenesko “nga nkhusanga usambazi wakubisika,” ŵakawusanga, ndipo ŵakapereka vyose kuti ŵawupharazge.
GSAM 9—Kukhozga Mzimu wa Uchimi
GSAM 9.2Chifukwa chinyake cha kusindikizgaso ukaboni wa Loughborough nkhukhozga mu nyengo yithu malo agho uteŵeti wa Ellen White uli nagho mu mbiri na mu Baibolo, nga mulembi, muyowoyi na uyo wakapokera chawanangwa chapadera cha Mzimu, icho iwo ŵakazunura mu mazgu ghawo ghakwamba.
GSAM 9—Nkhani ya Unenesko Wakuzikapo Kufuma ku Uyo Wakajiwonera Yekha
GSAM 9.3Ukaboni ukulongora vifukwa vitatu panji kujumpha ivyo Ellen White ŵakapelekera ulongozgi vyaka pafupifupi 90 ivyo vyajumpha kuti buku ili lisangikenge palipose, kweniso kuti mazgu na nkhani za awo ŵakaŵika vyakuzikapo vya mulimo viŵazgikengeso na kusindikizgikaso. (1) Ŵakaboni aŵa awo ŵakajiwonera ŵekha ŵakafwanga, ntheura maukaboni ghawo ghakuyowoyeka na milomo yawo ghakakhalanga chete. (2) Ŵanthu vikwi vinandi awo ŵakasazgikiranga kunjira mu mpingo, kwambura kumanya ŵekha vyakuchitika vya pa kwamba panji ŵanthu awo ŵakambiska mulimo, ŵakatenge ŵapangiskenge mpingo kuŵa wambura kumanya misisi yake iyo Chiuta wakimika. (3) Milimo yakuthandazga visambizgo vyakupatuka yikatenge yiyezgenge mpingo, chomenechomene mu uchibulumutira wake uwo ukawonekera mu vyakuchitika vya ku Minneapolis, ndiposo ukafuma mu vyakuchitika ivyo. Ntheura chigomezgo cha ŵanthu ŵanandi chakuti Fumu ndiyo yikalongozga gulu ili chikatenge chiyezgekenge chomene mu nthowa zinandi, zakupambanapambana na zakupusika. Chikatenge chiŵenge chakuzirwa chomene kuti ukaboni wa woko lake pakugwira ntchito ulongosorekeso mwakupulikikwa na mwankhongono.
GSAM 9Mazgu Ghakukhwaskana na Chakusazgirapo A
GSAM 9.4Kuleka kumanya uko kukapangiska kufumbafumba na kukayika mwa awo ŵakajiwonera ŵekha yayi kukawoneka mu umoyo wa M'bali Loughborough. Chiyelezgero chimoza cha ichi chikaŵachiska kulemba ivyo vyaperekeka muno nga Chakusazgirapo. Tikuwona kuti ni mwaŵi na udindo withu kusazgamo zgoro lawo mu kope ili, pakuti aka nkhwamba kuti lisindikizgike. Tikamanya kuti lilipo chifukwa chakuti likazunulika mu kabuku ka L. E. Froom kakuti Kusanga Ŵakaboni ŵa Uchimi Awo Ŵakasoŵa. Tikuzunura umo Froom wakalongosolera mbiri ya chikalata icho chili mu Chakusazgirapo A:
GSAM 10.1Chinthu chinyake chakuzirwa icho chikasazgikako chikaŵa chikalata chikuru chakutayipika icho J. N. Loughborough wakalemba mwa kukanikizga makiyi pa makina ghakale gha Blick ghakutayipira mauthenga gha telegirafu, chose mu vilembo vikuru. Chikaŵa zgoro lake, lakunozgeka mu 1918 kwakhala nyengo yichoko pambere wandafwe, ku milandu ya utesi, kubendezga fundo na kuleka kuneneska iyo ŵakususka ŵanyake ŵakamupa nyengo yichoko kumanyuma chifukwa cha mabuku ghake ghakwambilira ghakukhwaskana na kwamba kwa gulu la kwiza kwa Khristu. Apo chikaperekeka kuti chisindikizgike ku yimoza ya nyumba zithu zakusindikizgiramo mabuku, vikawonekerathu kuti ŵanthu ŵanandi ŵakatenge ŵaŵenge na chikhumbo chakukwana yayi chakuti chikasindikizgike. Ntheura chikawezgeka kwa mulembi.
GSAM 10.2Apo ŵakachekuranga, Mulara Loughborough ŵakachipeleka kwa H. A. Washburn, uyo panyengo yira wakaŵa msambizgi wa mbiri pa Koleji ya Pacific Union, ndipo wakachiwonanga kuti ntchakuzirwa na kuchisunga. Zuŵa linyake nyumba ya msambizgi uyu yikaphya na kumalirathu, pamoza na mabuku ghake ghanandi ghawemi. Mabuku ghachoko agho ghakamukhalira ghakaŵa pa thebulu lake ku koleji. Pakati pa agha pakaŵa chikalata ichi, cha mutu wakuti “Vinyake Ivyo Nakumana Navyo.” Paumaliro wa visambizgo vyane vyakwamba vyakulondezgana vya gulu la ŵalondezgi ŵa Miller, ivyo nkhapempheka kuti nisambizge pakujulira Sukulu ya Masambiro Ghapachanya gha Baibolo iyo yikachitikanga chaka chenechira pa Koleji ya Pacific Union, Msambizgi Washburn wakiza na chikalata ichi na kuchiŵika mu mawoko ghane, wakati, “Sono napulikiska chifukwa icho chikalata ichi chikeneranga kuŵira chimoza mwa vinthu vichoko ivyo vikasungika kufuma mu layibulare yane yose, pakuti chikaŵa pa thebulu lane ku koleji. Chiuta wakakhumbanga kuti chisungike ku mulimo uwu. Chiŵikani mu Chisungiro cha Vyakulembeka Vyakwambilira vya Kwiza kwa Khristu.”—mapeji 48, 49
GSAM 10Fumu Yikugwira Ntchito Pamoza na Ŵanthu
GSAM 10.3Pakuti tikupulikiska pachoko umo ŵanthu ŵaliri, nga umo vikuwonekera mu mitima yithu, tikumanya makora kuti Fumu nyengo zose yikugwira ntchito na viŵiya vya dongo. Tikupereka buku ili kuti likhozge chipulikano mu umo Fumu yagwilira ntchito, kweni lileke kuzenga chigomezgo chautesi mu kulopwa kwa ŵanthu awo Fumu yikakhumbanga kufiska khumbo lake mwa iwo. Tikupereka vifukwa vyakugowokera yayi pa nthowa yiliyose iyo umunthu wa ŵanalume na ŵanakazi ŵakopa Chiuta aŵa ungawonekera kwa uyo wakupenja unenesko na mtima wose mu nyengo yithu, apo wakuŵazga buku ili panji nkhani yinyake ya nyengo zakuzirwa zira. Chiuta nyengo zose wagwira ntchito pamoza na ŵanthu, mu kukolerana kwa umunthu na uchiuta (Ŵaefeso 2:20). Tiyeni nyengo zose titegherezge mazgu ghake, nanga nkhwizira mu mazgu ghakukayikakayika gha ŵanthu ŵanyake. “Mungayuyuranga mauchimi chara; yezgani vinthu vyose; koleskani icho ntchiwemi.” (1 Ŵatesalonika 5:20, 21). (Wonani Mauthenga Ghakusankhika 3:342-347)
GSAM 11Kulaŵiska Chomene pa Nyengo ya Kukhazikiska Mulimo
GSAM 11.1Tikuwona kuti buku ili likovwira chomene pakuzgora mafumbo ghanandi (kanandi nanga ghangaŵa ghambura kufumbika) ghakukhwaskana na nyengo ya kukhazikiska mulimo withu na vyaka vyakwambilira. Mafumbo ghanyake ghakukhwaskana na ivyo mpingo ukakumana navyo kuumaliro wa vyaka vya m'ma 1800 na pamanyuma pake ghakulongosoreka makora ku malo ghanyake. Muthenga wa Fumu walongosora mu maukaboni gha ulongozgi umo mpingo ukaŵira panyengo yira, ungweru uwo Fumu yikayezga kwiza nawo mu 1888, na vyakufumapo vya mpingo kukana uthenga uwu, pa nyengo yira ndiposo mu vyaka vyakulondezgapo kufika mu nyengo yithu.
GSAM 11.2Ntchakuzirwa kuwona mphambano pakati pa kuchedwa kwa ivyo ŵanthu ŵakulindilira, uko kwaŵa kwa ŵanthu ŵa Chiuta mu nyengo zose, awo ŵakagomezganga kuti ŵali pafupi na kwiza kwa Fumu kweni ŵakapokera ukaboni wakuti kukaŵa kwa nyengo yawo yayi, na kuchedwa kwa ivyo Fumu yikakhumbanga kuchita. Apa, nga umo vikaŵira na Israyeli wakale, iyo yikatifikiska nga ŵanthu ŵake ku mphaka za Kenani na kuti, “Njiranimo,” kweni tikanjiramo yayi chifukwa cha kuleka kugomezga. Tiyeni tiwone uko tili na chifukwa icho tili pano. Tiyeni tisambire ivyo vikachitikira ŵasekuru ŵithu, tikumbuske vitumbiko na kuzizipizga kwa Fumu, ndipo tiyizomerezge kuchita mwa ise na kwizira mwa ise ivyo yikatondeka kuchita vyaka 100 ivyo vyajumpha.
GSAM 11.3(Wonani Chakusazgirapo C)
GSAM 11Ntchemo ku Mpingo wa Sono
GSAM 11.4Mu mazgu ghakwamba gha M'bali Loughborough, iwo ŵakayowoya kuti ŴaAdventist ŵa Zuŵa la Chinkhonde na Chiŵiri 100,000 awo panyengo yira ŵakaŵa mu mpingo ŵakalongora nkhongono na mwamphu uwo ukapangiska kuti ŵawonekenge nga ni mamiliyoni 2. Para tingagwiliskira ntchito chiŵerengero chakuyana waka, kasi sono tingati ŵanthu ŵithu mamiliyoni 6 ŵakuwoneka nga ni mamiliyoni 120? Kasi kulongosora kwawo vya vyaka vyakwambilira kukwiza na ntchemo wuli ku mpingo lero?
GSAM 12.1Tikumusidirani mafumbo ghanyake ghambura kuzgoreka agho tikulomba kuti kope liphya ili limuchiskeni kughanaghanira:
GSAM 12.2(1) Kasi “gulu” laluta nkhu?
GSAM 12.3(2) Kasi lagomezgeka ku vyakuzikapo vyake?
GSAM 12.4(3) Kasi ni kusintha kunandi wuli uko tikuwona mu mpingo kufuma mu nyengo ya Loughborough uko kungalongosoreka na kusintha kwa kakhaliro ka ŵanthu panji na Fumu pakugwira ntchito pakati pithu?
GSAM 12.5(4) Chifukwa wuli tichali pano, vyaka pafupifupi 150 kufuma apo gulu likambira kupharazga kuti kuwera kwa Khristu kuli pafupi?
GSAM 12.6Pakulaŵiskaso mbiri yithu yakale, pakuti nenda mu sitepe yiliyose ya kuluta panthazi kufika apo tili sono, ningayowoya kuti, Lumbani Chiuta! Para nkhuwona ivyo Fumu yachita, nkhuzura na kuzizwa, ndiposo na chigomezgo mwa Khristu nga mulongozgi. Tilije icho tingawopa kunthazi, kupatulapo para tingaluwa nthowa iyo Fumu yatilongozgera, na chisambizgo chake mu mbiri yithu yakale.—Mbiri Yifupi ya Umoyo wa Ellen G. White, 196
GSAM 12.7Ungasezgangapo mphaka yakale chara, iyo ŵasekuru ŵako ŵakaŵika.—Zintharika 22:28 Komiti ya Layibulare ya Ŵapayiniya ŵa Adventist Loma Linda, California, Malichi 1, 1992